ކޮމިޓީންވެސް ނިންމީ ބިދޭސީންނަށް މިނިމަމް ވޭޖް ދޭނެ ތާރީހެއް ކަނޑައެޅުމުގެ ބާރު މިނިސްޓަރަށް ދޭން
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުޅުދުއްފުށީ ދެކުނު ދާއިރާގެ މެމްބަރު ޖަމްޝީދު މުޙައްމަދު
އިޖުތިމާއީ ކޮމިޓީގެ މުގައްރިރު މުޙައްމަދު ޝިފާއު
ވަޒީފާއާ ބެހޭ ޤާނޫނަށް އިސްލާހު ގެނައުމުގެ ބިލް ދިރާސާކޮށް އިޖުތިމާއީ ކޮމިޓީން ނިންމި ގޮތުގެ ރިޕޯޓު އާއްމުކޮށް އިސްލާހު ހުށަހެޅުމުގެ ފުރުސަތު ހުޅުވާލައިފިއެވެ.
އިޖުތިމާއީ ކޮމިޓީގެ ރިޕޯޓުގައި އެ ކޮމިޓީން އިސްލާހު ކުރަން ފާސްކުރީ ރާއްޖޭގައި މަސައްކަތް ކުރާ ފަރާތަކީ ބިދޭސީއެއް ނަމަ، ރާއްޛޭގެ އިގްތިސާދީ ހާލަތާއި ޤައުމުގެ ފުދުންތެރިކަމަށް ރިއާޔަތް ކޮށް ބޯޑުން މިނިސްޓަރަށް ދޭ ލަފާގެ މަތިން ވަޒީފާއާ ބެހޭ ޤާނޫނޫގެ 62 ވަނަ މާއްދާގެ (ބ) ގެ ދަށުން މިނިސްޓަރު ކުރާ އަމުރަށް ވަޒީފާ ދޭ ފަރާތްތަކުން އަމަލުން ކުރަން ޖެހޭ ތާރީހެއް މިނިސްޓަރު ކަނޑައަޅައި އާއްމުކޮށް އިއުލާން ކުރަންވާނެ ކަމަށެވެ. މި ރިޕޯޓަށް އިސްލާހު ހުށަހެޅުމުގެ ފުރުސަތު މެމްބަރުންނަށް ހުޅުވާލާފައިވަނީ ބުދަ ދުވަހުގެ މެންދުރު 11:00 އާ ހަމައަށެވެ.
ބިދޭސީންނަށް މިނިމަމްވޭޖް (އެންމެ ކުޑަ އުޖޫރަ) ދިނުން މުއްދަތެއް ނެތް ގޮތަށް ލަސްކުރަން ގާނޫނަށް ހުށަހެޅި އިސްލާހު އިތުރަށް ދިރާސާކޮށް ގޮތެއް ކަނޑައެޅުމަށް އެ ބިލު އިޖުތިމާއީ ކޮމިޓީއަށް ފޮނުވީ އަންގާރަ ދުވަހުއެވެ. ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުޅުދުއްފުށީ ދެކުނު ދާއިރާގެ މެމްބަރު ޖަމްޝީދު މުޙައްމަދުއެވެ.
ވަޒީފާ އަދާކުރާ ކޮންމެ މުވައްޒަފަކަށް އެންމެ ކުޑަ އުޖޫރަ ދޭން ޖެހޭގޮތަށް ވަޒީފާއާބެހޭ ގާނޫނަށް އިސްލާހު ގެނެސް، އެ ގާނޫނަށް އަމަލު ކުރަން ފެށީ 22 ސެޕްޓެމްބަރު 2020 ގައެވެ. އެ ގާނޫނުގެ ދަށުން މިދިޔަ ޖެނުއަރީ މަހު އެންމެ ކުޑަ އުޖޫރަ ދޭން ފެށި ނަމަވެސް ބިދޭސީ މުވައްޒަފުންނަށް އެންމެ ކުޑަ އުޖޫރަ ދިނުމަށް ދެ އަހަރު ދުވަހުގެ މުއްދަތެއް ގާނޫނުގައި ވަނީ ހިމަނައިފައެވެ. މި މުއްދަތު މި މަހުގެ 22 ވަނަ ދުވަހު ހަމަވާނެއެވެ.
ޤާނޫނުގައި ދެ އަހަރުގެ މުއްދަތެއް ކަނޑައަޅައިފައި އޮތުމުން އެ މުއްދަތު އިތުރުކޮށް ބިދޭސީންނަށް މިނިމަމް ވޭޖް ދިނުން މުއްދަތެއް ނެތް ގޮތަށް ފަސްކުރުމަށް ހުށަހެޅި ބިލަކީ ގާނޫނުގައި ކަނޑައަޅާފައިވާ ދެ އަހަރު ދުވަހުގެ މުއްދަތު މިމަހުގެ 22 ވަނަ ދުވަހުގެ ނިޔަލަށް ހަމަވާ އިރު، ދުނިޔެއަށް މިހާރު ކުރިމަތިވެފައިވާ އިގުތިސޯދީ ހާލަތުގެ ސަބަބުން ރާއްޖޭގެ އިގުތިސޯދަށް ނޭދެވޭ އަސަރު ކޮށްފައިވާތީ ކަމަށް ބިލުގައި ވަނީ ބުނެފައެވެ.
މި ބިލު ދިރާސާ ކުރުމަށްފަހު މިނިމަމްވޭޖް ބޯޑުން ދޭ ލަފަޔާއެއްގޮތަށް ތާރީހު ކަނޑައެޅުމުގެ ބާރު މިނިސްޓަރަށް ލިބޭގޮތަށް ނިންމީ އަންގާރަ ދުވަހު ބޭއްވި އިޖުތިމާއީ ކޮމިޓީއަސް ހާޒިރުވި މެމްބަރުންގެ އިއްތިފާގުންނެވެ.
