އަންޗެލޮޓީ ވަލްވާޑޭ ސިފަކުރީ މުސްތަގުބަލުގައި ރެއާލްގެ ލީޑަރުގެ ގޮތުގައި
ވާޑޭ އަންނަނީ މޮޅު ކުޅުމެއް ދައްކަމުން ކަމަށާއި، ގިނަ ކަންކަން އޭނާގެ ފަރާތުން ފެންނަނީ ރަނގަޅަށް ކަމަށް
ފެޑެރިކޯ ވަލްވާޑޭ އަދި ކޯޗު އަންޗެލޮޓީ
ސްޕެއިންގެ ރެއާލް މެޑްރިޑަށް ކުޅެމުން އަންނަ އުރުގުއާއީގެ ސެންޓަ މިޑްފީލްޑަރު ފެޑެރިކޯ ވަލްވާޑޭ އަކީ މުސްތަގުބަލުގައި އެ ޓީމުގެ ލީޑަރަކަށްވާނެ ކަަމަށް ކާލޯ އަންޗެލޮޓީ ބުނެފިއެވެ.
ރެއާލްގެ ކޯޗު އަންޗެލޮޓީ މިހެން ބުނީ ސްޕެނިޝް ލީގުގައި ރެއާލުން މަޔޯކާއާ ދެކޮޅަށް ކުޅުނު މެޗުގައި ވަލްވާޑޭގެ ފަރާތުން ފެނުނު ކުޅުމާ ގުޅޭ ގޮތުން ވާހަކަ ދައްކަމުންނެވެ. މެޗުގައި ވަލްވާޑޭ ލަނޑެއް ޖެހިއިރު، އޭނާ ވަނީ މޮޅު ކުޅުމެއް ދައްކާފައެވެ. މެޗުން މޮޅުވެ ރެއާލް ވަނީ ލީގު ތާވަލްގެ އެއް ވަނަ މަގާމަށް ޖެހިލައިފައެވެ.
މެޗަށްފަހު ވާހަކަ ދައްކަމުން އޭނާ ބުނީ ވަލްވާޑޭއަކީ ލީޑަރެއް ކަމަށާއި، އޭނާ އަކީ ރެއާލަށް ވަރަށް ވަރަށް މުހިންމު ކުޅުންތެރިޔެއް ކަމަށެވެ. މީގެ އިތުރުން އަންޗެލޮޓީ ބުނީ ރެއާލްގައި ވަލްވާޑޭ އަންނަނީ މޮޅު ކުޅުމެއް ދައްކަމުން ކަމަށާއި، ގިނަ ކަންކަން އޭނާގެ ފަރާތުން ފެންނަނީ ރަނގަޅަށް ކަމަށެވެ. އެހެންކަމުން އޭނާ އަކީ ރެއާލްގެ މުސްތަގުބަލުގައި ލީޑަރަކަށް ވާނެ ކަމަށް ވެސް އަންޗެލޮޓީ ބުންޏެވެ.
ވަލްވާޑޭ ވަނީ މިހާތަނަށް ރެއާލަށް 155 މެޗު ކުޅެދީފައެވެ. އަދި އޭނާ ވަނީ އެ ޓީމަށް އަށް ލަނޑު ޖަހައިދީފައެވެ. މީގެ އިތުރުން ވެސް ވަލްވާޑޭ ވަނީ ރެއާލާއެކު ގިނަ ކާމިޔާބީތަކެއް ހޯދާފައެވެ.
