ތިން މަހުގެ ސަސްޕެންޝަނަށް ފަހު, މޭޔަރު ސައުދު އަށް ރަތް ދޫލައިގެ މަރުހަބާއެއް

ލޯކަލް ގަވަމެންޓް އޮތޯރިޓީ (އެލްޖީއޭ)އިން ތިނަދޫ ސިޓީގެ މޭޔަރު ސައުދު އަލީ ތިން މަސް ދުވަހަށް ކުރި ސަސްޕެންޝަން އުވި، މަސައްކަތަށް ނުކުމެވަޑައިގަތުމުން އޭނާއަށް ރަތް ދޫލައިގެ މަރުހަބާއެއް ކިޔައިފި އެވެ.

އެލްޖީއޭއިން މައްސަލަތަކެއް ބެލުމަށް މުސާރަ ނުލިބޭ ގޮތަށް ސައުދާއި ޑެޕިއުޓީ މޭޔަރު ނަސްރުﷲ އަލީ ސަސްޕެންޑުކުރީ މިދިޔަ ޖޫން މަހުގެ 25 ގައެވެ. ސައުދު ތިން މަހަށް ސަސްޕެންޑުކުރިއިރު، ނަސްރުﷲ ސަސްޕެންޑުކުރީ އެއް މަހަށެވެ.

އޭގެފަހުން، ސައުދުގެ ސަސްޕެންޝަންގެ މުއްދަތު ހަމަވެ، ބުރާސްފަތި ދުވަހު ވަނީ އެނބުރި މަސައްކަތަށް ނުކުމެވަޑައިގެންފައެވެ.

ސައުދު ބުރާސްފަތި ދުވަހު މަސައްކަތަށް ވަޑައިގެންނެވިއިރު، ތިނަދޫ ސިޓީ ކައުންސިލުން ވަނީ ރަތް ދޫލައިގެ މަރުހަބާއެއް ކިޔާފައެވެ. ސައުދާއި ނަސްރުﷲގެ ސަސްޕެންޝަންގެ މައްސަލަ ވަނީ ސިވިލް ކޯޓަށް ވެސް ހުށަހަޅާފައެވެ.

އެބޭފުޅުން ސަސްޕެންޑުކޮށް އޭރު އެލްޖީއޭއިން ބުނީ، ތިނަދޫ ސިޓީ ކައުންސިލުން އެ ކައުންސިލުގެ ވާޖިބު އަދާކުރުމަށް ނުކުޅެދިފައިވާ ކަމަށެވެ.

ކައުންސިލުގެ ބާރުތަކާއި ވަސީލަތްތަކުގެ ބޭނުން ނަހަމަ ގޮތުގައި ހިފައި ކައުންސިލްގެ މިންގަނޑާ ޚިލާފަށް މޭޔަރާއި މެންބަރުން ޢަމަލުކުރާކަމަށް ބުނެ އާންމުން ދައުލަތުގެ އެކި އިދާރާތަކަށް މައްސަލަ ހުށަހަޅާފައިވާ ކަމަށް އޭރު އެލްޖީއޭއިން ބުންޏެވެ.

އެލްޖީއޭއިން އެ ބޭފުޅުން ސަސްޕެންޑުކުރީ 19 ކަމެއްގެ މައްޗަށް ބިނާކޮށް ތައްޔާރުކޮށްފައިވާ އިންކުއަރީއަކާ ގުޅިގެންނެވެ. އެގޮތުން، ދައުލަތުގެ އިދާރާތަކުން ތިނަދޫ ސިޓީ ކައުންސިލަށް ފޮނުވާ ސިޓީތަކަށް ޖަވާބުދާރީނުވެ ފޮނުވާލާ މައްސަލައާއި ރަށްވެހިކަން ބަދަލު ކުރުމަށް ހުށަހެޅުމުން 5000 ރުފިޔާގެ ފީއެއް ނެގުމާއި އެ ފީ ނުނެގުމަށް އެލްޖީއޭއިން އެންގި އެންގުމަށް އަމަލުނުކުރުމާއި އަތޮޅު ކައުންސިލުންނާއި ސަރުކާރުގެ އެހެން އިދާރާތަކުން އެދޭ މައުލޫމާތު ނުފޮނުވާ މައްސަލަ ހިމެނެއެވެ.

އެހެން ނަމަވެސް މޭޔަރު ސައުދު ވަނީ އެލްޖީ އޭގެ މި ވާހަތަށް ދޮގުކުރައްވާފަ އެވެ. އަދި ސަސްޕެންޑް ކޮށްފައިވަނީ ވެސް ގާނޫނާ ޚިލާފަށް ކަމަށް ސައުދު ވިދާޅުވި އެވެ.