އެއްވެސް ޕްރޮޖެކްޓެއް ހުއްޓާލުމުގެ ވިސްނުމެއް ނެތް – އަމީރު
2022 ވަނަ އަހަރުގެ ބަޖެޓް ޕްލޭންއާއެކު ކުރިއަށްދިއުމަށް ސަރުކާރުން މަސައްކަތް ކުރަމުންދަނީ
ށ. ޅައިމަގު ބަނދަރު ހެދުމުގެ މަސައްކަތް
ޕީއެސްއައިޕީ ޕްރޮޖެކްޓްތަކުން ބައެއް ޕްރޮޖެކްޓްތައް މަޑުޖައްސާލި ނަމަވެސް މަސައްކަތް ކުރައްވަމުން ގެންދަވަނީ ބަޖެޓް ޕްލެނާއި އެއްގޮތަށް ތަރައްގީގެ ކަންކަން ކުރިއަށް ގެންދިއުމަށް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން ފިނޭންސް މިނިސްޓަރު އަމީރު ވިދާޅުވީ 2022 ވަނަ އަހަރުގެ ބަޖެޓު ޕްލޭނާއެކު ކުރިއަށްދިއުމަށް ސަރުކާރުން މަސައްކަތް ކުރަމުން ގެންދާ ކަމަށެވެ. އަދި ކޮންމެވެސް ވަރަކަށް ބަޖެޓްގައި ހިމެނޭ ޕީއެސްއައިޕީ ޕްރޮޖެކްޓްތައް ޓެންޑަރު ކުރުމާއި، މި ކަންތައްތައް ކޮންމެވެސް ވަރަކަށް މަޑުޖައްސާލައިގެން ކުރިއަށްދާ ކަމަށާއި، އެއީ ދައުލަތަށް ނުވަތަ ސަރުކާރަށް ލިބޭ އާމްދަނީ ޔަގީކުރެވޭ ހާލަތަކަށް ދިޔާމަ ކޮންމެވެސް ވަރަކަށް ޓެންޑަރުކޮށްފައި ދެންހުރި ބައިތައް މަޑުކޮށްގެން، އެގޮތަށް މެނޭޖްކުރަމުން ގެންދަވާ ކަމަށް މިނިސްޓަރު އަމީރު ވިދާޅުވިއެވެ.
ޖޫން މަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ ދައުލަތުގެ ރިކަރެންޓް ޚަރަދު، ލިބޭ އެއްޗަކުން ހަމަޖެއްސުން އެއީ ކުރައްވާނެ ކަމެއް ކަމަށާއި، އެގޮތަށް އަމާޒުހިފައި، އެގޮތަށް ކުރިއަށް ވަޑައިގަންނަވާނެ ކަމަށެވެ.
ޚަރަދު ކުޑަކުރުމުގެ ގޮތުން އެޅިފައިވާ ފިޔަވަޅުތަކުން ބަޖެޓް ކުރެވިފައި އޮތް، މޭ މަހުގެ ނިޔަލަށް 15.1 ބިލިއަން ރުފިޔާ ޚަރަދުވާނެ ކަމަށް ރައީސް ވިދާޅުވިއެވެ. އެހެން ނަމަވެސް، މޭ މަސް ނިމުނުއިރުގައި ޚަރަދުކުރީ 14.1 ބިލިއަން ރުފިޔާ ކަމަށް ރައީސް ވިދާޅުވިއެވެ. ރައީސް ވިދާޅުވީ ޚަރަދުތައް ކުޑަކުރެވިއްޖެ ކަމަށާއި، އަދި ބައެއް އައު މަޝްރޫޢުތައް ފެށުންވެސް ހުއްޓާލާފައިވާ ކަމަށެވެ. އަދި އިތުރު އައު ބޮޑު މަޝްރޫޢެއް، އަލުން ސޮއިކޮށްގެން، އަލުން ލޯނު ނަގައިގެން މިވަގުތަކު ކުރިއަކަށް ގެންދިޔުމުގެ ވިސްނުންފުޅެއް ނެތް ކަމަށާއި، މިހާރު ހަމަޖެހިފައި ހުރި ލޯނުތަކާ އެކީގައި މަޝްރޫޢުތައް ކުރިއަށްދާނެ ކަމަށެވެ.
ފާސްކުރި 2022 ވަނަ އަހަރުގެ ބަޖެޓުގައި ޑެބްޓް ފައިނޭންސިންގ ގެޕަކީ ގާތްގަނޑަކަށް 9.8 ބިލިއަން ރުފިޔާ ކަމަށާއި، އިތުރަށް ހޯދަންޖެހެނީ 2 ބިލިއަން ރުފިޔާ ކަމަށް ރައީސް ވިދާޅުވިއެވެ. އަދި އޭގެތެރެއިން 7.9 ބިލިއަން ރުފިޔާ ސެކުއަރ ކުރެވިފައި އެބަހުރި ކަމަށާއި، އިތުރަށް ހޯދަން ބޭނުންވާ ފައިސާ ހޯދުމުގެ މަސައްކަތް ކުރިއަށް ގެންދަވާ ކަމަށެވެ. އަދި ސުވާލަކީ، އެ ނުލިބިއްޖިއްޔާ ދެން ކިހިނެއްތޯ ހަދާނީ ކަމަށާއި، ކުރަންޖެހޭނެ ކަމަކީ، ބައެއް މަޝްރޫޢުތައް ހުއްޓާލުން އަދި ޚަރަދުތައް ކުޑަކޮށްފައި، ލިބޭ އެއްޗަކުން ދެކޮޅުޖެއްސުން ކަމަށާއި، އެކަން ކުރައްވާނެ ކަމަށް ވެސް އެ ނޫސްވެރިންގެ ބައްދަލުވުމުގައި ރައީސް ވިދާޅުވިއެވެ.
