ރައްޔިތުންގެ މަޖިލީހުގެ ކިނބިދޫ ދާއިރާގެ އަބްދުﷲ ރިޔާޒް މައްސަލަ ނިމެންދެން ބަންދުގައި ބެހެއްޓުމަށް ނިންމާފައިވަނީ މިދިޔަ އަހަރު ބަލަން ފެށި މައްސަލައަކާ ގުޅިގެން ކަމަށާއި، މިއީ މަރިޗު 2 ވަނަ ދުވަހު ފުލުހުން އޭނާ ހައްޔަރު ކުރި ކުރުމުގައި ގާނޫނީ ކުލަޖެއްސުމަށް ކުރި ކަމެއް ކަމަށް އޭނާގެ ގާނޫނީ ވަކީލުން ބުނެފިއެވެ.

ރިޔާޒް ހައްޔަރުކުރި މައްސަލައާއި ގުޅިގެން، ވަކީލުންގެ ޓީމުން ނެރުނު ބަޔާނުގައި ބުނެފައިވަނީ އަބްދުﷲ ރިޔާޒްގެ މައްސަލައަކީ ސިޔާސީ މަގްސަދެއް ހާސިލް ކުރުމަށް ކުރިއަށްގެންދާ މައްސަލައެއް ކަމަށާއި މިކަމުގައި ޝާމިލުވާ ފުލުހުންނާއި ޕްރޮސިކިއުޓަރުންގެ މައްސަލަތައް އެންޓި ކޮރަޕްޝަން ކޮމިޝަނަށާއި ކަމާގުޅުންހުރި އެންމެހާ އިދާރާތަކަށް ހުށަހަޅާނެ ކަމަށެވެ.

މިމަހުގެ 2 ވަނަ  ދުވަހުގެ ހަވީރުގެ ވަގުތެއްގައި ފުލުހުންގެ ބެލުމުގެ ދަށަށް ގެންގޮސް ރިޔާޒް ހައްޔަރުކޮށްފައިވާއިރު ރައްޔިތުންގެ މަޖިލީހުގެ މެންބަރުންގެ އިމްތިޔާޒް ޤާނޫނަކީ ކުއްލި ނުރައްކަލުގެ ޙާލަތުގެ ޤަރާރުން ސަސްޕެންޑްކޮށްފައި ނުވާ ޤާނޫނަކަށް ވީނަމަވެސް ރައްޔިތުންގެ މަޖިލީހުގެ މެންބަރަކު ބަންދުކުރުމަށް އެޤާނޫނުގައި ކަނޑައަޅާފައިވާ އިޖުރާއާތަށް، އޭނާ ހައްޔަރުކުރުމުގައި އަމަލުކޮށްފައިނުވާ ކަމަށް ވަކީލުން ބުނެއެވެ.

ރިޔާޒް ހައްޔަރުކޮށްފައިވަނީ ކުއްލި ނުރައްކަލުގެ ޙާލަތުގެ ޤަރާރުގެ ދަށުން ކަމަށް ވިދާޅުވެ، ދޫނިދޫ ގޮޅިއެއްގައި ބަންދުކޮށްފައިވާއިރު އޭނާ ހައްޔަރުކޮށްފައިވަނީ މާލޭގެ މަގުތަކަށް މީހުން އެއްކޮށް، އެކަން ރާވައި ސަރުކާރު ވައްޓާލަން އުޅުމުގެ ތުހުމަތުގައިކަމަށް ވަކީލުންގެ ބަޔާނުގައި ފާހަގަކޮށްފައިވެއެވެ.

ރިޔާޒް ބަންދުގައި ހުންނަވަނިކޮށް، ބަންދު ކުރުމުގެ ކުރިން 2017 ވަނަ އަހަރުގެ ނޮވެމްބަރު މަހު ކްރިމިނަލް ކޯޓަށް ދައުލަތުން ހުށަހަޅާފައިވާ މައްސަލައެއް ބަލަން ފަށައި، މައްސަލަ ބަލާ ގާޒީ އެއްވެސް ސަބަބެއް އެންގުމަކާ ނުލައި ބަދަލުކޮށްފައިވާކަން މި ބަޔާނުގައި ވަކީލުން ފާހަގަކޮށްފައިވެއެވެ.

މައްސަލައާ އަލަށް ހަވާލުވި ގާޒީ މައްސަލައިގެ އަޑުއެހުމެއް، މިމަހުގެ 11 ވަނަ ދުވަހު ބޭއްވުމަށްފަހު، ގާނޫނީ ވަކީލަކު އައްޔަންކުރުމަށް ފަސް ދުވަހުގެ ފުރުސަތެއް ދެއްވާފައިވާކަމަށް ގާނޫނީ ވަކީލުން ބުނެއެވެ. ނަމަވެސް ގާނޫނީ ހަމަތަކުގެ މަތީން ފަސް ދުވަސް ހަމަނުވަނީސް، އިއްޔެގެ ވަގުތެއްގައި އިތުރު އަޑުއެހުމެއް ބާއްވައި، ދެދުވަހުގެ ތެރޭގައި ވަކީލަކު އައްޔަންކުރުމަށް އަންގައި، ޝަރީއަތުގެ އަޑުއެހުން ނިންމާލައްވާފައިވާ ކަމަށްވެސް ވަކީލުން ބުނެއެވެ.

އެއަޑުއެހުން ނިންމައި އެންމެން ދިޔަ ފަހުން ހަމަ އެދުވަހު އަލުން އިތުރު އަޑުއެހުމެއް ބާއްވައި، ދައުވާކޮށްފައިވާ މައްސަލައާ ގުޅުވައި، އެމައްސަލާގައި ވަކީލެއްގެ ފުރުސަތުދީފައިވާ މުއްދަތު ދެމިއޮއްވައި، ޤާނޫނީ ވަކީލެއްގެ އެހީތެރިކަން ދިނުމެއް ނެތި، ޝަރީއަތް ނިމެންދެން ބަންދުގައި ބެހެއްޓުމަށް ދައުލަތުން އެދި އެގޮތުގެ މަތީން ބަންދުގައި ބެހެއްޓުމަށް ގާޒީ އަމުރުކުރައްވާ ކަމަށް ވަކީލުން ބުނެއެވެ.

ނަމަވެސް އެމައްސަލައަކީ އެމައްސަލަ ކޯޓަށް ހުށަހަޅައި ގިނަ ދުވަސްތަކެއް ވެފައިވާއިރުވެސް، އެމައްސަލައިގެ ބާވަތުން، އެމައްސަލައާ ގުޅުވައިގެން ރިޔާޒް ބަންދުގައި ނުބެހެއްޓުމަށް މީގެ ކުރިން ނިމިފައިވާ މައްސަލައެއް ކަމަށާއި އެމައްސަލައާ ގުޅުވައިގެން ޢަބްދުﷲ ރިޔާޒް ޝަރީޢަތް ނިމެންދެން ބަންދުގައި ބެހެއްޓުމަށް، ވަކީލެއްގެ ފުރުސަތުވެސް ނުދީ ކުއްލިއަކަށް ނިންމާފައިވާ ކަމަކީ ކަންބޮޑުވާ މައްސަލައެއް ކަމަށް ވަކީލުން ބުނެއެވެ.