ރާއްޖޭގެ ޤައުމީ ފުޓްބޯޅަ ޓީމުގެ އެސިސްޓެންޓް ކޯޗު ސިމާއޯ ކޮސްޓާއަށް ފުޓްބޯޅަ އެސޯސިއޭޝަން އޮފް މޯލްޑިވްސްއިން މުސާރަ ނުދޭތީ އޭނާ މަގާމުން އިސްތިއުފާ ދީފިއެވެ.
މަގާމުން އިސްތިއުފާ ދިންކަން ކޮސްޓާ އިއުލާނުކުރީ ބުރާސްފަތި ދުވަހުގެރޭ ދަންވަރު, ފޭސްބުކްގައި އޭނާ ކުރި ޕޯސްޓެއްގައެވެ. މި ޕޯސްޓުގައި ކޮސްޓާ ބުނީ މަގާމުން އިސްތިއުފާދިނީ ފީފާގެ ގަވައިދުތަކާއި އެއްގޮތަށް ކަމަށެވެ. އަދި މިގޮތަށް ނިންމީ އޭނާއަށް އެފްއޭއެމްއިން ދޭން ޖެހޭ މުސާރަ ނުދޭތީ ކަމަށް ކޮސްޓާގެ ޕޯސްޓުގައި ބުނެފައިވެއެވެ.
ކޮސްޓާ އިތުރަށް ބުނީ މުސާރަ ނުލިބުނު ނަމަވެސް ފާއިތުވި ހަތް މަސް ދުވަހު އޭނާ ވަރަށް ކެތްކުރި ކަމަށެވެ. އަދި އެފްއޭއެމްއިން އޭނާއަށް އެންމެ ފަހުން މުސާރަދިނީ މިދިޔަ ޖެނުއަރީ މަހުގައި ކަމަށްވެސް ކޮސްޓާ ބުންޏެވެ.
ރާއްޖޭގެ ގައުމީ ޓީމުގެ އެސިސްޓެންޓް ކޯޗުކަމާއި ކޮސްޓާ ހަވާލުވީ މިދިޔަ އަހަރުގެ ޑިސެމްބަރު މަހުއެވެ. އޭގެ ފަހުން ކުޅުނު އޮފިޝަލް ހަތަރު މެޗުގެ ތެރެއިން ދެމެޗުން ރާއްޖެ މޮޅުވިއެވެ. އަނެއް ދެ މެޗުން ބަލިވީއެވެ.
ކޮސްޓާ ބުނީ އޭނާގެ ތަޖުރިބާއާއި ހުނަރު ބޭނުންކޮށްގެން ރާއްޖޭގެ ޓީމަށް ރަނގަޅު ނަތީޖާ ނެރެދެން މަސައްކަތްކޮށްފައި ވާނެކަމަށެވެ. އަދި އެފްއޭއެމްގެ ފަރާތުންވެސް އޭނާގެ މަސައްކަތް ވަރަށް ބޮޑަށް ބަލައިގަތްކަން ފާހަގަކޮށް އޭނާ ކޮސްޓާ ބުނީ މިއަހަރުގެ ޑިސެމްބަރު މަހު އަލުން އެއްބަސްވުން އައުކުރުމަށް އެފްއޭއެމްގެ ރައީސް ބައްސާމް އަދީލް ޖަލީލް އޭނާއާއި މަޝްވަރާކުރި ކަމަށެވެ.
މުސާރަ ނުދިނުމުގެ ސަބަބުން ކޮސްޓާ މަގާމުން ދުރުވިއިރު, އެފްއޭއެމްގެ މުވައްޒަފުންނަށް މުސާރަ ނުދިނުމުގެ މައްސަލަވެސް ވަރަށް ގިނައިން ފެންމަތިވެއެވެ. ކޯޗު އިސްތިއުފާ ދިނުމާއި ގުޅޭގޮތުން އެފްއޭއެމްގެ ބަހެއް ހޯދުމަށް ރާއްޖެއެމްވީން ކުރި މަސައްކަތް ނާކާމިޔާބުވީ އެސޯސިއޭޝަންގެ މެމްބަރުން ފޯނަށް ޖަވާބުނުދޭތީއެވެ.
