އުތުރު ކޮރެއާއިން މިނިވަންކުރި އެމެރިކާގެ ދަރިވަރު ކޯމާއެއްގައި އޮވެ މަރުވެއްޖެ

އުތުރު ކޮރެއާއިން ހައްޔަރުކޮށްގެން ގެންގުޅުނު އެމެރިކާގެ ޔުނިވާސިޓީ އޮފް ވާރޖީނިއާގެ ދަރިވަރު، އުމުރުން 22 އަހަރުގެ އޮޓޯ ވާމްބިއާ، ކޯމާއެއްގައި އޮވެ މަރުވެއްޖެއެވެ.

އުތުރު ކޮރެއާގައި 17 މަސްދުވަހު ހައްޔަރުކޮށްފައި ބެހެއްޓުަމަށްފަހު އޭނާ މިނިވަން ކުރީ ނިމިގެންދިޔަ ހަފްތާގެ ތެރޭގައެވެ.

ވާމްބިއާ ހައްޔަރުކުރީ ޓޫރިސްޓް ވިސާގައި އުތުރުކޮރެއާއަށް ދިޔަ ދިއުމެއްގައި، އުތުރު ކޮރެއާގެ ލީޑަރު، ކިމް ޖޮންގ އުންގެ ޕްރޮޕެގެންޑާ ފެތުރުމަށް ދަމާފައިހުރި ބެނާއެއް ވަގަށްނެގި މައްސަލާގައެވެ. މި ދައުވާއަށް އޭނާ އިއުތިރާފް ވުމާއެކު އޭނާގެ މައްޗަށް ވަނީ ބުރަ މަސައްކަތާއިއެކު 15 އަހަރުގެ ޖަލު ހުކުމެއް އިއްވާފައެވެ.

ވާމްބިއާ ބެލި ޑޮކްޓަރުން ބުނެފައިވަނީ އޭނާ ކޯމާއަކަށް ގޮސްފައިވަނީ ކޮށްފައިވާ އަނިޔާތަކުގެ ސަބަބުން ސިކުނޑިއަށް ލިބިފައިވާ ބޮޑެތި ގެއްލުންތަކާއި ގުޅިގެން ކަމަށެވެ.

ވާމްބިއާގެ އާއިލާއިން ޑޮކްޓަރުންނާ ހަވާލާދީ ނެރުނު ބަޔާނެއްގައި ބުނެފައިވަނީ، ހޯމަދުވަހުގެ މެންދުރު 2.20 ގައި އެމީހުންގެ ދަރިފުޅު މަރުވެފައިވާކަމަށެވެ.

އާއިލާއިން ނެރެފައިވާ ބަޔާނުގައި ބުނެފައިވަނީ، ވާމްބިއާއަށް އުތުރު ކޮރެއާއިން ދީފައިވަނީ ލާއިންސާނީ އަނިޔާތަކެއްކަމަށާއި، އެހެންކަމުން ޑޮކްޓަރުން ގެ މިންނެތް މަސައްކަތުންވެސް ދަރިފުޅު ރަނގަޅު ނުވާނެކަން ކުރިންވެސް އެނގޭކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްވަނީ އެ އާއިލާއަށް ތައުޒިއާ ދަންނަވާފައެވެ. އަދި އުތުރު ކޮރެއާގެ އަނިޔާވެރި ސަރުކާރަކީ އިންސާނީ އެއްވެސް ހައްގަކަށް އިހްތިރާމް ނުކުރާ ވެރިކަމެއްކަމަށް ރައީސް ޓްރަމްޕް ވަނީ ވިދާޅުވެފައެވެ.

ވާމްބިއާގެ އާއިލާއިން ބުނެފައިވާ ގޮތުގައި އެ އާއިލާއިން ބޭނުންވަނީ އުތުރުކޮރެއާގެ މި އަނިޔާވެރި އަމަލު މުޅި ދުނިޔެއަށް ހާމަކުރާށެވެ.

އެމެރިކާގެ އޮހާޔޯއަށް ނިސްބަތްވާ މި ދަރިވަރުގެ މަރާއި ގުޅިގެން އެ ސްޓޭޓްގެ އިސްވެރިން ގެންދަނީ އުތުރުކޮރެއާގެ ސަރުކާރަށް ވަރަށް ބޮޑަށް ފާޑުކިޔައި އެ އަމަލު ކުށްވެރިކުރަމުންނެވެ.