ރަޝިއާގެ ބާރުގެ ދަށުގައި އޮތް ބޮޑު ސަރަހައްދެއް ޔޫކްރެއިނުން ހިފައިފި
6،000 ސްކޮއަރ ކިލޯމީޓަރުގެ ސަރަހައްދެއް ޔޫކްރެއިނުން ވަނީ ހިފާފައި
ރަޝިއާއިން މިސައިލް ހަމަލާދީފައިވާ ސަރަހައްދެއް
ރަޝިއާގެ ބާރުގެ ދަށަށް ގެންގޮސްފައި އޮތް ބޮޑު ސަރަހައްދެއް ޔޫކްރެއިނުން ހިފާފައިވާކަމަށް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ.
ޒެލެންސްކީ މިފަދައިން ވިދާޅުވީ ހަނގުރާމައާ ގުޅޭގޮތުން ހޯމަ ދުވަހު ދެއްވި ވީޑިއޯ ބަޔާނެއްގައެވެ. ޒެލެންސްކީ ވިދާޅުވީ މި މަސް ފެށުނީއްސުރެ ޔޫކްރެއިނުން ބަދަލުގައި ދެމުންދާ ހަމަލާތަކުގެ ސަބަބުން މިހާތަނަށް އައިއިރު އެގައުމުގެ 6،000 ސްކޮއަރ ކިލޯމީޓަރުގެ ސަރަހައްދެއް ހިފާފައިވާކަމަށެވެ.
ރަޝިއާއާ ޔޫކްރެއިނާ ދެމެދުގައި އަދިވެސް ހަނގުރާމަ ކުރިއަށްދާއިރު ރަޝިއާއިން ހިފާފައިވާ ޔޫކްރެރިންގެ ބައެއް ސަރަހައްދުތަކުން ރަޝިއާ ސިފައިން ވަނީ ފައިބާފައެވެ. އެހެންނަމަވެސް ރަޝިއާ ސިފައިން އަދިވެސް ދަނީ ޔޫކްރެއިންގެ އެކި ސަރަހައްދުތަކަށް ހަމަލާދެމުންނެވެ. މީގެ ތެރޭގައި އާންމުންނަށް އަމާޒުކޮށް އެކި އިމާރާތްތަކަށާއި، ހޮސްޕިޓަލުތަކަށާއި، ސްކޫލް އަދި މިނޫންވެސް ގިނަ ތަންތަނަކަށް ރަޝިއާއިން ދަނީ ހަމަލާދެމުންނެވެ.
ހޯމަ ދުވަހު ރަޝިއާއިން ދިން ހަމަލާތަކުގެ ސަބަބުން ޔޫކްރެއިންގެ ބޮޑު ސަރަހައްދަކުން ކަރަންޓު ކެނޑި، ފެނުގެ ޚިދުމަތްވެސް ވަނީ މެދުކެނޑިފައެވެ. އަދި މި ހަމަލާތަކުގައި ޔޫކްރެއިންގެ ރައްޔިތަކު މަރުވެފައިވާކަމަށް ވަނީ ރިޕޯޓުކޮށްފައެވެ.
