ރާއްޖެއިން މޮރިޝަސްއަށް ގަނޑުކުރި މަސް ނުވަތަ ފިނިކުރި މަސް އެކްސްޕޯޓްކުރަން ފަށައިފިއެވެ.
އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވިދާޅުވީ މޮރިޝަސްއަށް ފިނިކުރި މަސް ހިފައިގެން ފުރާފައިވަނީ އެސްޓީއޯގެ އަމިއްލަ ބޯޓެއްގައި ކަމަށެވެ. އެ ބޯޓު ފުރާފައި ވަނީ ބުރާސްފަތި ދުވަހުގެ ރޭ ކަމަށް ވެސް އަމްރު ވިދާޅުވިއެވެ. އަމްރު ވިދާޅުވީ އެ ބޯޓުގައި 2000 ޓަނުގެ ފިނިކުރި މަސް ގެންގޮސްފައިވާ ކަަމަށެވެ. އަދި އޭގެ ތެރެއިން 500 ޓަނު މަހަކީ މިފްކޯގެ ފަރާތުން މޮރިޝަސްގައި މަސްދަޅު ބަންދުކުރުމަށް ފަހު ޔޫރަޕަށް އެކްސްޕޯޓްކުރާނެ މަސްކަމަށް ވެސް އޭނާ ވިދާޅުވިއެވެ.
މީގެ ކުރިން ރާއްޖެއިން ގަނޑުކުރި މަސް ނުވަތަ ފިނިކުރި މަސް އެކްސްޕޯޓްކުރަމުން އައީ ތައިލެންޑަށެވެ. މޮރިޝަސްއަށް ފިނިކުރި މަސް ގެންދަން ފެށުމަކީ މިފްކޯއަށް ފައިދާވާނެ ކަމެއް ކަަމަށް އެކުންފުނިން ވަނީ ބުނެފައެވެ. މިފްކޯއަކީ އެސްޓީއޯގެ ސަބްސިޑަރީ ކުންފުންޏެކެވެ.
