ރައީސްގެ ގަރާރު ބާތިލުކުރުމަށް އެދި ހުށަހެޅި މައްސަލަ ހައިކޯޓުން ބަލައިގެންފި
މި މައްސަލަ މިހާރު އެ ކޯޓުން ވަނީ ބަލައިގެންފައި
އިދިކޮޅުގެ ކެމްޕޭނު، ރާއްޖޭގެ އެކި ހިސާބުތަކުގައި ފުޅާކުރުމުގެ މަސައްކަތް ފަށާފައިވާއިރު، އެންމެ ފުރަތަމަ އެ ކެމްޕޭނުގެ ހަރަކާތް ބޭއްވީ ފުވައްމުލަކު ސިޓީގައި
އިދިކޮޅު ކޯލިޝަނުން ހިންގާ "އިންޑިއާ އައުޓް" ކެމްޕެއިން ހުއްޓުވުމަށް ކަނޑައަޅުއްވައި ރަައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނެރުއްވި ގަރާރު ބާތިލުކުރުމަށް އެދި ހައިކޯޓަށް ހުށައަޅާފައިވާ މައްސަލަ އެ ކޯޓުން ބަލައިގެންފިއެވެ.
މި މައްސަލަ ފުރަތަމަ ހުށައެޅީ ސުޕްރީމް ކޯޓަށް ނަމަވެސް، އެ ކޯޓުން މައްސަލަ ބޭރުކޮށްލީ މިއީ ފުރަމަތަ މަރުހަލާގައި ހައިކޯޓަށް ހުށަހަޅަންޖެހޭ ބާވަތުގެ މައްސަލައެއްކަން ބަޔާންކޮށެވެ.
ހައިކޯޓުން މައުލޫމާތު ދޭ ގޮތުގައި މި މައްސަލަ މިހާރު އެ ކޯޓުން ވަނީ ބަލައިގެންފައެވެ.
ރައީސްގެ ޤަރާރުގައި ބަޔާން ކޮށްފައިވަނީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ޤައުމަކާއި ދެކޮޅަށް ރާވައިގެން ހިންގާ ކެމްޕޭނުތަކަކީ ޤައުމީ ސަލާމަތާ ގުޅުންހުރި، އަދި ނުރައްކާ އޮތް ކަމެއްކަމަށާއި، ވަކިވަކި ޤައުމުތަކާއި ދެކޮޅަށް ނަފުރަތު އުފެއްދުމަށް ހިންގޭ މިފަދަ ހަރަކާތްތަކަކީ ޤާނޫނު ތަންފީޛުކުރާ އިދާރާތަކުން ހުއްޓުވަން ޖެހޭނެ ހަރަކާތްތަކެއް ކަމުގައި ކަނޑައެޅުމަށް މަޖިލީހުން ނިންމައިފައިވާ ކަމަށެވެ.
ވުމާއެކު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ (ނ) އާއި، (ރ) އާއި (މ) އިން ރައީސުލްޖުމްހޫރިއްޔާއާ މަތިކޮށްފައިވާ ބާރުތަކާއި މަސްއޫލިއްޔަތުތަކުގެ ދަށުން، މި ފަދަ ހަރަކާތްތައް ހުއްޓުވުމަށް ކަނޑައަޅައި، މިކަން މިގޮތުގެ މަތީން ތަންފީޛުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ޤަރާރު އެކަށައެޅުއްވީކަން ވަނީ ބަޔާން ކުރައްވާފައެވެ.
އިދިކޮޅު ކޯލިޝަނުން ހިންގާ އިންޑިއާ އައުޓް ޙަރަކާތަކީ ރާއްޖޭގެ ޤާނޫނުތަކާއި އަދި ރާއްޖެއިން ބައިވެރިވެފައިވާ ބައިނަލްއަޤުވާމީ މުއާހަދާތަކާއި ޚިލާފު ޙަރަކާތެއް ކަމަށް ކަނޑައަޅުއްވައި އޭޕްރިލް މަހުގެ 21ގައި ނެރުއްވި ޤަރާރުގައި ޤާނޫނު އަސާސީއާ ޚިލާފު އަދި އެއްވެސް މީހެއްގެ ހައްޤު ގެއްލޭ ކަމެއް ނޯންނާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވަނީ ވިދާޅުވެފައެވެ.
