ފުލުހުންނަށް ރައްކާތެރިކަމެއް ނެތްކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް
ހަމަލާދިން ފަރާތްތައް ދެނެގަނެވި ފުލުހުންގެ ބެލުމުގެ ދަށަށް ގެނެވިފައިވީނަމަވެސް މީވަރަށް ނުރައްކާތެރި އަދި އެހާމެ ސީރިއަސްކޮށް ހައްލު ހޯދަންޖެހޭ މައްސަލައެއް
ކާށިދޫ ދާއިރާގެ މެމްބަރު އަބްދުﷲ ޖާބިރު
އެއްވެސް ފަސްޖެހުމެއްނެތި ފުލުހުންނަށް މަރުގެ އިންޒާރުދީ މާރާމާރީ ހިންގާނަމަ މިއަށްވުރެ އަވަހަށް ހައްލު ހޯދަންޖެހޭ މައްސަލައެއް މިގައުމުގައި ނެތްކަމަށް ވިދާޅުވެ ކާށިދޫ ދާއިރާގެ މެމްބަރު އަބްދުﷲ ޖާބިރު ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.
މައްސަލަ ހުށަހަޅުއްވަމުން ޖާބިރު ވިދާޅުވީ މިމަހުގެ 9 ވީ ހުކުރު ދުވަހު އޮފް ޑިޔުޓީގައި އުޅުނު ޑްރަގް އެންފޯސްމެންޓް ޑިޕާޓްމަންޓުގެ ތިން ފުލަހަކަށް ގޭންގަކުން ދިން ހަމަލާއަކީ ފަހަކަށް އައިސް ގޭންގުތަކުން ދެމުން އަންނަ ހަމަލާތަކަށް އިތުރުވި ބޮޅެއްކަމަށެވެ. ހަމަލާދިން ފަރާތްތައް ދެނެގަނެވި ފުލުހުންގެ ބެލުމުގެ ދަށަށް ގެނެވިފައިވީނަމަވެސް މީވަރަށް ނުރައްކާތެރި އަދި އެހާމެ ސީރިއަސްކޮށް ހައްލު ހޯދަންޖެހޭ މައްސަލައެއްކަމަށް ޖާބިރު ވިދާޅުވިއެވެ.
ޖާބިރު ވިދާޅުވީ މިމައްސަލަ ކުއްލި މައްސަލައަކަށް ވަނީ ގާނޫނު ތަންފީޒުކޮށް ކުށްވެރިން ހިފާހައްޔަރުކޮށް މުޖުތަމައުގެ ސަލާމަތްކުރުމާއި ރައްކާތެރިކަމަށް އެޅެންޖެހޭ ފުލުހުން އުޅޭ ހާލަތަކީ މިއީކަމަށްވާތީކަމަށެވެ.
ޖާބިރު ވިދާޅުވީ މިމައްސަލަ ދައުލަތުގެ އެންމެހާ މުއައްސަސާތަކުގެ ސަމާލުކަމަށް ގެނެސް އަވަސް ހައްލެއް ގެނައުމަށް މިކުއްލި މައްސަލަ ހުށަހަޅުއްވާކަމަށެވެ.
ކުއްލި މައްސަލަ ބަލައިގަތުމަށް ނެގުނު ވޯޓުގައި 38 މެމްބަރުންގެ އިއްތިފާގުން ވަނީ މިމައްސަލަ ބަލައިގަނެ ބަހުސްކުރަން ފެންނަކަމަށް ވޯޓު ދެއްވާފައެވެ.
އެއާއެކު މިމައްސަލައާ ގުޅޭގޮތުން ވާހަކަދައްކަވަމުން ޖާބިރު ވިދާޅުވީ ރާއްޖެ ހަމަމަގަށް ގެނައުމަށް ފުލުހުންނަށް މިހާރުން މިހާރަށް ޓްރެއިންކޮށް ފިސްތޯލަ ދޭންޖެހޭކަމަށެވެ. އަދި ފުލުހަކު މަރާލުމަކީ ވަރަށް އާދައިގެ ކަމެއްގެ ގޮތުގައި ދެކޭކަމަށް ޖާބިރު ވިދާޅުވިއެވެ.
ޖާބިރު ވިދާޅުވީ ފުލުހުންގެ ތެރޭގައި ނޭއްގާނީ އަމަލުތައް ހިންގާ ފުލުހުންވެސް އުޅޭކަމަށެވެ. އަދި ސިޔާސީ ސަބަބުތަކަށްޓަކައި ފުލުހުންގެ މުއައްސަސާ ބޭނުންކުރުމުގެ ސަބަބުން ރައްޔިތުންގެ އިތުބާރު އެމުއައްސަސާއަށް ގެއްލިފައިވާކަމަށް ޖާބިރު ވިދާޅުވިއެވެ.
ކުއްލި މައްސަލައަށް ވާހަކަދައްކަވަމުން މެމްބަރުން ވަނީ މިމައްސަލައަށް ތާއީދުކުރައްވާ ވާހަކަދައްކަވާފައެވެ. ފުލުހުންގެ މުއައްސަސާގައި ހުރި މައްސަލަތައް ހައްލުކުރަންޖެހޭކަމަށާއި މުޖުތަމައުގައި ހަރަކާތްތެރިވާ ގޭންގުތަކުން ކުރަމުންދާ ކަންކަންވެސް ހުއްޓުވަންޖެހޭކަމަށް ވިދާޅުވިއެވެ.
