ނައިބުރައީސް، ސިންގަޕޫރުގެ މިނިސްޓަރ ފޯރ ސޯޝަލް އެންޑް ފެމިލީ ޑިވެލޮޕްމަންޓާ ބައްދަލުކުރައްވައިފި
ސިންގަޕޫރަކީ ދިވެހިރާއްޖޭގެ ތަރައްގީގެ މުހިއްމު ބައިވެރިއެއް
ރައީސުލްޖުމްހޫރިއްޔާގެ ނައިބު ސިންގަޕޫރުގެ މިނިސްޓަރ ފޯރ ސޯޝަލް އެންޑް ފެމިލީ ޑިވެލޮޕްމަންޓާ ބައްދަލުކުރެއްވުން
ރައީސުލްޖުމްހޫރިއްޔާގެ ނައިބު ފައިޞަލް ނަސީމް، ސިންގަޕޫރުގެ މިނިސްޓަރ ފޯރ ސޯޝަލް އެންޑް ފެމިލީ ޑިވެލޮޕްމެންޓް، މަސަގޮސް ޒުލްކިފްލީއާ ބައްދަލުކުރައްވައިފިއެވެ.
މިބައްދަލުކުރެއްވުން އޮތީ ރައީސުލްޖުމްހޫރިއްޔާގެ ނައިބު މިހާރު ސިންގަޕޫރަށް ކުރައްވަމުންގެންދަވާ ނުރަސްމީ ދަތުރުފުޅުގެ ތެރެއިންނެވެ.
މިއަދު ބޭއްވެވި މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ، ދިވެހިރާއްޖެއާ ސިންގަޕޫރާ ދެގައުމުގެ ސަރުކާރުގެ މަތީފަންތީގެ އިސްވެރިންގެ ޒިޔާރަތްތަކުގައި ދެގައުމަށް ފައިދާހުރި ގިނަ ފަހުމުނާމާތަކެއްގައި ސޮއިކުރެވިފައިވާކަން ފާހަގަކުރައްވާފައެވެ. އަދި، ސިންގަޕޫރަކީ ދިވެހިރާއްޖޭގެ ތަރައްގީގެ މުހިއްމު ބައިވެރިއެއްކަން ފާހަގަކުރައްވައި، ދިފާއީ، އިޖުތިމާއީ، އިގުތިސާދީ ތަރައްގީއާއި، ޓެލެކޮމިއުނިކޭޝަންގެ ދާއިރާއިންނާއި، ޒުވާނުން ބާރުވެރިކުރުވުން ފަދަ ދާއިރާތަކުން އިތުރަށް ގުޅުން ބަދަހިކުރުމަށް އުންމީދުކުރައްވާކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މީގެ އިތުރުންވެސް އެމަނިކުފާނު ވަނީ، ތައުލީމީ ދާއިރާއާއި އަރލީ ޗައިލްޑްހުޑް ޑިވެލޮޕްމަންޓްގެ ދާއިރާއާ ގުޅޭގޮތުން މަޝްވަރާކުރައްވައި، މި ދާއިރާތަކުން ބޭނުންވާ ފަންނީ އެހީތެރިކަން ހޯދުމުގައި އެހީތެރިކަން ބޭނުންވާކަން ހާމަކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބާއި، އަދި ސިންގަޕޫރުގެ މިނިސްޓަރ ފޯރ ސޯޝަލް އެންޑް ފެމިލީ ޑިވެލޮޕްމެންޓްގެ ދެބޭފުޅުންވެސް ވަނީ، ބައިނަލްއަގުވާމީ މައިދާނުގައި އެއްބާރުލުން ދިނުމާއި، ދެގައުމުގެ ރައްޔިތުންގެ މެދުގައި ގުޅުންބަދަހިކުރުންފަދަ، ދެ ގައުމުންވެސް ޝައުގުވެރިވާ ދާއިރާތަކުން މަޝްވަރާކުރައްވާފައެވެ. އަދި، ދިވެހިރާއްޖެއާ ސިންގަޕޫރާ ދެމެދު މިހާރު އޮތް ގާތްގުޅުން އިތުރަށް ބަދަހިވެގެން ދިއުމަށް އުއްމީދުކުރައްވާކަމުގައިވެސް ދެބޭފުޅުން ވަނީ ވިދާޅުވެފައެވެ.
