ރާނީ އެލިޒަބަތު ދެވަނައަށް އެންމެ ފަހުގެ އިހުތިރާމް އަދާކުރުމަށް ދިޔަ އާއްމުންގެ މީހަކު ރާނީގެ ސަންދޯއްޕުޅު އުފުއްލަން މަސައްކަތްކުރުމުން އެ ގައުމުގެ ފުލުހުން އޭނާ ހައްޔަރުކޮށްފިއެވެ.

މީޑިއާ ރިޕޯޓްތައް ބުނާގޮތުން މި އަމަލު ވެގެންދިޔައީ ރާނީ އެލިޒަބަތު ދެވަނައަށް އެންމެ ފަހުގެ އިހުތިރާމް އަދާކުރުމަށް ކިއުގައި ތިބި އެތައް ހާސް ބަޔަކަށް ސިހުން ގެނުވި އަމަލަކަށެވެ. މި ހާދިސާ ހިނގާފައި ވަނީ ހުކުރުު ދުވަހު ހެނދުނުގެ ވަގުތުގައެވެ. ހައްޔަރުކުރި މީހާ ސަންދޯކާ ހަމައަށް އައީ ކިއުގައި ތިބި ބައެއް މީހުން ކޮއްޕާލުމަށްފަހުއެވެ. ކޮއްޕާލި މީހުންގެ ތެރޭގައި 7 އަހަރުގެ ކުޑަ އަންހެން ކުއްޖަކުވެސް ހިމެނެއެވެ. ފުލުހުންގެ އޮފިސަރުން ވަނީ އޭނަ ވަގުތުން ހައްޔަރުކޮށްފައެވެ.

ރާނީގެ ހަށިކޮޅު ބާއްވާފައިވާ ވެސްޓްމިންސްޓަރއަށް ވަނުމަށްޓަކައި އެތައް ލައްކަބަޔަކު، ކިޔުތަކުގައި އެތައް ގަޑިއިރެއް އަންނަނީ ހޭދަކުރަމުންނެވެ. ރާނީގެ ޖަނާޒާ ބާއްވަން ހަމަޖެހިފައި ވަނީ މިމަހުގެ 19 ވަނަ ދުވަހުއެވެ. ރާނީއަށް އިހުތިރާމް އަދާކުރުމަށް ދާ މީހުންގެ ކިޔުތައް 14 ކިލޯމީޓަރަށް ދަމާލާފައިވާއިރު، ހުކުރު ދުވަހު އެތައް ފަހަރަކު ވަނީ ކިޔު ދިގުވެގެން އިތުރަށް ކިޔުއަށް މީހުން ނާރުވައި، ބަންދުކޮށްފައެވެ. ރާނީ އެލިޒަބަތު 2 ވަނައިގެ ޖަނާޒާއަކީ މިހާތަނަށް އެގައުމުގައި ބާއްވާ އެންމެ ބޮޑު އިވެންޓަށް ވާނެކަމަށް އިނގިރޭސިވިލާތުގެ އޮފިޝަލުން ވަނީ މީގެ ކުރިން ބުނެފައެވެ.

މި މަހުގެ 6 ވަނަ ދުވަހު އިނގިރޭސި ވިލާތުގެ ރާނީ އެލިޒަބަތު އަވަހާރަވިއިރު އެކަމަނާގެ އުމުރުފުޅަކީ 96 އަހަރެވެ. އެކަމަނާ ވަނީ 70 އަހަރަށްވުރެ ގިނަ ދުވަހު އިނގިރޭސިވިލާތުގެ ރަނިކަން ކުރައްވާފައެވެ.