ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަގާމަށް މީހަކު އައްޔަނުކުރުމަށްޓަކައި އެމަގާމަށް ކުރިމަތިލުމަށް އެދޭފަރާތްތަކަށް ފުރުސަތު ހުޅުވާލައިފިއެވެ.

އެކަމާއި ގުޅިގެން ރައްޔިތުންގެ މަޖިލީހުގެ އިދާރާއިން ބުނީ އެންމެ ދަށްވެގެން ސަލާމަތީ ޚިދުމަތްތަކުގެ ކޮމިޝަންޑް އޮފިސަރެއްގެ މަޤާމަށް ޝަރުޠު ފުރިހަމަވާ އުމުރުން 25 އަހަރު ވެފައިވާ މީހުންނަށް އެމަގާމަށް ކުރިމަތިލެވޭނެކަމަށެވެ. މީގެއިތުރުން މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކު ކަމުގައިވާންވާނެކަމަށާއި އެމީހަކީ ބުއްދި ސަލާމަތުން ހުރި ދިވެހި ރައްޔިތަކަށް ވާންވާނެކަމަށެވެ. ޝަރުތު ފުރިހަމަވާ ފަރާތްތަކުން 28 ސެޕްޓެމްބަރ ވާ ބުދަ ދުވަހުގެ މެންދުރު 12 ގެ ކުރިން ރައްޔިތުންގެ މަޖިލީހުގެ އިދާރާއަށް ހުށަހެޅުމަށް ވަނީ އެދިފައެވެ.

މަޤާމުގެ މަސްއޫލިއްޔަތުތައް:

މިމަގާމުގެ މަސްއޫލިއްޔަތުތަކުގެ ތެރޭގައި ހިމެނެނީ ރައްޔިތުންގެ މަޖިލީހުގެ ގަވާއިދުގެ 23 ވަނަ މާއްދާގެ ދަށުން އަންނަނިވި ކަންކަމަކީ ސާޖަންޓް އެޓް އާމްސްގެ މަސްއޫލިއްޔަތުގެ ތެރޭގައި ހިމެނޭ ކަންކަމެވެ.

އެއީ:

- މަޖިލީހުގެ ޖަލްސާތައް ހިނގަމުންދާ ވަގުތުތަކުގައި، މަޖިލީހުގެ ރައީސް އަންގާ ގޮތެއްގެމަތިން މަޖިލީހުގެ ގަވާއިދު ހިފެހެއްޓުމުގެ ޒިންމާ އުފުލުން.

- މަޖިލީހުގެ ރައީސް ކުރާ އަމުރުތަކާއި މަޖިލީހުން ކުރާ އަމުރުތައް ތަންފީޒުކުރުން.

- މަޖިލީހުގެ އިމްތިޔާޒާގުޅޭ އުސޫލުތައް ތަންފީޒުކުރުމުގައި ދިމާވާ ކަންކަން ފާހަގަކޮށް، ޢާންމު ކޮމިޓީގެ ސަމާލުކަމަށް ގެނައުން. އަދި އޭނާގެ މުވައްޒަފުންގެ ޢަމަލުތަކާ ގުޅޭގޮތުން ޢާންމު ކޮމިޓީއަށް ޖަވާބުދާރީވުން.

- މަޖިލީހުގެ ގެލެރީތަކަށް މީހުން ވަންނަނީ މަޖިލީހުގެ ގަވާއިދާ އެއްގޮތަށްކަން ކަށަވަރުކުރުމާއި ގެލެރީތަކުން ނެރެންޖެހޭ މީހުން ގަވާއިދާ އެއްގޮތްވާ ގޮތުގެމަތިން ނެރުމުގެ ޒިންމާ އުފުލުން.

- މަޖިލީހުގެ ޖަލްސާގައި ހާޒިރުވެ އިނުމަށް ހުއްދައޮތް މީހަކު ފިޔަވައި، އެނޫން މީހަކު ޖަލްސާއެއް ހިނގަމުންދާ ވަގުތު، މަޖިލިސްކުރާ މާލަމުގައި ނުބެހެއްޓުން.

- މަޖިލީހުގެ ގެއަށް އަންނަ މެހެމާނުންނާއި މަޖިލީހުގެ ކޮމިޓީތައް ހިނގަމުންދާ ވަގުތުތަކުގައި ކޮމިޓީއަކަށް އަންނަ މެހެމާނުންނާއި ނޫސްވެރިން މަޖިލީހުގެ ނިޒާމާ ޚިލާފު އެއްވެސްކަމެއް ހިންގައިފިނަމަ، އެކަމެއް ޢާންމު ކޮމިޓީގެ ސަމާލުކަމަށް ގެނައުން.

ރައްޔިތުންގެ މަޖިލީހުގެ ގަވާއިދު ގެ 18 ވަނަ މާ އްދާގެ (ށ) ގެ ދަށުން، ސާޖަންޓް އެޓް އާމްސްގެ މަޤާމަށް ޝަރުޠު ފުރިހަމަވާ މީހުންގެ ނަންތައް، މަޖިލީހުގެ ރައީސް މަޖިލީހަށް ހުށަހަޅަންޖެހެއެވެ. އަދި އެ މާއްދާގެ ދަށުން، އެ މަޤާމަށް ޢައްޔަންކުރާނީ މަޖިލީހުގެ ޖަލްސާއަށް ހާޒިރުވެ ވޯޓުގައި ބައިވެރިވާ މެންބަރުންގެ އަޣްލަބިއްޔަތުން ފާސްވާ މީހެކެވެ.

މިމަގާމަށް ހޮވޭ މީހެއްގެ މުސާރައިގެ ގޮތުގައި ކަނޑައަޅާފައިވަނީ އަސާސީ މުސާރައިގެ ގޮތުގައި 32،000 ރުފިޔާ އާއި ލިވިންގ އެލަވަންސްގެ ގޮތުގައި ހަތަރު ހާސް ރުފިޔާ އާއި ފޯނު އެލަވަންސްގެ ގޮތުގައި އެއް ހާސް ރުފިޔާ އާއި ޕާލިމަންޓަރީ ސަރވިސް އެލަވަންސްގެ ގޮތުގައި ހަހާސް ހަތަރު ސަތޭކަ ރުފިޔާއެވެ. ޖުމްލަ 43،400 ރުފިޔާއެވެ.

ސާޖެންޓް އެޓް އާމްސްގެ މަގާމު އުފައްދާފައިވަނީ އޮކްޓޫބަރު 31، 2013 ގައެވެ. އޭގެފަހުން މިދިޔަ މަހާ ހަމައަށް ވެސް އެ މަގާމުގައި ހުންނެވީ މުހައްމަދު ހަލީމެވެ. ނަމަވެސް މަޖިލީހުގެ އާއްމު ކޮމިޓީން ބަލަމުން ދިޔަ މައްސަލައަކާ ގުޅިގެން ދޮޅު އަހަރު ސަސްޕެންޝަނުގައި ބެހެއްޓުމަށްފަހު ހަލީމު ވަނީ މަގާމުން ވަކިކޮށްފައެވެ.