ޕެރިސް ސެއިންޓް ޖާމަން (ޕީއެސްޖީ)ގެ ކޯޗުކަމުގެ މަގާމުން ވަކިކުރި އާޖެންޓީނާގެ މައުރީސިއޯ ޕޮޗެޓީނޯ އަލުން އެނބުރި ފްރާންސް ލީގުގެ ޓީމަކާ ހަވާލުވާން އުޅޭ ކަމަށް މީޑިއާ ރިޕޯޓުތައް ބުނެފިއެވެ.
ޕީއެސްޖީގެ ކޯޗުކަމަށް ޕޮޗެޓީނޯ ހަމަޖެއްސީ 2021 ވަނަ އަހަރުއެވެ. ނަމަވެސް ނިމުނު ސީޒަންގެ ޗެމްޕިއަންސް ލީގުން އެ ޓީމު ކެޓުމާއެކު، މިއަހަރު ވަނީ އޭނާ މަގާމުން ވަކިކޮށްފައެވެ. އެ މަގާމަށް ދެން ގެނައީ މިހާރުގެ ކޯޗު ކްރިސްޓޮފާ ގަލްޓިއޭއެވެ.
މީޑިއާތަކުގައި ރިޕޯޓުކޮށްފައިވާ ގޮތުގައި ފްރާންސް ލީގުގެ ނީސްގެ ކޯޗުކަމާ ހަވާލުވުމަށް ޕޮޗެޓީނޯއާ މަޝްވަރާ ކުރުމަށް އަންނަނީ ތައްޔާރުވަމުންނެވެ. ލީގުގައި ނީސް އަށް ލިބެމުންދާ ދަށް ނަތީޖާގެ ސަބަބުން އެ ޓީމުގެ ކޯޗު ލުސިއަން އަށް ވަނީ ޕްރެޝަރުތަކާ ކުރިމަތިލާން ޖެހިފައި ކަމަށް ވެސް ރިޕޯޓުތަކުގައި ބުނެއެވެ. ފްރާންސް ލީގުގައި މިހާތަނަށް ކުޅުނު އަށް މެޗުގެ ތެރެއިން އެ ޓީމު މޮޅުވެފައިވަނީ އެންމެ ދެ މެޗުންނެވެ. ދެ މެޗުން އެއްވަރުވީއިރު، ހަ މެޗުން ވަނީ ބަލިވެފައެވެ. ނީސް އޮތީ އަށް ޕޮއިންޓާއެކު ތާވަލްގެ 13 ވަނަ މަގާމުގައެވެ.
އުމުރުން 50 އަހަރުގެ ޕޮޗެޓީނޯ ވަނީ މީގެ ކުރިން ވެސް ގިނަ ކުލަބުތަކަށް ކޯޗުކަން ކޮށްދީފައެވެ. އޭގެ ތެރޭގައި އެސްޕަންޔޯލް، ސައުތުހެމްޓަން، ޓޮޓެންހަމް އަދި ޕީއެސްޖީ ހިމެނެއެވެ.
