ފަސް ކަމެއް މަޖިލީހަށް ބަލައިގަނެ ހަތަރު ކަމެއް ތަޅުމުން ބޭރު

ރައްޔިތުންގެ މަޖިލީހުގެ އަންގާރަ ދުވަހު ކުރިޔަށްދިޔަ ޖަލްސާގައި 9 ކަމަކަށް ވޯޓަށް އެހިއިރު ފަސް ކަމެއް މަޖިލީހަށް ބަލައިގަނެ ހަތަރު ކަމެއް ތަޅުމުން ބޭރުކޮށްލައިފިއެވެ.

އެގޮތުން މަޖިލީހަށް ބަލައިނުގަނެ ތަޅުމުން ބޭރުކޮށްލާފައިވަނީ މާވަށު ދާއިރާގެ މެމްބަރ މުހައްމަދު ސައީދު ހުށަހަޅުއްވާފައިވާ ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ ހ، ރ އަދި ބ ސަސްޕެންޑްކޮށްފައި އޮތްއޮތުން ނިމުމަކަށް ގެނައުމަށް ސަރުކާރަށް ގޮވާލާ ހުށަހަޅާފައިވާ ގަރާރާއި ކާށިދޫ ދާއިރާގެ މެމްބަރ އަބްދުﷲ ޖާބިރު ހުށަހަޅުއްވާފައިވާ ދިވެހި ފުލުހުންގެ މުސާރައަށް ހެޔޮ ބަދަލެއް ގެނައުމަށް އެދި ހުށަހަޅާފައިވާ ގަރާރާއި މަހިބަދޫ ދާއިރާގެ މެމްބަރ އަހުމަދު ތާރިގު ހުށަހަޅުއްވާފައިވާ ގާނޫނު އަސާސީއަށް އިސްލާހު ގެނައުމުގެ ބިލުގެ އިތުރުން ނޮޅިވަރަމް ދާއިރާގެ މެމްބަރު މުހައްމަދު ނަޝީދު ހުށަހަޅުއްވާފައިވާ ޓޫރިޒަމްގެ ޒަރީޢާއިން ރާއްޖެއަށް ލިބޭ އާމްދަނީ އަބަދަށް ދެމިގެންދާ ގޮތެއްގައި ރާއްޖޭގައި ބެހެއްޓުމަށްޓަކައި ގެންނަންޖެހޭ ބަދަލުތައް ގެނައުމަށް ގޮވާލާ ހުށަހަޅާފައިވާ ގަރާރެވެ.

އަންގާރަ ދުވަހުގެ ޖަލްސާގައި މަޖިލީހަށް ބަލައިގަތް ކަންކަމުގެ ތެރެއިން އެއް ކަމަކީ ގަލޮޅު ދެކުނު ދާއިރާގެ މެމްބަރ މީކާއީލް އަހުމަދު ނަސީމް ހުށަހަޅުއްވާފައިވާ ދަރިމައިނުވުމުގެ މައްސަލަ ރާއްޖޭގައި އިތުރުވަމުންދާތީ މިމައްސަލަ ތަހައްމަލުކުރަން ޖެހިފައިވާ ރައްޔިތުންނަށް އިޖުތިމާއީ ސިއްހީ އިންޝުއަރަންސްގެ ގައުމީ ނިޒާމުގެ ދަށުން ބޭސްފަރުވާގެ ފުރުސަތުތައް މިހާރަށްވުރެ ފުޅާކޮށް ފަސޭހަކުރުމަށް ހުށަހަޅާފައިވާ ގަރާރެވެ. މިގަރާރު އިތުރަށް ދިރާސާކުރުމަށް ވަނީ އިޖުތިމާއީ ކޮމިޓީއަށް ފޮނުވާފައެވެ.

ގާނޫނީ ފަންނުގެ ގާނޫނަށް ވިލިމާލެ ދާއިރާގެ މެމްބަރ އަހުމަދު އުޝާމް ހުށަހަޅުއްވާފައިވާ ބިލްވެސް ވަނީ މަޖިލީހަށް ބަލައިގަނެފައެވެ. މިބިލް ދިރާސާކުރުމަށް ޖުޑީޝަރީ ކޮމިޓީއަށް ފޮނުވާފައެވެ.

ސަރުކާރުގެ ފަރާތުން ފޭދޫ ދާއިރާގެ މެމްބަރ މުހައްމަދު ނިހާދު ހުށަހަޅުއްވާފައިވާ ގާނޫނުލްއުގޫބާތަށް އިސްލާހު ގެނައުމުގެ ބިލް ވަނީ މަޖިލީހަށް ބަލައިގަނެ އިތުރަށް ދިރާސާކުރުމަށް ޖުޑީޝަރީ ކޮމިޓީއަށް ފޮނުވާފައެވެ.

މީގެއިތުރުން ސަރުކާރުގެ ފަރާތުން ކުޅުދުއްފުށި ދެކުނު ދާއިރާގެ މެމްބަރ ޖަމްޝީދު މުހައްމަދު ހުށަހަޅުއްވާފައިވާ ވަޒީފާ އާ ބެހޭ ގާނޫނަށް އިސްލާހު ގެނައުމުގެ ބިލްވެސް ވަނީ މަޖިލީހަށް ބަލައިގަނެ އިތުރަށް ދިރާސާކުރުމަށް އިޖުތިމާއީ ކޮމިޓީއަށް ފޮނުވާފައެވެ.

ތޮއްޑޫ ދާއިރާގެ މެމްބަރ ހަސަން ޝިޔާން ހުށަހަޅުއްވާފައިވާ ސްޓެލްކޯ އާއި ފެނަކަ އިން ކަރަންޓުގެ ޚިދުމަތް ފޯރުކޮށްދެމުންގެންދާ ރަށްރަށާއި މާލެ ސަރަހައްދުގައި ވިޔަފާރިތަކަށް ބިލު ކުރަމުންގެންދާ ރޭޓާއި ބޭންޑު ކުރުންތަކުގައި ގެންގުޅޭ ތަފާތުކުރުންތައް ނައްތާލައި ބޭންޑާއި ރޭޓް ހަމަހަމަ ކުރުމަށް ގޮވާލައި އެކަން ސަރުކާރުގެ ސަމާލުކަމަށް ގެނައުމަށް ހުށަހަޅާފައިވާ ގަރާރު ވަނީ މަޖިލީހަށް ބަލައިގަނެ އިތުރަށް ދިރާސާކުރުމަށް އެސްއޯއީ ކޮމިޓީއަށް ފޮނުވާފައެވެ.