އަލިފާނުގެ ހާދިސާއެއް ހިނގާފައިވަނީ ގ. ޒަމާނީ މަންޒިލްގެ ކަރަންޓު ބޯޑެއްގައިކަމަށް އެމްއެންޑީއެފްއިން ބުނެފިއެވެ.
ގ. ޒަމާނީ މަންޒިލްގައި ރޯވެފައިވަނީ އާދިއްތަ ދުވަހުގެ މެންދުރު ފަހުގެ ވަގުތެއްގައެވެެ. މި އަލިފާންގަނޑު އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ވަނީ ވަރަށް އަވަހަށް ނިއްވާލާފައެވެ. އެމްއެންޑީއެފްއިން ބުނީ، މި ހާދިސާގެ ރިޕޯޓް ލިބިފައިވަނީ އާދިއްތަ ދުވަހުގެ 14:45ހާއިރު ކަމަށެވެ. އެއާއެކު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާއެކު، ފަޔަރމަނުން ގޮސް އަލިފާން ނިއްވުމަށް ކުރި މަސައްކަތުން، ރޯވެފައިހުރި އަލިފާން ނިއްވާލާފައިވަނީ އާދިއްތަ ދުވަހުގެ 15:13ހާއިރު ކަމަށްވެސް އެމްއެންޑީއެފްއިން ވަނީ ބުނެފައެވެ.
އެމްއެންޑީއެފްއިން ބުނީ، މިހާތަނަށް ބެލި ބެލުމުން އެ އިމާރާތުގެ 4 ވަނަ ފަންގިފިލާއިން 3 ވަނަ ފަންގިފިލާއަށް ގުޅާފައިހުރި އިލެކްޓްރިކް ކޭބަލްތަކަކާއި، އެ ކޭބަލްތައް ގުޅާފައިހުރި އިލެކްޓްރިކް ސަރކިޓް ބޯޑެއްގައި ރޯވެގެން ހިނގި ހާދިސާއެއްކަމަށް ބެލެވޭކަމަށެވެ. މި އަލިފާނުގެ ހާދިސާގައި އެ ކޭބަލްތަކާއި އިލެކްޓްރިކް ސަރކެޓް ބޯޑަށާއި އަދި އިމާރާތަށް އެކިވަރުގެ ގެއްލުންވުން ފިޔަވައި އެއްވެސް މީހަކަށް ގެއްލުމެއް ލިބިފައި ނުވާކަމަށްވެސް އެމްއެންޑީއެފްއިން ބުނެއެވެ.
އެ ހާދިސާ ހިނގުމުން އެ ސަރަހައްދުގައި ސްޓެލްކޯއާއި ފުލުހުންވެސް ވަނީ ހަރަކާތްތެރިވެފައެވެ. އަދި އަލިފާނުގެ ހާދިސާ ހިނގި ގޭގެ އެންމެން ބޭރަށް ނެރެ، އެ ގެ ވަނީ ހުސްކޮށްފައެވެ. ރޯވި އަލިފާންގަނޑު ކޮންޓްރޯލްވިފަހުންވެސް އެ ސަރަހައްދުން ދުމުގެ އަސަރު ކޮންމެވެސް ވަރަކަށް ފެންނަން ހުއްޓެވެ.
