ޕާކިސްތާނުގެ ގާނޫނު ހަދާ މަޖިލީހުގެ ބޮޑު ބާރެއް އެގައުމުގެ ސަރުކާރަށް
މަޖިލީހުގެ ރައީސްއަށް އައްޔަންކުރެވިފައިވަނީ ސަރުކާރު ހިންގާ ކޯލިޝަންގައި ހިމެނޭ ބޭފުޅެއް
ބޮޑުވަޒީރު ޝަހްބާޒް ޝަރީފް
ޕާކިސްތާނުގެ ގާނޫނު ހަދާ މަޖިލީހުގެ ބޮޑު ބާރެއް އެގައުމުގެ ސަރުކާރު ހިންގާ ކޯލިޝަނަށް ލިބިއްޖެއެވެ.
ރޮއިޓަރސްގައި ރިޕޯޓުކޮށްފައިވާގޮތުން ޕާކިސްތާނުގެ ގާނޫނު ހަދާ މަޖިލީހުގެ ތިރިގޭގެ ބާރު މިހާރު އޮތީ އެގައުމުގެ ސަރުކާރު ހިންގާ ކޯލިޝަންއަށެވެ. އަދި މަޖިލީހުގެ ރައީސްއަކީވެސް ސަރުކާރު ހިންގާ ކޯލިޝަންގައި ހިމެނިވަޑައިގަންނަވާބޭފުޅެއް ކަމަށެވެ.
ޕާކިސްތާނުގެ ބޮޑުވަޒީރު ކަމުގައި ކުރިން ހުންނެވި އިމްރާން ޚާންގެ އިތުބާރުނެތްކަމަށް އެގައުމުގެ ގާނޫނު ހަދާ މަޖިލީހުން ފާސްކޮށް އޭނާ ވަނީ މަގާމުން ވަކިކޮށްފައެވެ. މިއާއެކު މިހާރު އެގައުމުގެ ބޮޑުވަޒީރުގެ މަގާމަށް ޝަހުބާޒް ޝަރީފް އައްޔަންކުރެއްވުމަށް ސަރުކާރު ކޯލިޝަނުން ވަނީ ނިންމާފައެވެ.
މިހާރު އެގައުމުގެ ގާނޫނު ހަދާ މަޖިލީހުގެ ރައީސްގެ މަގާމުގައި ހުންނެވީ ޕާކިސްތާން ޕީޕަލްސް ޕާޓީއަށް ނިސްބަތްވެވަޑައިގަންނަވާ ރާޖާ ޕަރްވައިޒް އަޝްރަފްއެވެ. އޭނާ ވަނީ މީގެ ކުރިން ބޮޑުވަޒީރުކަން ވެސް ކުރައްވާފައެވެ. މަޖިލީހުގެ ރައީސްގެ މަގާމަށް އޭނާ އައްޔަންކުރެވިފައިވަނީ އިތުރު މީހަކާ ވާދަނުކުރައްވައެވެ. މިއާއެކު ރާޖާ ވެވަޑައިގެންފައިވަނީ ޕާކިސްތާނުގެ ގާނޫނު ހަދާ މަޖިލީހުގެ 22 ވަނަ ރައީސްއަށެވެ.
ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ޕާޓީއަށް ނިސްބަތްވެވަޑައިގަންނަވާ މެމްބަރުން ވަނީ އެގައުމުގެ ގާނޫނު ހަދާ މަޖިލީހުން ވަކިވުމަށް މިދިޔަ ހޯމަ ދުވަހު ނިންމައި ވަނީ ރެސިގްނޭޝަން ސިޓީ ލާފައެވެ. އެހެންނަމަވެސް އެ ސިޓީތައް އަދި ބަލައިގެންފައެއް ނުވެއެވެ. މި ރެސިގްނޭޝަން ސިޓީތައް ބަލައިގެންފިނަމަ ދެ މަސްދުވަހުގެ ތެރޭގައި ޕާކިސްތާނުން 100 ބައި-އިލެކްޝަން ބާއްވައި އެ މަގާމުތަކަށް މެމްބަރުން އައްޔަންކުރަން ޖެހޭނެ ކަމަށް ރޮއިޓަރސްގައި ރިޕޯޓުކޮށްފައިވެއެވެ.
