ކުރީގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމަށް ހަޖޫޖަހައި ތައްޔާރުކޮށްފައި ހުރި ކާޓޫނުތަކެއް ޗެނަލް 13އިން ދެއްކި މައްސަލައިގައި، އެއީ އަބުރުގެ ގާނޫނާ ހިލާފު ކޮންޓެންޓެއް ނޫން ކަމަށް ބްރޯޑްކާސްޓިން ކޮމިޝަނުން ނިންމި ނަމަވެސް، ތަހްގީގުކުރި ކޮމިޓީން ނިންމާފައި އޮތީ އެއީ ގާނޫނާ ހިލާފު ކޮންޓެންޓެއް ކަމަށް، ކޮމިޝަންގެ ބައެއް އޮފިޝަލުން ވިދާޅުވެއްޖެ އެވެ.

ޕީޕީއެމް އާއި ރައީސް އަބްދުﷲ ޔާމީން ޕްރޮމޯޓްކުރާ ޗެނަލް 13 އިން "ނަނާ ހުވަފެން"ގެ ނަމުގައި ގެނެސްދިން ޕްރޮގްރާމްގައި، ކުރީގެ ރައީސް މައުމޫން، ބުދު ދީނުގެ ކަލާނގެއަކާ އެއް ސިފަކޮށްފައިވެ އެވެ. އަދި އެ މަނިކުފާނަށް ހަޖޫޖަހާފައިވާ އެތައް މަންޒަރުތަކެއް އެ ޕްރޮގްރާމްގައި ދައްކާފައިވެ އެވެ.

މި ކޮންޓެންޓަކީ އަބުރުގެ ގާނޫނާ ހިލާފުވާ ކޮންޓެންޓެއް ނޫން ކަމަށް ކޮމިޝަނުން ނިންމި ނަމަވެސް، އެ މައްސަލަ ތަހްގީގުކުރި ކޮމިޓީން ނިންމާފައި އޮތީ، ޗެނަލް 13 އިން އަބުރުގެ ގާނޫނާ ހިލާފުވާ ކަމަށާއި ފިޔަވަޅު ވެސް އެޅުމަށް ކަމަށް ކޮމިޝަންގެ މެމްބަރަކު ވިދާޅުވި އެވެ.

އެ މެމްބަރު ވިދާޅުވި ގޮތުގައި ކޮމިޝަނުން އަމިއްލަ އަށް އިސް ނަގައިގެން ބެލި މި މައްސަލަ ތަހްގީގުކުރުމަށް ފަހު، ކޮމިޓީގެ ނިންމުމާމެދު އަންގާރަ ދުވަހު ކޮމިޝަންގެ ބައްދަލުވުމުގައި މަޝްވަރާކޮށް ނިންމީ ޗެނަލް 13 ގާނޫނާ ހިލާފު ނުވާ ކަމަށެވެ.

"މި ކޮންޓެންޓް ގާނޫނާ ހިލާފުވާ ކަމަށް ކޮމިޝަންގެ ބައެއް މެމްބަރުން ވެސް ގަބޫލުކުރައްވާ، ކޮމިޝަންގެ އެހެން މުވައްޒަފުން ވެސް. ނަމަވެސް  ކަންކަން ނިންމަނީ "މަތިން" އަންގާ ގޮތަށް،" އޭނާ ވިދާޅުވި އެވެ.

ރައީސް މައުމޫންގެ ކާޓޫން ދެއްކި މައްސަލަ ބެލުމަށް ހުށަހެޅީ ކޮމިޝަންގެ ނައިބު ރައީސް މުހައްމަދު އަސްލަމް ކަމަށް ވެސް ރާއްޖެއެމްވީއަށް ވަނީ އެނގިފަ އެވެ.

