ޕާކިސްތާންގެ އައު ބޮޑުވަޒީރުގެ މަގާމަށް އެގައުމުގެ މަޖިލީހުން ޝަހްބާޒް ޝަރީފް އައްޔަނުކޮށްފިއެވެ.
ހޯމަ ދުވަހު ބޮޑުވަޒީރު ހޮވުމަށް ނަގާ ވޯޓު ޕާކިސްތާންގެ މަޖިލީހުގައި ނަގާފައިވާއިރު، ޝަހްބާޒް ޝަރީފް މަގާމަށް އައްޔަނުކުރެވިގެން ދިޔައީ 174 މެމްބަރުންގެ ވޯޓުންނެވެ. ޝާހްބާޒް ޝަރީފް މަގާމަށް އައްޔަނުކުރެވިގެން މިދިޔައީ ބޮޑުވަޒީރުކަމުގެ މަގާމުގައި ހުންނެވި އިމްރާން ޚާންގެ އިތުބާރުނެތްކަމުގެ ވޯޓު ނަގައި މަގާމުން ވަކިކުރުމަށްފަހުއެވެ.
ޝަހްބާޒް ޝަރީފް އަކީ ޕާކިސްތާންގެ ބޮޑުވަޒީރުކަން ތިން ފަހަރު ކުރައްވާފައިވާ ނަވާޒް ޝަރީފްގެ ކޮއްކޯފުޅެވެ. އެނަލިސްޓުން ބުނާގޮތުން ޝަހްބާޒް އަކީ ހުޅަނގުގެ ގައުމުތަކާ އަދި އިންޑިއާ އާއި ޗައިނާއާ ވެސް ގުޅުން ރަނގަޅު ސިޔާސީ ލީޑަރެކެވެ. އަދި އޭނާ އަކީ ޕާކިސްތާންގެ އަސްކަރިއްޔާއާ ވެސް ގުޅުން ރަނގަޅު ލީޑަރެއް ކަމަށް އެނަލިސްޓުން ބުނެއެވެ.
ބޮޑުވަޒީރު ކަމުގެ މަގާމު ލިބުމާއެކު ޝަހްބާޒް ވަނީ ޕާކިސްތާނަށް ކުރިމަތިވެފައިވާ އިގުތިސާދީ ހާލަތުން އަރައިގަތުމުގެ މަސައްކަތްތައް ކުރައްވާނެ ކަމަށް ވިދާޅުވެފައެވެ. އިގުތިސާދީ ހާލަތު ގޯސްވެ ޕާކިސްތާން ރުޕީސްގެ އަގު މިއިން ދުވަހަކުވެސް ނުވެއްޓޭ ވަރަށް ވެއްޓިފައިވާއިރު، އެގައުމުގެ ސެންޓްރަލް ބޭންކުން ވަނީ އިންޓެރެސްޓް ރޭޓް ވަރަށް ބޮޑަށް މަތިކޮށްފައެވެ.
ޝަހްބާޒް ވަނީ ގައުމު މިހާރު ވެއްޓިފައި މިއޮތް އަޑިގަނޑުން އަރައިގަންނަން ބޭނުން ނަމަ ވަރަށް ބުރަކޮށް މަސައްކަތްކުރަންޖެހޭ ކަމަށް ވިދާޅުވެފައެވެ. އަދި މިހާލަތުން އަރައިގަންނަށް އެންމެން އެއްކޮށް ގުޅިގެން މަސައްކަތްކުރުމުގެ މުހިންމުކަންވެސް ޝަހްބާޒް ވަނީ ފާހަގަކުރައްވާފައެވެ. މިފެށިގެން ދަނީ ޕާކިސްތާންގެ ތަރައްގީގެ އައު ސަފްހާއެއް ކަމަށްވެސް ޝަހްބާޒް ވިދާޅުވިއެވެ.
