6 މޭއިގައި ރައީސް ނަޝީދަށް ދިން ހަމަލާގެ ސަބަބުން ބުރަ ބޮޑުވީ ރައްޔިތުންގެ ޖީބަށް: މާރިޔާ
ހަމަލާތަކުގެ ސަބަބުން ސަލާމަތާއި ރައްކާތެރިކަމަށްޓަކާ ކުރަން ޖެހޭ ޚަރަދު އިތުރުވެގެންދޭ: މާރިޔާ
ވިއަވަތި ރާއްޖެ މަހާސިންތާގެ ތެރެއިން
މިދިޔަ އަހަރުގެ މޭއި މަހުގެ 6ގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާގެ ސަބަބުން ބުރަ ބޮޑުވީ ރައްޔިތުންގެ ޖީބަށް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
މިހާރު ކުރިއަށްދާ ވިއަވަތި މަހާސިންތާގެ ތެރެއިން "ރާއްޖެ އެމްވީ" އަށް ދެއްވި ބަސްތީގަތުމެއްގައި މާރިޔާ ވިދާޅުވީ އެފަދަ ހަމަލާތަކުގެ ސަބަބުން ސަލާމަތާއި ރައްކާތެރިކަމަށްޓަކާ ކުރަން ޖެހޭ ޚަރަދު އިތުރުވެގެންދާ ކަމަށެވެ. އަދި ދައުލަތުގެ އިސް މުއައްސަސާތަކުގެ އިސް ފަރާތްތަކުގެ ސަލާމަތާއި ރައްކާތެރިކަމަށްޓަކާ ކުރަން ޖެހޭ މަސައްކަތް ވެސް އެފަދަ ހަމަލާތަކުގެ ސަބަބުން އިތުރުވެގެންދާކަން މިނިސްޓަރު ފާހަގަކުރެއްވިއެވެ. ހަރުކަށިފިކުރުގެ މައްސަލަ އަކީ ރާއްޖެއަށް ދިމާވެފައިވާ އެންމެ ސީރިއަސް އެއް މައްސަލަަކަން ފާހަގަކުރައްވާ މިނިސްޓަރު ވަނީ އެފަދަ ކަންކަން އެންމެ ފަސޭހައިން ދެނެގަނެވޭނީ ކައިރީގައި އުޅޭ ފަރާތްތަކަށް ކަމަށް ވިދާޅުވެފައެވެ. އެފަދަ އަމަލަކަށް ހުށަހެޅިދާނެ ކަމަށް ބެލެވޭ ހިސާބުން ފެށިގެން ކަމާއި ބެހޭ ފަރާތްތަކުގެ ސަމާލުކަމަށް އެކަން ގެނެސް، އެ ފަދަ މީހުންނަށް ދީނީ ގޮތުންނާއި އެހެން ގޮތްގޮތުން ދޭން ޖެހޭ ރަނގަޅު މައުލޫމަތު ފޯރުކޮށްދިނުމަކީ މުހިންމު ކަމެއް ކަން މިނިސްޓަރު ފާހަގަކުރެއްވިއެވެ.
ރާއްޖޭގެ ސަލާމަތާއި ރައްކާތެރިކަމާއި ގުޅޭ ގޮތުން "ރާއްޖެ އެމްވީ" އަށް ޗީފް އޮފް ޑިފެންސް މޭޖަރ ޖެނެރަލް ޢަބްދުﷲ ޝަމާލް ވިދާޅުވީ ހަރުކަށިފިކުރުގެ ސަބަބުން ހިނގާ މައްސަލަތަކާއި ގުޅިގެން ގައުމީ ދިފާއީ ބާރުން އަދާކުރަނީ ރެސްޕޯންސިވް ދައުރެއްކަމަށެވެ. އެފަދަ ހަމަލާއެއް ދީފި ހާލަތެއްގައި އެކަމަށް އިޖާބަ ދިނުމަށް ވާންޖެހޭ ތައްޔާރީތައް ވަމުންދާ ކަމަށް ޝަމާލް ވިދާޅުވިއެވެ. މީގެ އިތުރުން ފަންނީ ގާބިލް މީހުން އިތުރު ކުރުމަށް ދިފާއީ ބާރުގެ ތެރެއިން ވެސް މަސައްކަތްތަކެއް ކުރަމުންދާ ކަން އޭނާ ވަނީ ވިދާޅުވެފައެވެ.
ޝަމާލް ވަނީ ރާއްޖޭގެ އެކި ހިސާބުތަކުގައި އެމްއެންޑީއެފް އިން ދެމުންދާ ޚިދުމަތްތައް ފުޅާކޮށް، ހަރުދަނާކުރުމަށް ވެސް މަސައްކަތްކުރައްވަމުންދާކަމަށް ވިދާޅުވެފައެވެ. އެގޮތުން ދިފާއީ ބާރުގެ ސަރަހައްދީ ބާރުވެރިކަން އިތުރުކުރުމަށް އިސްކަން ދެއްވާ ކަމަށް ޝަމާލް ވަނީ ވިދާޅުވެފައެވެ.
