އެލްޖީއޭއާ މެދު ކައުންސިލްތަކުން ދެކޭ ގޮތް ބަދަލުވުމަކީ މުހިންމު ކަމެއް ކަމަށް ލޯކަލް ގަވަމަންޓް އޮތޯރިޓީ، އެލްޖީއޭގެ ޗީފް އެގްޒެކެޓިވް އޮފިސަރު ފާޠިމަތު އަފްޝަން ލަތީފް ވިދާޅުވެއްޖެއެވެ.
ވިއަވަތި ރާއްޖެ ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން އަފްޝަން ވިދާޅުވީ އެލްޖީއޭ އަކީ ކައުންސިލްތަކުގެ އެހީތެރިއެއް ކަމަށާއި އެކުވެރިއެއް ކަމަށެވެ. އަދި އަމާޒަކީ ކައުންސިލްތަކާއި އޮތް ގުޅުން ބަދަހި ކުރުން ކަމަށެވެ.
8 މޮނީޓަރިންގް ރިޕޯޓު ނިމިފައިވާއިރު އެފަދަ ކަންތައްތަކަކީ ކައުންސިލްތައް ކުށްވެރިކޮށް، ކުށް ހޯދުން ނޫންކަން ފާހަގަކުރައްވާ އަފްޝަން ވިދާޅުވީ މިފަދަ ރިޕޯޓްތައް ހެދުމުގެ ބޭނުމަކީ ރަނގަޅު ކުރުމަށް ބޭނުންވާ އެހީތެރިކަން ހޯދައިދީ އެކަމަށް ޖާގަ ތަނަވަސްކޮށްދިނުން ކަމަށެވެ.
ފާއިތުވި އަހަރު 98 ކައުންސިލަކާއި ބައްދަލުކުރެއްވި ކަމަށާއި މިއަހަރު ވެސް ގިނަ ކައުންސިލްތަކާ ބައްދަލުކުރައްވާނެ ކަމަށް އަފްޝަން ވިދާޅުވިއެވެ.
އަދި ވިއަވަތި ރާއްޖެ ކޮންފަރެންސަކީ ލާމަރުކަޒީ ނިޒާމު ފުރިހަމަކުރުމަށް ކުރިއަށްގެންދާ މުހިންމު މަހާސިންތާއެއް ކަމަށް އަފްޝަން ވިދާޅުވިއެވެ.
ފަނޯއްލަ ދަރުބާރާއި ވިއަވަތި ކޮންފަރެންސް ބާއްވައިގެން ލިބޭ ނަތީޖާއަކީ ކޮބައިތޯ ވަރަށް ގިނަ މީހުން ސުވާލު ކުރާ ކަމަށާއި އިސްކުރެވުނީ ފުދުންތެރިކަމާއި މާލީ ބާރުވެރިކަން އަފްޝަން ވިދާޅުވިއެވެ.
ލާމަރުކަޒީ ނިޒާމުން ކައުންސިލްތަކަށް ދީފައިވާ ބާރުތަކަށް ހުރަސް އަޅާ ޤާނޫނުތައް ދެނެގަތުންކަން ފާހަގަކުރައްވާ އަފްޝަން ވިދާޅުވީ އެކަމުގެ މައްޗަށް ބިނާކޮށް ޤާނޫނުތައް އިސްލާހުކުރުމަށް މަޖިލީހަށް ހުށަހެޅިފައިވާ ކަމަށް އަދި ހުށަހަޅަމުންދާ ކަމަށެވެ.
އަފްޝަން އިތުރަށް ވުދާޅުވީ ކައުންސިލްތަކަށް ތަމްރީން ޕްރޮގްރާމުތައް ހިންގާފައިވާ ކަމަށާއި މާލީ ކަންކަމާއި ގުޅޭ ހަތް ދުވަހުގެ ޕްރޮގްރާމެއް މިދިޔަ ހަފްތާގައި ވެސް ހިންގާފައިވާ ކަމަށެވެ.
ދުނިޔޭގެ ތަހުޒީބީ ޤައުމުތަކުގައި ވެސް ލާމަރުކަޒީ ނިމާޒު ފުރިހަމަ ކުރުމަށް ގިނަ ކަންތައްތަކެއް ކުރަން ޖެހޭ ކަމަށާއި އެފަދައިން ރާއްޖޭގައި ވެސް މި ނިޒާމު ފުރިހަމަ ކުރުމަށް ގިނަ މަސައްކަތަކެއް ކުރަން ޖެހޭ ކަމަށް އޭނާ ވިދާޅުވިއެވެ.
ފަނޯއްލަ ދަރުބާރަށް ސަރުކާރުގެ އެއްބާރުލުން ލިބޭ ކަމަށާއި ތަފާތު ޚިޔާލުތަކާއި ވިސްނުންތަކާއެކު އެކި ކަންތައްތަކުގެ މައްޗަށް މަޝްވަރާ ކުރުމަކީ މި މަހާސިންތާގެ އަމާޒު ކަމަށް ވެސް އަފްޝަން އިތުރަށް ވިދާޅުވިއެވެ.
