ހުޅުމާލޭގެ ފޭސް 2ގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ތަރައްގީކުރަމުން އަންނަ ވިނަރެސް ފްލެޓަށް ކުރިމަތިލުމަށް ހުޅުވާލި މުއްދަތުގައި 1413 ފަރާތަކުން ކުރިމަތިލާފައިވާކަމަށް އެޗްޑީސީން ބުނެފިއެވެ.

ވިނަރެސް ހައުސިން މަޝްރޫއުގެ އެޕާޓްމަންޓްތައް ދެއްކުމަށް އާއްމުންނަށް ހުޅުވާލި ފުރުސަތު 21 ޖުލައިގައެވެ. އެމުއްދަތު ހަމަވެފައިވަނީ 15 ސެޕްޓެމްބަރުގައެވެ. ވިނަރެސް މަޝްރޫއުގެ ދަށުން ޗައިނާގެ ސީއެމްއީސީއާ ހަވާލުކޮށްގެން 10 ޓަވަރުގެ މަސައްކަތް ކުރިއަށްގެންދެއެވެ. މި 10 ޓަވަރުގައި ޖުމްލަ 1344 ފްލެޓް ހަދާފައިވެއެވެ.

އެޗްޑީސީން ބުނީ ފުލެޓްތަކަށް ކުރިމަތިލާފައިވާ ފަރާތްތަކުގެ ޝަރުތުހަމަވާކަން ކަނޑައަޅާނީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިންކަމަށެވެ.

ވިނަރެސްގައި ދެ ވައްތަރެއްގެ އެޕާޓްމަންޓް ހިމެނެއެވެ. 902 އަކަފޫޓު އަދި 883 އަކަފޫޓް ހިމެނޭ މި އެޕާޓްމަންޓްތަކުގައި 3 ކޮޓަރި އަދި 3 ފާހާނަ އަދި ބެލްކަނީ ހިމެނެއެވެ.

ހައުސިންގ މިނިސްޓްރީން ވިނަރެސް ފްލެޓަށް ކުރިމަތިލާ ފަރާތްތަކުގެ ދިރިއުޅުމުގެ ހާލަތަށް ބެލުމަށްފަހު ސްކޯރ ތަރުތީބުން ލިސްޓުކުރާނެއެވެ. އެއަށްފަހު އެޗްޑީސީން ލިސްޓް އޯޑަރަށް ޔުނިޓް ހިޔާރުކުރުމަށް ހުޅުވާލާނެއެވެ. އެއަށްފަހު އެޗްޑީސީން ފައިނޭންޝިއަލް އެލިޖިބިލިޓީގެ އިވެލުއޭޝަންގެ މަސައްކަތް ކުރިޔަށްގެންދެވި އެލިޖިބަލްވާ ފަރާތްތަކަށް ޔުނިޓް ހަވާލުކުރާނެއެވެ. އަދި ފައިނޭންޝިއަލް އެލިޖިބިލިޓީން ޝަރުތުހަމަނުވާ ފަރާތްތަކުގެ ޔުނިޓްތައް ކެންސަލުކޮށް ވެއިޓް ލިސްޓުގައިވާ ފަރާތްތަކަށް ފުރުސަތު ދޭނެއެވެ.

އެޗްޑީސީން ބުނީ މިހާރު ކުރިޔަށްދަނީ މިފްލެޓްތަކުގެ އެންމެ ފަހުގެ މަސައްކަތްތައް ކަމަށެވެ. އަދި 2023 ވަނަ އަހަރުގެ ފުރަތަމަ ކުއާޓަރުގައި ވިނަރެސް ފްލެޓް އާންމުންނާ ހަވާލުކުރެވިގެންދާނެއެވެ.

މިއީ މިހާތަނަށް ރާއްޖޭގައި ކުރިއަށްގެންދިޔަ ހައުސިން މަޝްރޫއުތަކުުގެ ތެރެއިން ދެވަނައަށް އެންމެ ބޮޑު މަޝްރޫއެވެ. މިހާތަނަށް ހިންގި އެންމެ ބޮޑު މަޝްރޫއަކީ ހިޔާ މަޝްރޫއެވެ.