ޕާކިސްތާންގެ އައު ސަރުކާރަށް ވަނީ ވަރަށް ބޮޑު ޑެފިސިޓްއަކާއެކު ވީރާނާވެފައިވާ އިގުތިސާދު އަލުން އަނބުރާ ކޮޅަށް ޖަހަން މަޖުބޫރުވެފައި ކަމަށް ބޮޑުވަޒީރުކަމާ އަލަށް ހަވާލުވެވަޑައިގެންނެވި ޝަހްބާޒް ޝަރީފްގެ އޮފިޝަލަކު ވިދާޅުވެއްޖެއެވެ.
އޮފިޝަލްއާ ހަވާލާދީ ރޮއިޓަރސްގައި ރިޕޯޓުކޮށްފައިވާ ގޮތުން ހޯމަ ދުވަހު ޝަހްބާޒް ޝަރީފް މަގާމާ ހަވާލުވެވަޑައިގެންނެވި އިރު، ކުރިމަތިވެފައިވާ އެންމެ ބޮޑު ގޮންޖެހުމަކީ ދަތިތަކާއެކު އިގުތިސާދު އަލުން އާރާސްތުކުރުމެވެ.
ޝަހްބާޒް ޝަރީފަށް ޕާކިސްތާންގެ ބޮޑުވަޒީރުކަން ދެވިގެން ދިޔައީ ކުރިން އެމަގާމުގައި ހުންނެވި އިމްރާން ޚާންގެ އިތުބާރު ނެތްކަމުގެ ވޯޓު ނަގައި މާގާމުން ވަކިކުރެވުމުންނެވެ.
ޝަހްބާޒްގެ ބޮޑުވަޒީރުކަމުގައި ޕާކިސްތާންގެ ފިނޭންސް މިނިސްޓަރުކަން ކުރައްވާނެ ކަމަށް އެންމެ ބޮޑަށް ބެލެވޭ މިފްތާހް އިސްމާއިލް ވަނީ އިމްރާން ޚާން މަގާމުން ވަކިކުރެވިގެން ދިޔައިރު ގައުމު އޮތީ ވަރަށް ނާޒުކު ފައްތަރެއްގައި ކަމަށް ވިދާޅުފައެވެ. އަދި މަޑުޖައްސާލާފައިވާ މަޝްވަރާތައް ވީހާވެސް އަވަހަކަށް އިންޓަނޭޝާނަލް މަނިޓަރީ ފަންޑް (އައިއެމްއެފް) އާއެކު ކުރިއަށް ގެންދަން ފަށާނެ ކަމަށް އޭނާ ވަނީ ވިދާޅުވެފައެވެ.
2019 ވަނަ އަހަރުގެ ޖުލައި މަހު އައިއެމްއެފް އާއެކު ކުރެވުނު މަޝްވަރާތަކެއްގެ ދަށުން އެއިދާރާއިން ވަނީ ޕާކިސްތާނަށް ހަ ބިލިއަން ޑޮލަރުގެ ރެސްކިއު ޕްރޮގްރާމެއް ދިނުމަށް އެއްބަސްވެފައެވެ. ނަމަވެސް މި އެއްބަސްވުމުގެ ހަތް ވަނަ ރިވިއުގެ ކުރިން އައިއެމްއެފް އިން ވަނީ މަޝްވަރާތައް މަޑުޖައްސާލާފައެވެ.
ޕާކިސްތާންގެ އިގުތިސާދާ މެދު އިމްރާން ޚާން އިހުމާލުވެފައިވާ ކަމުގެ ތުހުމަތުތައް ކުރެވޭއިރު، ޝަހްބާޒް އެކޭ އެއްފަދައިން މިފްތާހް ވެސް ވަނީ އައު ސަރުކާރަށް ވަނީ ވަރަށް ބޮޑު ޑެފިސިޓްއަކާއެކު ގައުމުގެ އިގުތިސާދު ހަމައަކަށް އެޅުމުގެ ޒިންމާ އުފުލަންޖެހިފައިވާ ކަމަށް ވިދާޅުވެފައެވެ.
ބޮޑުވަޒީރުގެ މަގާމާ ހަވާލުވެވަޑައިގެން ގައުމަށް ދިމާވެފައިވާ އިގުތިސާދީ ހާލަތުން އަރައިގަތުމުގެ ގޮތުން ޝަހްބާޒް ޝަރީފް ވަނީ ނެޝަނަލް އިކޮނޮމިކް އެޑްވައިޒަރީ ކައުންސިލް އެކުލަވާލައްވާފައެވެ. އަދި އިޤްތިސާދީ ލޮޅުމާއެކު އާންމު ރައްޔިތުންނަށް ދިމާވެފައިވާ ގޮންޖެހުންތަކަށް އެހީތެރިވުމުގެ ގޮތުން ސަރުކާރު މުވައްޒަފުންގެ މުސާރަ 10 އިންސައްތަ އިތުރުކުރުމާއެކު އެގައުމުގެ އެންމެ ކުޑަ އުޖޫރަ އަކީ 25،000 ރުޕީސްކަމަށް ކަނޑައަޅަން ނިންމާފައިވާކަން ޝަހްބާޒް ވަނީ އިއުލާން ކުރައްވާފައެވެ.
ފާއިތުވި ހަފުތާގައި ޕާކިސްތާންގެ ސެންޓްރަލް ބޭންކުން ވަނީ އެގައުމުގެ ކަރަންޓް އެކައުންޓް ޑެފިސިޓް 2022 ވަނަ މާލީ އަހަރަށް ހުރީ ޖީޑީޕީގެ ނިސްބަތުން ހަތަރެއް އިންސައްތައިގަ ކަމަށް އާންމުކޮށްފައެވެ. އަދި މީގެ މަހެއްހާ ދުވަސްކުރިން 16.2 ބިލިއަން ޑޮލަރުގައި ހުރި ފޮރިން ރިޒަރވް އޭޕްރިލް މަހުގެ އެއް ވަނަ ދުވަހަށް އައިރު ހުރީ 11.3 ބިލިއަން ޑޮލަރުގައި ކަމަށް ސެންޓްރަލް ބޭންކުގެ ތަފާސްހިސާބުތައް ދައްކައެވެ.
މިދިޔަ ހަފުތާގެ ތެރޭގައި ސެންޓްރަލް ބޭންކުން ވަނީ އެގައުމުގެ އިންޓްރެސްރޭޓް ވެސް 12.25 އިންސައްތަ އަށް އިތުރުކޮށްފައެވެ. މިއީ ފާއިތުވި އަހަރު ތަކުގެ ތެރޭގައި އެގައުމުގެ އިންޓްރެސްރޭޓް މިހާ މަތިވި ފުރަތަމަ ފަހަރެވެ. އެގައުމުގެ އިންފްލޭޝަންވެސް މަތިވާން ފަށާފައިވާއިރު، 2022 ވަނަ މާލީ އަހަރަށް އިންފްލޭޝަން 11 އިންސައްތައަށް ވުރެ މައްޗަށް އަރާނެ ކަމަށް ބޭންކުން ވަނީ ލަފާކޮށްފައެވެ.