އެ ޕްރޮގްރާމްގައި އަބުރުގެ ޤާނޫނާ ޚިލާފް ކޮންޓެންޓް ނުހިމެނޭ ކަމަށް ބްރޯޑްކާސްޓިންގ ކޮމިޝަނުން ނިންމި ގޮތުގެ ބަޔާނުގައި ޗެނަލް 13 ގެ އެކްޓިންގ ސީއީއޯ ހަސަން ޣައްސާން ދީފައިވާ ދިފާޢީ ބަޔާނުގެ މައްޗަށް ބުރަވެ، ދެ ކަމެއް ފާހަގަ ކޮށްފައިވެއެވެ. އެގޮތުން އެޕްރޮގްރާމުގައި ދައްކާފައިވަނީ މާޒީގައި ބަޔެއްގެ ޢަމަލުތައް ބައްޓަންވެފައި ހުރި ގޮތް ކަމާއި، ޗެނަލް 13 އިން ދެއްކި ކޮންޓެންޓަކީ ކުރީގެ ބަޔަކު ކޮށްފައި އޮތް ކަމެއް ކުށްވެރިކޮށް، އެ ކަން އެއީ އެހެން ވެގެންވާނެ ކަމެއް ނޫން ކަމަށް ސިފަކޮށްދޭން ދެއްކި ކޮންޓެންޓެއް ކަމަށް ބަޔާން ކޮށްފައިވާ ކަމަށް ބްރޯޑްކޮމް އިން ބުނެފައިވެއެވެ.

ޗެނަލް 13 އިން ދެއްކި ކޮންޓެންޓަކީ އަބުރުގެ ޤާނޫނުގެ 18 ވަނަ މާއްދާގެ (ހ) ގައި ބަޔާން ކޮށްފައިވާ ގޮތުގެ މަތީން ތެދު ބަޔާން ކުރުމުގެ ގޮތުން ދެއްކި ކޮންޓެންޓެއް ކަމާއި، އެ ކޮންޓެންޓަކީ އަބުރުގެ ޤާނޫނުގެ 18 ވަނަ މާއްދާގެ (ށ) އާ އެއްގޮތްވާ ގޮތުގެ މަތީން ތެދު ހަގީގަތެއްކަން ޗެނަލް 13 ހިންގާ މީޑިއާ ރިންގް ޕްރައިވެޓް ލިމިޓެޑުން ކޮމިޝަނުގެ ތަހުގީގަށް ސާބިތުކޮށްދީފައިވާ ކަމަށް ބްރޯޑްކޮމްގެ ބަޔާނުގައިވެއެވެ. ޗެނަލް 13 ގެ ކޮންޓެންޓުގައި އަބުރުގެ ޤާނޫނުގެ 18 ވަނަ މާއްދާގެ (ހ) އަދި (ށ) އަށް ރިއާޔަތްކޮށް، އަބުރުގެ ގާނޫނުގެ 10 ވަނަ މާއްދާގެ (ހ) ގެ 1 ވަނަ ނަންބަރާއި، އެމާއްދާގެ (ބ) އާ ޚިލާފް ކޮންޓެންޓެއް ނެތް ކަމަށް މައްސަލަ ބެލި ކޮމިޝަނުގެ ޖަލްސާގައި ބައިވެރިވި މެމްބަރުންގެ އިއްތިފާގުން ކަނޑައަޅާފައިވާ ކަމަށް ބްރޯޑްކޮމް އިން ބުނެއެވެ.

ކޮމިޝަންގެ މި ނިންމުން، ތަހްގީގު ކޮމިޓީގެ ނިންމުމާ ހިލާފު ކަމަށް ކޮމިޝަންގެ ބައެއް އޮފިޝަލުން ރާއްޖެއެމްވީއާ ވިދާޅުވެފައިވެ އެވެ.

މިކަމާ ގުޅޭ ގޮތުން ކޮމިޝަންގެ ސެކްރެޓަރީ ޖެނެރަލް މުހައްމަދު ނާސިހް ބުދަ ދުވަހު ރާއްޖެއެމްވީއަށް ވިދާޅުވީ ކޮމިޓީން މައްސަލަ ތަހްގީގު ކުރި ނަމަވެސް، ފައިނަލް ނިންމުން ނިންމާނީ މުޅި ކޮމިޝަނުން ކަމަށާއި ޗެނަލް 13 މައްސަލަ ވެސް ނިންމާފައި ވަނީ އެ އުސޫލުން ކަމަށެވެ. ކޮމިޝަންގެ ނިންމުން ތަހްގީގު ކޮމިޓީގެ ނިންމުމާ ހިލާފު ކަމަށް އޭނާ ވިދާޅެއް ނުވި އެވެ.