ނިމާ އީގަލްސްއާ ދުރަށް!

ކުޅުންތެރިއެއްގެ ގޮތުގައާއި, ކޯޗެއްގެ ގޮތުގައި އީގަލްސްގައި ކެރިއަރު ހޭދަކުރަމުން އައި އަހުމަދު ނިމާދު (ނިމާ) އީގަލްސްއާ ދުރަށް ޖެހިލައިފިއެވެ.

ކުޅުންތެރިއެއްގެ ގޮތުގައި އެންމެ އަހަރަކު ފިޔަވައި އީގަލްސްއަށް ކުޅެ, ކުޅުން ހުއްޓާލުމަށްފަހު އީގަލްސްގެ ކޯޗިން ޓީމްގައި މަސައްކަތްކުރަމުން އައި ނިމާ އީގަލްސްއާ ދުރަށް ޖެހިލީ މިދިޔަ ސީޒަންގެ ދިވެހި ޕްރިމިއަރ ލީގުގެ ތެރެއިންނެވެ. ނިމާ ބުނީ ކުރިއަށް އޮތް ސީޒަންގައި އޭނާ އީގަލްސްއިން ފެނުމަކީ ދުރުކަމެއް ކަމަށެވެ. އީގަލްސްއާއެކު ގިނަ މަސައްކަތްތަކެއް ކުރެވި, އީގަލްސްގެ ފެންވަރުން ހޯދި ކާމިޔާބީތަކުގައިވެސް ހިއްސާވެވިއްޖެކަމަށް ނިމާ ބުންޏެވެ. ފުރަތަމަ ޑިވިޝަނާއި, ދެވަނަ ޑިވިޝަނުންވެސް ހުށަހެޅުންތަކެއް ލިބިފައިވާކަމަށާއި, މިހާރު ބޭނުންވަނީ އެހެން ޓީމަކާއެކު ތަޖުރިބާއެއް ކުރަންކަމަށް ނިމާ ބުންޏެވެ.

މިދިޔަ ސީޒަންގައި ދިވެހި ޕްރިމިއަރ އީގަލްސްއިން ފެށީ އެސިސްޓެންޓް ކޯޗެއްގެ ގޮތުގައި ހުރެ އީގަލްސްގެ ހެޑް ކޯޗުގެ ޒިންމާ ނަގަމުންނެވެ. ލީގުގެ ފުރަތަމަ ބުރު އީގަލްސް ކުޅުނީ ނިމާގެ އިރުޝާދުގެ ދަށުންނެވެ. ދެވަނަ ބުރުގެވެސް ބޮޑުބައިގައި ޓީމަށް އިރުޝާދުދިނީ ނިމާއެވެ. އެމުއްދަތުގައި އީގަލްސްގެ ފުރަތަމަ ޑިވިޝަންގެ ހަޔާތުގައިވެސް ވިދިވިދިގެން އެންމެ ގިނަ މެޗުން މޮޅުވުމުގެ ރެކޯޑެއް ހެދިއެވެ. ނިމާއާއެކު އީގަލްސްއިން ހޯދި ރަނގަޅު ނަތީޖާތަކާއެކު އެއްވަނާގައި އޮތް މާޒިޔާއާ ދެމެދު އޮތީ ފަސް ޕޮއިންޓްގެ ފަރަޤެކެވެ. ލީގުގެ ދެވަނަ ބުރުގައި މާޒިޔާ ބަލިކުރިއެވެ. ލީގުގައި މާޒިޔާ ބަލިކުރި ހަމައެކަނި ޓީމަކީވެސް އީގަލްސްއެވެ. އެކަމަކު ދެވަނަ ބުރުގެ ފަހު ހަތަރު މެޗާ ހަމައިން ނިމާ އީގަލްސްއާ ދުރަށް ޖެހިލީ ނުތަނަވަސްކަމަކާއެކުއެވެ. އެހިސާބުން އީގަލްސްގެ ކޯޗަކީ މުޙައްމަދު އާތިފްއެވެ. އާތީއާއެކު އީގަލްސްގެ ނަތީޖާތަށް ދަށްވިއެވެ. އެކަމަކު ނިމާ ޤަބޫލުކުރާ ގޮތުގައި އެއީ ކޯޗުގެ ސަބަބުން ވީގޮތެއް ނޫނެވެ. އެހެން ގިނަ މައްސަލަތަކެއް އެކުވެ ނަތީޖާތަކަށް އަސަރުކުރީކަމަށް ނިމާ ބުންޏެވެ.

ނިމާއާއެކު އީގަލްސްއިން ވަނީ ޔޫތު މުބާރާތްތަކުގައިވެސް ކާމިޔާބީތައް ހޯދާފައެވެ. އީގަލްސް އަޑިއަޅާލާ ކޮންމެ ވަގުތެއްގައި ޓީމް ކޮޅަށް ޖެހުމުގައި ކޯޗެއްގެ ގޮތުން އިސްނަގަނީ ނިމާއެވެ. 1998 ވަނަ އަހަރު ކުޅުންތެރިއެއްގެ ގޮތުގައި ނިމާ ފެށި ދަތުރުގައި އެއް އަހަރު ފިޔަވައި ހޭދަކުރީ އެކްލަބްގައެވެ. ކުޅުން ހުއްޓާލުމަށްފަހުވެސް ނިމާ ހުރީ އީގަލްސްގެ މީހެއްގެ ގޮތުގައެވެ.