މިފަހަކަށް އައިސް ރާއްޖޭގެ ފުޓުބޯޅައިގެ ހިންގުން ބޮއްސުންލާފައިވާ ވާހަކައަކީ ގިނަ މީހުން ދައްކާ ވާހަކައެކެވެ. ދިވެހި ފުޓުބޯޅަ ކުރި ނާރަނީ، ހަރުދަނާ ސިޔާސަތުތަކެއް ނެތުމުން ކަމަށް ގިނަ  މީހުން ބުނެއެވެ. އެވާހަކަތަކަށް މާ ބޮޑު ސަމާލުކަމެއް ލިބެނީ ދޭތެރެއިން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ގުޅުވައިގެން ދެކެވޭ ވާހަކަތަކުންނެވެ. ގިނައިން ދެކެވެނީ މާލީ ގޮތުން ދެކެވޭ އަސާސީ ވާހަކަތަކެވެ.

މާލީ މައްސަލަތައް ކުރިމަތިވެފައިވާ އެފްއޭއެމަށް މިއަހަރުގެ ތެރޭގައި ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ހުކުމްތަކެއް ވެސް ވަނީ ކުރިމަތިވެފަ އެވެ. ފުރަތަމަ އެންގުމަކީ ޤައުމީ ޓީމުގެ ކުރީގެ ކޯޗަކަށް ހުރި ނެދަލެންޑްސްގެ މާޓިން ކޫޕްމަން އަށް ބަދަލު ދޭން އެންގި އެންގުމެވެ.

ޤައުމީ ކޯޗަކަށް ކޫޕްމަން ހަމަޖައްސާފައިވަނީ 2020 ވަނަ އަހަރުގެ ކުރީކޮޅުއެވެ. ކޫޕްމަންގެ އިރުޝާދުގެ ދަށުން ޤައުމީ ޓީމުން ރަސްމީ އެއްވެސް މެޗެއް ނުކުޅެ އޮއްވާ، އެފްއޭއެމުން ވަނީ އޭނާގެ އެއްބަސްވުން އައުކޮށްފައެވެ. އިތުރު ތިން އަހަރަށް ކޫޕްމަން ޤައުމީ ޓީމުގައި ބަހައްޓަން ނިންމިތާ މާގިނަ ދުވަހެއްނުވެ އޭނާގެ އެއްބަސްވުން އުވާލި އެވެ. އެއީ ވޯލްޑްކަޕް ކޮލިފައިންގައި ކުޅުނު ތިން މެޗަށްފަހު ކުރި އެސެސްމަންޓަށް ބަލާފައި ކަމަށް އެފްއޭއެމުން ބުނެ އެވެ. ސެންޓްރަލައިޒްކޮށް ދުބާއީގައި ކުޅުނު ތިން މެޗުގެ ތެރެއިން ރާއްޖެ ވަނީ ދެ މެޗުން ބަލިވެ، އެއް މެޗުން އެއްވަރުވެފައެވެ. ރާއްޖެ ބަލިވެފައިވަނީ ސީރިއާ އަތުން 4-0 އިން އަދި ޗައިނާ އަތުން 5-0 އިންނެވެ. ކޮލިފައިންގައި ފިލިޕީންސްއާ ދެކޮޅަށް ކުޅުނު މެޗުން ރާއްޖެ އެއްވަރުވީ 1-1 އިންނެވެ. މި މެޗުތަކަށްފަހު އެއްބަސްވުން 2021 ވަނަ އަހަރު އުވާލީ ދެ ފަރާތް އެއްބަސްވުމަކަށް އާދެވިގެން ކަމަށް ވެސް އެފްއޭއެމުން ބުންޏެވެ.

ނަމަވެސް ކޫޕްމަންގެ ވާހަކަ ތަފާތެވެ. މަގާމުން ވަކިކުރުރީ އެއްބަސްވުމާ ޚިލާފަށްކަމަށް ބުނެ، ކޫޕްމަން އެފްއޭއެމްގެ މައްސަލަ ފީފާ އަށް ހުށަހެޅިއެވެ. މައްސަލަ ބެލުމަށްފަހު ފީފާއިން އެފްއޭއެމަށް އެންގީ 45 ދުވަހުގެ ތެރޭގައި ކޫޕްމަންއާއެކު ހެދި އެއްބަސްވުމުގެ މުއްދަތަށް ބަދަލު ދިނުމަށެވެ. މި ބަދަލުގެ އަގު 2.5 މިލިއަން ރުފިޔާ އަށް އަރައެވެ. މި ފައިސާ މުއްދަތަށް ނުދައްކައިފިނަމަ، ފީފާ އިން އެފްއޭއެމަށް ދޭ ބަޖެޓުން އެ އަދަދު އުނިކުރާނެ ކަމަށް ވެސް އެންގިއެވެ.

އެފްއޭއެމް ގޮވައިގެން ފައިސާ ހޯދަން ދެ ވަނަ އަށް މައްސަލަ ޖެއްސީ ކޫޕްމަންގެ އެސިސްޓެންޓް ކޯޗު ހޮލެންޑްގެ ރެނޭ ހިޑިންކެވެ. އޭނާގެ އެއްބަސްވުން އެފްއޭއެމުން އުވާލީ ވެސް ތިން އަހަރަށް އެއްބަސްވުން އައު ކުރުމަށްފަހު، މާގިނަ ދުވަހެއްނުވަނީހެވެ. އޭނާގެ ފަރާތުން އެ މައްސަލަ ޖެއްސުމުން، ރެނޭ އަށް ވެސް އެފްއޭއެމުން ގާތްގަނޑަކަށް 2.5 މިލިއަން ރުފިޔާ ދޭން ފީފާއިން ހުކުމްކުރި އެވެ.

