ލ.އަތޮޅު ޗެމްޕިއަންކަން ތުނޑީ ފުޓްބޯޅަ ކްލަބަށް!

ލ.އަތޮޅު ފުޓްބޯޅަ މުބާރާތުގެ ޗެމްޕިއަންކަން ތުނޑީ ފުޓްބޯޅަ ކްލަބް ހޯދައިފި އެވެ. އުރީދޫ ލާމަސީލު ލާމު އަތޮޅު ފުޓްބޯޅަ މުބާރާތުގެ ޗެމްޕިއަންކަން ތުނޑީ ޓީމުން ހޯދީ ފައިނަލްގައި މުކުރިމަގާ ވާދަކޮށް ޕެނަލްޓީގައި ކުރި ހޯދައިގެންނެވެ.

ފައިނަލް މެޗުގެ ފުރިހަމަ ވަގުތު ހަމަވިއިރު ދެޓީމް 1-1 ން އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި ތުނޑި އެފްސީ ކުރިހޯދީ 5-4 ނެވެ. މެޗުގެ ފުރިހަމަ ވަގުތުގައި ފުރަތަމަ ލަނޑު ޖަހާ ކުރިހޯދީ ތުނޑި ޓީމެވެ. އެކަމަކު އެއީ އީސާ އަލީމް އަތުން ވަން ބައިގޯލަކުންނެވެ. ފުރަތަމަ ހާފް ނިމުމުގެ ކުރިން މުކުރިމަގު ޓީމަށް ނަތީޖާ ހަމަހަމަ ކޮށްދިނީ އަހުމަދު ރާހިލް ރަޝީދެވެ.

ޕެނަލްޓީގައި ތުނޑި އެފްސީން އެމީހުން ޖެހި ފަސް ޕެނަލްޓީވެސް ކާމިޔާބުކުރިއެވެ. މުކުރިމަގަށް ނާކާމިޔާބުވީ ފަސްވަނަ ޕެނަލްޓީ އެވެ. އޭރު ތުނޑީ ޓީމުން ފަސް ޕެނަލްޓީވެސް ކާމިޔާބުކޮށްފައިވާތީ އިތުރު ފުރުޞަތެއް ނުލިބި, ޗެމްޕިއަންކަން ތުނޑީ ޓީމަށް ލިބުނެވެ. މުކުރިމަގުގެ ފަހު ޕެނަލްޓީ އަމާޒުވީ ގޯލްގެ ހުރަސް ދަނޑި އަށެވެ.

ފައިނަލް މެޗުގެ މޮޅު ކުޅުންތެރިއަކީ މުކުރިމަގަށް ނަތީޖާ ހަމަހަމަ ކޮށްދިން އަހުމަދު ރާހިލް ރަޝީދު އެވެ. މުބާރާތުގެ އެންމެ މޮޅު ކީޕަރަކީ ތުނޑި ޓީމްގެ އަހުމަދު ރަމީޒު އެވެ. އެންމެ ގިނަ ލަނޑު ޖެހީ މުކުރިމަގުގެ އިބްރާހީމް ވަހީދު ހަސަން އެވެ. މުބާރާތުގެ އެންމެ މޮޅު ކުޅުންތެރިއަކީ ވެސް ގައުމީ ޓީމްގެ މިޑްފީލްޑަރ އިއްބެ އެވެ. އެންމެ މޮޅު ކޯޗު މުކުރިމަގުގެ އިބްރާހީމް ރަޝީދު އެވެ. އެންމެ އުއްމީދީ ކުޅުންތެރިޔަކީ ފޮނަދޫ ޓީމްގެ އިސްމާއީލް އަފާޒު އެވެ.