ވިއަވަތިން ލ އަތޮޅުގެ މެހެމާންދާރީގެ މިސާލު ފެނިގެންދާނެ: ވިޝާމް

ލ. ގަމުގައި މިހާރު ކުރިއަށްދާ ވިއަވަތި ރާއްޖެ މަހާސިންތާއިން ލ އަތޮޅުގެ މެހެމާންދާރީއާއި ސަގާފަތް ވަރަށް ރަނގަޅަށް ފެނިގެންދާނެކަމަށް، ރައްޔިތުންގެ މަޖިލީހުގެ ގަމު ދާއިރާގެ މެމްބަރު އަހުމަދު ވިޝާމް ވިދާޅުވެއްޖެއެވެ.

ރާއްޖެޓީވީއަށް ދެއްވި ބަސްތީގަތުމެއްގައި ވިޝާމް ވަނީ، ވިއަވަތި ކޮންފަރެންސަކީ މިހާތަނަށް ލ އަތޮޅުގައި، ގައުމީ ފެންވަރުގައި ބާއްވާ މި ފަދަ ފުރަތަމަ ހަރަކާތްކަން ފާހަގަކުރައްވާފައެވެ. މިއީ މިހާތަނަށް އެ އަތޮޅުގައި ބާއްވާ އެންމެ ބޮޑު އެއް ހަރަކާތަށް ވާއިރު، ވިއަވަތި ރާއްޖެއާއި ފަނޯއްލަ މަހާސިންތާގެ ބައިވެރިން ހިމެނޭހެން 450ށްވުރެ މީހުން އެ އަތޮޅަށް ޒިޔާރަތްކޮށްފައިވާކަން އޭނާ ވަނީ ފާހަގަކުރައްވާފައެވެ. މި ދެ ހަރަކާތުގެ ބައިވެރިންނަށް މެހެމާންދާރީ އަދާކުރުމުގައި ލ އަތޮޅުގެ ކައުންސިލްތަކާއި އާއްމުންގެ ފަރާތުން ވަރަށް ރަނގަޅު އެއްބާރުލުމެއް ލިބިފައިވާކަންވެސް އޭނާ ވަނީ ފާހަގަކުރައްވާފައެވެ. ވިޝާމް ވަނީ، ވިއަވަތި މަހާސިންތާއަކީ ލާމަރުކަޒީ ނިޒާމް ހަރުދަނާކުރަން ލިބޭ ރަނގަޅު ފުރުސަތެއްކަން ފާހަގަކުރައްވާފައެވެ. އަދި މި މަހާސިންތާއިން ރަނގަޅު ނަތީޖާއެއް ހާސިލްކުރެވޭނެކަމަށް އުންމީދުކުރައްވާކަމަށްވެސް ވިޝާމް ވިދާޅުވިއެވެ.

ފަނޯއްލަ މަހާސިންތާ ބާއްވާފައިވަނީ ހުކުރު ދުވަހުން ހޮނިހިރު ދުވަހަށް، ލ. ގަމުގައެވެ. ވިއަވަތި ރާއްޖެ މަހާސިންތާ ކުރިއަށްދާނީ ސެޕްޓެމްބަރު 10-12އަށެވެ. ފަނޯއްލަ މަހާސިންތާއަކީ ސަރުކާރުގެ 5 އަހަރުގެ ސްޓްރެޓީޖިކް ޕްލޭން (ސެޕް)ގެ ސިޔާސަތުތަކާއި ލާމަރުކަޒީ ގާނޫނަށް ގެނައި އިސްލާހުތައް ތަންފީޒުކުރަން ހުރި ގޮންޖެހުންތަކާމެދު މަޝްވަރާކޮށް، ކަމާބެހޭ ފަރާތްތަކަށް އެ ކަންކަން ހުށަހެޅުމުގެ މަގުސަދުގައި ކުރިއަށްގެންދާ މަހާސިންތާއެކެވެ. މި މަހާސިންތާއިން ނިންމާ ކަންކަން ވިއަވަތި މަހާސިންތާއަށް ހުށަހެޅުމަށް ވަނީ ހަމަޖެހިފައެވެ. ވިއަވަތި މަހާސިންތާގައި ކައުންސިލްތަކާ ބައްދަލުކުރައްވައި، ކައުންސިލްތަކަށް ދިމާވާ ދަތިތަކާމެދު މަޝްވަރާކުރުމާއި، ކައުންސިލްތަކާ ގުޅިގެން އިދާރާތަކަށް އެކި ދާއިރާތަކުން ކުރެވިދާނެ މަސައްކަތްތަކާމެދު މަޝްވަރާކުރުމަށް ވަނީ ހަަމަޖެހިފައެވެ.