އެމްޓީސީސީގެ އައު ޑްރެޖަރު އިފްތިތާހުކޮށް ދާންދޫގެ ބިންހިއްކުމުގެ މަސައްކަތް ފެށުމުގެ ރަސްމިއްޔާތު ބާއްވައިފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ އައި ޑްރެޖަރު "ބޮޑު ޖައްރާފު" އިފްތިތާހުކޮށް ގއ. ދާންދޫ ބިން ހިއްކުމުގެ އަމަލީ މަސައްކަތް ފެށުމުގެ ރަސްމިއްޔާތު ބާއްވައިފިއެވެ.

އާދީއްތަ ދުވަހުގެ ރޭ ދާންދޫގައި ބޭއްވި ހާއްސަ ރަސްމިއްޔާތެއްގައި ބޮޑު ޖައްރާފާ އިފްތިތާހު ކުރެއްވީ، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް އާއި އެމްޓީސީސީގެ ސީއީއޯ އާދަމް އާޒިމް އެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު އަބްދުﷲ އާއި ދާންދޫ ކައުންސިލުގެ ރައިސް މުޙައްމަދު އާސިފްގެ އިތުރުން އެމްޓީސީސީގެ އިސްވެރިން ބައިވެރިވެލެއްވިއެވެ.

ދާންދޫގެ ބިން ހިއްކުމުގެ މަޝްރޫއުގެ މަސައްކަތް މިހާރުވެސް ކުރިއަށްދާއިރު މި މަސައްކަތް ނިމޭއިރު، މިހާރު ދާންދޫގައި އޮތްވަރުގެ ޖާގައިގެ ބިމެއް އެރަށަށް އިތުރު ކުރެވިގެންދާނެ ކަމަށް އެމްޓީސީސީން ބުނެއެވެ. އަދި އަލަށް ހިއްކާ ބިމާއި ދާންދުއާ ބްރިޖަކުން ގުޅާލުމަށް ވަނީ ހަމަޖެހިފައެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވީ މަޝްރޫއު ފެށުމުގެ ޖަލްސާ ބާއްވާއިރު ހިއްކަން ޖެހޭ ބިމުގެ 50 އިންސައްތަ މަސައްކަތް ނިމިފައިވާ ކަމަށެވެ. މިއިންވެސް އެނގެނީ މި ސަރުކާރުން މަޝްރޫއުތައް ކުރިއަށްގެންދިއުމުގައި ގެންގުޅޭ ސްޕީޑު ކަން އޭނާ ފާހަގަކުރެއްވިއެވެ.

އާޒިމް ވިދާޅުވީ މި އައު ބިން ވެގެންދާނީ ޒަމާނީ ދާންދޫގެ އާ ޙަޔާތެއްގެ ފެށުމަކަށް ކަމަށެވެ. އަދި މި މަޝްރޫއުގެ މަސައްކަތް ނިމިގެންދާއިރު، ރައްޔިތުން މޫދަށް އެރި، ހިތް އުފާކޮށްލާނެ އަތިރިމަތިތައް ލެވިގެންދާނެ ކަމަށް ވެސް އެ ކުންފުނިން ބުނެއެވެ.

ދާންދޫ ބިންހިއްކުމުގެ މަސައްކަތަށް އެމްޓީސީސީން ބޭނުންކުރާނީ އެ ކުންފުނީގެ ބޮޑު ޖައްރާފެވެ. މިއީ މި ޑްރެޖަރު ބޭނުންކޮށްގެން ހިންގޭ ތަރައްޤީގެ އެންމެ ފުރަތަމަ މަޝްރޫއެވެ. ބޮޑު ޖައްރާފު އެމްޓީސީސީގެ ފްލީޓްގައި ހިމެނުމާއެކު، އެމްޓީސީސީވަނީ މި ސަރަޙައްދުގައި ޑްރެޖިންގ ދާއިރާގެ އެންމެ ކުރީ ސަފުގައި ހިމެނޭ އެއް ކުންފުންޏަށް ވެފައެވެ.

ބޮޑު ޖައްރާފު ބޭނުންކޮށްގެން ހިންގޭ ދާންދޫ ބިން ހިއްކުމުގެ މަޝްރޫޢުގެ ދަށުން، 975،000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި ބިން ހިއްކުމާއި، 807 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 555 މީޓަރުގެ ސަރަޙައްދެއްގައި ގްރޮއިންސް ޖެހުމުގެ މަސައްކަތް ކުރާނެއެވެ.

މި މަޝްރޫއުގެ މަސައްކަތް ޕްލޭނިން މިނިސްޓްރީން އެމްޓީސީސީއާ ހަވާލުކޮށްފައިވަނީ 186.64 މިލިއަން ރުފިޔާ އަށެވެ.

ވޭތުވެދިޔަ 3 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ގިނަ މަޝްރޫޢުތަކެއް ނިންމާފައެވެ.