ޕާކިސްތާންގެ ބޮޑުވަޒީރުކަމަށް ޝަހްބާޒް އައްޔަނުކުރުމަށް ވޯޓު ނެގުމުގެ ކުރިން މަޖިލީހުގައި ހިމެނިވަޑައިގަންނަވާ ކުރީގެ ބޮޑުވަޒީރު އިމްރާން ޚާން ނިސްބަތްވާ ތަހްރީކީ އިންސާފު ޕާޓިގެ ހުރިހާ މެމްބަރުން ވަނީ އިސްތިއުފާ ދީފައެވެ. އެގޮތުން ކުރީގެ ފޮރިން މިނިސްޓަރ އަދި ޕާޓީގެ ނައިބު ރައީސް ޝާހް މަހްމޫދު ގުރައިޝީ ވަނީ އެޕާޓީގެ ހުރިހާ މެމްބަރުން އިސްތިއުފާ ދެއްވާކަން އިއުލާން ކުރައްވާފައެވެ.
މިމެމްބަރުންގެ އިސްތިއުފާއާ އެކު މަޖިލީހުގެ 100ށް ވުރެ ގިނަ ގޮޑި ހުސްވާނެއެވެ.
ތަހްރީކީ އިންސާފު ޕާޓީން ބޮޑުވަޒީރުގެ މަގާމަށް ހޮވުމަށް ގުރައިޝީގެ ނަން ވަނީ ހުށަހަޅާފައެވެ.
އިމްރާން ޚާން އަކީ ޕާކިސްތާނުގެ ތާރީހުގައި އިތުބާރުނެތްކަމުގެ ވޯޓު ނަގައި މަގާމުން ވަކިކުރެވުނު ފުރަތަމަ ބޮޑުވަޒީރެވެ. އިމްރާން ޚާން މަގާމުން ވަކިކުރުމަށް މަސައްކަތްކޮށްފައި ވަނީ އެމެރިކާގެ ނުފޫޒުން ކަމަށް އޭނާ ވަނީ ވިދާޅުވެފައެވެ.
އަލަށް އައްޔަނު ކުރެވުނު ބޮޑުވަޒީރު، ޝަހްބާޒް ޝަރީފް ވަނީ ޕާކިސްތާނުގެ ކުރިއެރުމަށް އެމެރިކާއާއެކު އޮންނަ ހާރިޖީގުޅުން ރަނގަޅުކުރުން މުހިންމުކަމަށް މިދިޔަ ހަފުތާ ވިދާޅުވެފައެވެ. އަދި މަގާމު ލިބުނުފަހުން ދެއްކެވި ވާހަކަފުޅުގައި ޝަހްބާޒް ވަނީ އަވައްޓެރި އިންޑިއާ އާއި ޗައިނާއާ ދެމެދު އޮންނަ ގުޅުން ރަނގަޅުކުރުމަށް މަސައްކަތްކުރައްވާނެ ކަމަށް ވިދާޅުވެފައެވެ.
އިންޑިއާ އާއެކު އޮތް ގުޅުން ރަނގަޅުކުރުމަށް މަސައްކަތްކުރައްވާނެ ކަމަށް ވިދާޅުވެ ޝަހްބާޒް ވަނީ ކަޝްމީރުގެ މައްސަލަ ހައްލު ނުވާހާ ހިދަކު ދެގައުމުގެ ދެމެދުގައި ދާއިމީ ސުލްހައެއް ގާއިމުނުކުރެވޭނެ ކަމަށްވެސް ވިދާޅުވެފައެވެ.
މީގެ އިތުރުން 60 ބިލިއަން ޑޮލަރުގެ ޗައިނާ-ޕާކިސްތާން އިކޮނޮމިކް ކޮރިޑޯރގެ މަސައްކަތް އަވަސްކުރައްވާނެ ކަމަށްވެސް ޝަހްބާޒް ވިދާޅުވިއެވެ.
