ހައުސިންގ ޑިވެޕޮލްމެންޓް ކޯޕަރޭޝަން (އެޗްޑީސީ)ގެ މާލީ ހާލަތު ރަނގަޅުކުރަން ގޯތި ވިއްކަން ނިންމީ އުސޫލާ އެއްގޮތަށް ކަމަށް އެ ކުންފުނީގެ ޗެއަރމަން މުހައްމަދު ޝާހިދު ވިދާޅުވެއްޖެއެވެ.
ރިޔާސީ އިންތިޚާބުން ރައީސް އަބްދުﷲ ޔާމީން ބަލިވެފައި ވަނިކޮށް ހުޅުމާލޭ ދެ ވަނަ ފިޔަވަހިން 400 ގޯތި ވިއްކަން ނިންމި މައްސަލައަށް އިންތިހާއަށް ފާޑުކިޔުން އަމާޒުވެ، އަދި ގޯތި ވިއްކުމާ ދެކޮޅަށް އެޗްޑީސީގެ މުވައްޒަފުން ޕެޓިޝަނެއް ހުށަހަޅާފައި ވަނިކޮށް ޝާހިދު ވިދާޅުވީ، ގޯތި ވިއްކުމަށް ނިންމީ ކުއްލިއަކަށް ނޫން ކަމަށާއި އެއީ މި އަހަރު ފެށުނު އިރުވެސް ނިންމާފައި އޮތް ކަމެއް ކަމަށެވެ.
ކޭޝްފްލޯ ރަނގަޅު ކުރަން ރާވާފައިވާ ކަންކަމުގެ ތެރޭގައި އެޗްޑީސީން އެންމެ ބޮޑު ސަމާލުކަމެއް ދީފައިވަނީ ޝާހިދު ވިދާޅުވި ގޮތުގައި ބިންތައް ކުއްޔަށް ދީގެން ލިބޭ އާމްދަނީ އަށާއި އާއި ލިބޭ ކުއްޔަށެވެ. ދެވަނަ ކަމެއްގެ ގޮތުގައި ބޮންޑު ވިއްކުމަށެވެ. ހުޅުމާލެއިން ބިން ވިއްކުމަކީ ވެސް ކޭޝްފްލޯ ރަނގަޅުކުރަން ރޭވިފައިޥާ ކަމެއް ކަމަށް ވެސް އޭނާ ވިދާޅުވިއެވެ.
ނަމަވެސް ބޮންޑު ނުވިއްކީ ޝާހިދު ވިދާޅުވި ގޮތުގައި އެކަން އެއީ ކުންފުންޏަށް މިވަގުތަށް އެންމެ ރަނގަޅު ގޮތް ކަމަށް ނުވުމުންނެވެ. އާމްދަނީ ހޯދުމުގެ ކަންކަން ނިންމާފައިވަނީ އެޗްޑީސީގެ ޗީފް ފައިނޭންޝަލް އޮފިސަރު (ސީއެފްއޯ) އަލީ ޝަރީފްގެ ލަފާގެ މަތިން ކަމަށް ވެސް ޝާހިދު ވިދާޅުވި އެވެ. ނަމަވެސް ގޯތި ވިއްކުމާ ދެކޮޅަށް އެޗްޑީސީގެ 170 މުވައްޒަފުން ސޮއިކުރި ޕެޓިޝަންގައި އެންމެ ފުރަތަމަ ސޮއިކުރައްވައި، އެ ޕެޓިޝަން ހެދުމުގައި އެންމެ އިސްކޮށް ހަރަކާތްތެރިވީ އަލީ ޝަރީފެވެ.
ގޯތި ވިއްކުން ބޮޑު މައްސަލަގަނޑަކަށް ވެފައިވާއިރު، ކޭޝްފްލޯ ރަނގަޅުކުރަން ހުުޅުމާލެއިން މީގެ ކުރިން ވެސް ބިން ވިއްކާފައިވާ ކަމަށް ޝާހިދު ވިދާޅުވި އެވެ. މިފަހަރު މިކަން މައްސަލައަކަށް ވީ ޝާހިދު ފާހަގަކުރެއްވި ގޮތުގައި ގޯތި ވިއްކުމަކީ ސޯޝަލް ހައުސިންގެ ބަޔަކަށް ސަރުކާރުން ހެދުމުންނެވެ. ނަމަވެސް އެޗްޑީސީއަކީ ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏަކަށް ވުމާއެކު، ސަރުކާރުން ނިންމާ އެފަދަ ނިންމުންތަކަށް އަމަލުކުރަންޖެހޭ ކަމަށް ވެސް އޭނާ ވިދާޅުވި އެވެ.
މައްސަލަ ބޮޑުވެ ގޯތި ވިއްކުން ވަގުތީ ގޮތުން މިހާރު ހުއްޓާލާާފައިވާއިރު، އެކަމާ ގުޅޭ ގޮތުން ކަމާބެހޭ މުއައްސަސާތަކާ މަޝްވަރާކުރަމުން އަންނަ ކަމަށް ވެސް ޝާހިދު ވިދާޅުވި އެވެ.
ހުޅުމާލޭ ދެ ވަނަ ފިޔަވަހިން 1،000 އަކަފޫޓްގެ 400 ގޯތި ދޫކުރަން ނިންމާފައިވަނީ ގޯއްޗެއް ޖުމުލަ އަގު 400،000 ރުފިޔާގެ ރޭޓުންނެވެ. ޑައުންޕޭމެންޓްގެ ގޮތުގައި 25،000 ރުފިޔާ ދެއްކުމަށް ފަހު، ގޯއްޗަށް ދައްކަން ޖެހޭ ބާކީ ފައިސާ 10 އަހަރަށް ބަހާލައިގެން ދެއްކޭނެ ކަމަށް ހައުސިން މިނިސްޓްރީން ވަނީ ބުނެފަ އެވެ.