ރައީސް ވިދާޅުވީ، އިންޑިއާ އައުޓް ޙަރަކާތާއި ގުޅޭ ގޮތުން އެމްއެންޑީއެފް އާއި ޕޮލިހުން ޤައުމީ ސަލާމަތާ ބެހޭ މަޖިލީހަށާއި، ނެޝަނަލް ސެކިއުރިޓީ ކައުންސިލަށް މައްސަލަތަކެއް ހުށަހެޅި ކަމަށެވެ. ރައީސް ވިދާޅުވީ، ނެޝަނަލް ސެކިއުރިޓީއާ ބެހޭ މައްސަލަތަކެއް މިކަމުގައި އުޅޭ ކަމަށެވެ. އެހެންކަމުން ޤާނޫނު އަސާސީން އެމަނިކުފާނުގެ މައްޗަށް 115 ވަނަ މާއްދާއިން މަތިކޮށްފައިވާ ބާރުތަކާއި މަސްއޫލިއްޔަތުތަކެއްވާކަމަށެވެ.
އެއީ ހައްޤުތަކާއި މިނިވަންކަން ރައްކާކުރުމާއި، ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ ސިޔާދަތުތަކަށް އިޙްތިރާމް ކުރުން އިތުރުކުރުމާއި، ޚާރިޖީ ސިޔާސަތު ކަނޑައެޅުން ފަދަ މަސައްކަތް ކުރުން ކަމަށެވެ. އެކަންކަން ކުރުމުގައި ލިޔުމުންވެސް އެކަން ކުރެއްވުމުގެ އިޚްތިޔާރު އެމަނިކުފާނަށް ލިބިވަޑައިގެންފައިވާއިރު، އެކަމުގައި ޤަރާރެއްވެސް ނެރެވިދާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ، އެއިން އެއްވެސް ކަމަކަށް ޤާނޫނު އަސާސީ ހުރަހެއްނާޅާ ކަމަށެވެ.
ރައީސް ވިދާޅުވީ، އެ ޙަރަކާތަކީ ވަރަށް ބޮޑަށް ރޭވިގެން ހިންގާ ހަރަކާތެއް ކަމަށާއި، އެކަމަކީ ނުބައި ކަންތައްތަކެއް އަޑީގައި އޮވެގެން ވަކި މަޤުސަދެއްގައި ހިންގާ ޙަރަކާތެއްކަން ނެޝަނަލް ސެކިއުރިޓީ ކައުންސިލަށް އެމްއެންޑީއެފްއާ ފުލުހުން ހުށަހަޅާފައިވާ ކަމަށެވެ.
އެހެންކަމުން އެކައުންސިލްގެ ނިންމުމަކަށްވީ މި ކަންތައްތައް ހުއްޓުވުމަށްޓަކައި ރައީސުލްޖުމްހޫރިއްޔާ ކުރައްވަން ޖެހިވަޑައިގަންނަވާ ކަމެއް ކުރެއްވުމަށް ކަމުގައި ރައީސް ވިދާޅުވިއެވެ. އެގޮތުގެ މަތިން އެ ޤަރާރު ނެރުއްވީ ކަމަށާއި، އޭގައި ޤާނޫނު އަސާސީ އާއި ޤާނޫނަކާއި ޚިލާފުވާނެ އެއްވެސް ކަމެއް ނޯންނާނެ ކަމުގެ ޔަޤީންކަން ރައީސް ދެެއްވިއެވެ. ރައީސް ވިދާޅުވީ، އެއްވެސް މީހެއްގެ އެއްވެސް ޙައްޤަކަށް ހުރަސްއެޅޭ ކަމެއްވެސް އެޤަރާރުގައި ނޯންނާނެ ކަމަށެވެ.
