ޕާކިސްތާނުގެ ޚާއްސަ ކޯޓަކުން، އެގައުމުގެ ބޮޑުވަޒީރު ޝަހްބާޒް ޝަރީފްގެ ދަރިކަލުން ސުލައިމާން ޝަހްބާޒްގެ 13 އެކައުންޓެއް ފްރީޒްކޮށްފިއެވެ.
ސުލައިމާންއަކީ ޝަހްބާޒްގެ އެންމެ ހަގު ދަރިކަލުންނެވެ. އޭނާގެ އެކައުންޓްތައް ފްރީޒްކޮށްފައި މިވަނީ މިހާރު ބަލަމުންދާ މަނީ ލޯންޑަރިންގގެ މައްސަލައަކާ ގުޅިގެންނެވެ.
މީޑިއާ ރިޕޯޓުތައް ބުނާގޮތުން ސުލައިމާންގެ އެކައުންޓްތައް ފްރީޒްކުރަން އަމުރުކޮށްފައިވާ ކޯޓަކީ ޕާކިސްތާނުގެ ފެޑަރަލް އިންވެސްޓިގޭޝަން އެޖެންސީގެ ޚާއްސަ ކޯޓެކެވެ. އަދި މި އަމުރު އެކޯޓުން ނެރެފައިވަނީ މިމަހުގެ ހަތްވަނަ ދުވަހު ކަމަށް ރިޕޯޓުތައް ބުނެއެވެ.
މިމައްސަލަ ބަލަމުންދާ އޮފިސަރުން ވަނީ ސުލައިމާންގެ 13 އެކައުންޓެއްގެ މައުލޫމާތު ކޯޓަށް ހުށަހަޅާފައެވެ.
މި މައްސަލައިގައި ސުލައިމާންގެ އިތުރުން ޝަހްބާޒް ޝަރީފްއާއި ހަމްޒާ ޝަރީފްގެ މައްޗަށްވެސް ޕާކިސްތާންގެ ފެޑަރަލް އިންވެސްޓިގޭޝަން އެޖެންސީން ވަނީ ތުހުތުކޮށްފައެވެ.
2019 ވަނަ އަހަރުން ފެށިގެން ސުލައިމާން ދިރިއުޅެމުންދަނީ އިނގިރޭސިވިލާތުގައިކަމަށް ރިޕޯޓުތައް ބުނެއެވެ.
