ގޯތި ދޭއިރު، މާލޭ މީހުންގެ ގޮތުގައި ބަލާ މިންގަނޑަށް ލުޔެއް
މަންމަ ނުވަތަ ބައްޕައަކީ މާލޭ މީހެއް ކަމުގައި ވާނަމަ، އަދި އެ މީހަކު މިހާރު އަނެއްކާވެސް މާލޭގައި ރަޖިސްޓްރީވެފައިވާ މީހެއްކަމުގައި ވާނަމަ އެ މީހަކީ މާލޭ މީހެއްކަމަށް ބެލެވޭނެ
ޕްލޭނިންގ މިނިސްޓަރ އަސްލަމް
މާލޭ ރައްޔިތުންނަށް ގޯތި ދިނުމުގެގޮތުން ކުރިއަށް ގެންދާ ބިންވެރިޔާ ސްކީމްގެ ދަށުން، މާލޭ މީހުންގެ ގޮތުގައި ބަލާ މިންގަނޑަށް ލުޔެއްދީފިއެވެ.
ސަރުކާރުން އެކަން ހާމަކޮށްފައިވަނީ ބުރާސްފަތި ދުވަހުއެވެ. ކުރިން އުސޫލު އެކުލަވާލާފައިވާގޮތުން, ހުޅުމާލެއާއި ގުޅީފަޅުން ގޯތިދޫކުރުމަށް ހިންގާ ބިންވެރިޔާ ސްކީމްގެ ދަށުން ގޯތި ދޭއިރު، މާލޭ މީހުންގެ ގޮތުގައި ބެލެވޭނީ އެއްވެސް އިރެއްގައި މާލެ ފިޔަވައި އެހެން ތަނެއްގައި ރަޖިސްޓްރީވެފައިނުވާ މީހުން އެކަންޏެވެ. އެހެންނަމަވެސް ބުރާސްފަތި ދުވަހު އެ އުސޫލަށް ގެނެސްފައިވާ އިސްލާހުގައި ބުނާގޮތުން، ސަރުކާރުން ކަނޑައެޅި އުސޫލެއް ނުވަތަ ގަވާއިދެއްގެ ސަބަބުން ކުރިން އެހެން ތަނެއްގައި ރެޖިސްޓްރީވެފައި އޮތްނަމަވެސް، އެ މީހެއްގެ މަންމަ ނުވަތަ ބައްޕައަކީ މާލޭ މީހެއް ކަމުގައި ވާނަމަ، އަދި އެ މީހަކު މިހާރު އަނެއްކާވެސް މާލޭގައި ރަޖިސްޓްރީވެފައިވާ މީހެއްކަމުގައި ވާނަމަ އެ މީހަކީ މާލޭ މީހެއް ކަމަށް ބެލެވޭނެއެވެ.
ބިންވެރިޔާ ސްކީމްގެ ދަށުން ގޯއްޗަށް އެދި ކުރިމަތިލުމުގެ ފުރުސަތު ހަމަވާނީ މިމަހުގެ 26 ވަނަ ދުވަހުއެވެ. ސަރުކާރުން ވަނީ މާލޭ މީހުންނަށް ގޯތި ދިނުމުގެ އިތުރުން މާލޭ މީހުންނަށް ފްލެޓް ދިނުމަށް ޚާއްސަ ސްކީމެއް ވަނީ އިއުލާންކޮށްފައެވެ. އެ ސްކީމްގެ ދަށުން 4000 ފްލެޓް ދޫކުރާނެއެވެ.