ދެން ފެނިގެންދިޔައީ ޤައުމީ ޓީމުގެ މިހާރުގެ ކޯޗު ފްރެންޗެސްކޯ މޮރިއޭރޯގެ އެސިސްޓެންޓަކަށް ހުރި ސިމާއޯ ކޯސްޓާ އެފްއޭއެމުން މުސާރަ ނުދޭ ކަމަށް ބުނެ އިސްތިއުފާ ދިން މަންޒަރެވެ. އޭނާ ބުނާ ގޮތުން ފާއިތުވެދިޔަ ހަތް މަސްދުވަހު އޭނާ ރާއްޖޭގައި ހުރީ މުސާރަ ނުލިބި އެވެ. އެކަމަކު މިގޮތަށް މަސައްކަތް ކުރެވެން ނެތުމުން ގައުމީ ޓީމާ ވަކިވީ ކަމަށެވެ. އަދި ފީފާ އަށް މައްސަލަ ހުށަހަޅާނެ ކަމަށް އޭނާ ފޭސްބުކްގައި ދައްކާފައިވާ ވާހަކަތަކުން ޔަގީންކުރެވެ އެވެ. ސިމާއޯ އަށް އެފްއޭއެމުން ދޭން ޖެހޭނީ ކިހާވަރެއްގެ ފައިސާއެއްކަން އެނގޭނީ ފީފާގެ ހުކުމް އައުމުންނެވެ.

ކަން މިހެންއޮއްވައި ދެން ފެނިގެން ދިޔައީ އަންހެން ޤައުމީ ޓީމުގެ ކޯޗަކަށް ހުރި ޑޭވޯ ބާބާގެ ވާހަކައެވެ. ސާބިއާގެ ކޯޗާއެކު ޤައުމީ ޓީމުގެ ފަރިތަކުރުންތައް ފަށައިގެން ކުރިއަށް ގެންދިޔައީ މިހާރު ކުރިއަށްދާ އަންހެން ސާފް ޗެމްޕިއަންޝިޕަށް ތައްޔާރުވުމަށެވެ. އޭނާގެ އިރުޝާދުގެ ދަށުން ޤައުމީ އަންހެން ޓީމުން ވަނީ ފެބްރުއަރީ މަހު އެކުވެރިކަމުގެ ތިން މެޗު ކުޅެފައެވެ. އެއީ ސީޝެލްސްއާ ދެކޮޅަށް ކުޅުނު ދެ މެޗާއި، ސައުދީ އަރަބިއާއާ ދެކޮޅަށް ކުޅުނު މެޗެވެ. ފުރަތަމަ މެޗުގައި ރާއްޖެއިން ވަނީ 1-0 އިން ސީޝެލްސް ބަލިކޮށްފައެވެ. ދެ ވަނަ މެޗުގައި ސީޝެލްސް އަތުން 4-0 އިން ބަލިވިއިރު، ފަހު މެޗުގައި ސައުދީ އަތުން ވަނީ 2-0 އިން ބަލިވެފައެވެ.

ބާބާއާއެކު ފަރިތަކުރުން ފަށައި، ސާފް ޗެމްޕިއަންޝިޕްގައި ރަނގަޅު ނަތީޖާއެއް ނެރުމުގެ މަސައްކަތް ފެށިއިރު، މިހާރު ކޯޗު ވީ ތަނެއް ނޭނގެއެވެ. ނޭޕާލްގައި މިހާރު ކުރިއަށްދާ އަންހެން ސާފް ޗެމްޕިއަންޝިޕްގައި ޤައުމީ ޓީމަށް އިރުޝާދު ދެނީ އަހުމަދު ޝަރީފް (ޑުންގާ)އެވެ.

މިފަދަ ކަންކަމުން އެނގެނީ އެފްއޭއެމްގައި މާލީ މައްސަލަތަކާއެކު ހަރުދަނާ ސިޔާސަތެއް ވެސް ނެތްކަން ކަމަށް ފުޓްބޯޅައިގައި ހަރަކާތްތެރިވާ ގިނަ މީހުން ބުނެ އެވެ.

އަދި އެފްއޭއެމުން މުސާރަ ނުދޭކަމުގެ ޝަކުވާ އަކީ ވަރަށް ގިނައިން އިވޭ ޝަކުވާއެކެވެ. މުސާރަ ނުދެވި ދެ މަސް ދުވަހަށް ލަސްވެގެންދެއެވެ. އެންމެ ފަހުން އެފްއޭމުން ބޭއްވި ކޮންގްރެސްގައި އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވީ ފާސްކުރެވުނު ބަޖެޓާއެކު އެފްއޭއެމްގެ މާލީ މައްސަލަތައް ހައްލުވާނެކަމަށެވެ. ނަމަވެސް އޭގެ ފަހުން ވެސް ހައްލެއް އައި މަންޒަރު ފެންނާކަށްނެތެވެ. މުސާރަ ނުދީގެން ކޯޗުން އިސްތިއުފާދިނުން ހުއްޓުމަކަށްނާދެ އެވެ.