އައްޑޫ އަދި ކުޅުދުއްފުށި ސިޓީގައި އާސަންދަ ޑެސްކެއް ޤާއިމުކޮށްފި
އެ ދެ ސިޓީގެ އިތުރުން އިތުރު ރަށްތަކުގައި މި ޚިދުމަތް ޤާއިމުކުރެވިގެންދާނެ
އާސަންދަ އޮފީސް
އައްޑޫ ސިޓީ އަދި ކުޅުދުއްފުށި ސިޓީގައި އާސަންދަ ޑެސްކެއް ޤާއިމުކޮށްފިއެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް އޮފީހުގެ ސްޕޯކްސްޕާސަން މިއުވާން މުހައްމަދު ވިދާޅުވީ އެ ދެ ސިޓީގައި މިވަގުތު ޚިދުމަތް ފެށުނު ނަމަވެސް އިތުރު ރަށްތަކުގައި މި ޚިދުމަތް ޤާއިމުކުރެވިގެންދާނެ ކަމަށް ވިދާޅުވިއެވެ.
މިއުވާން ވިދާޅުވީ މިއީ ރައްޔިތުން ވަރަށް އެދެމުންދިޔަ ޚިދުމަތެއް ކަމަށާއި މި ޚިދުމަތް ތައާރަފުކުރުމާއި ގުޅިގެން ރައްޔިތުންނަށް ލުއި ފަސޭހަވެގެންދާނެ ކަމަށެވެ.
ބޭސްފަރުވާއަށް ސަލާންޖެހުމުގެ ޒަމާންވީ އާދަ ނައްތާލައި އަބުރުވެރި ފަސޭހަ ދުޅަހެޔޮ ދިރިއުޅުމެއް ދިވެހީންނަށް ތަނަވަސްކޮށްދިނުމުގެ ގޮތުން އެމްޑީޕީގެ ފުރަތަމަ ސަރުކާރުން ދިވެހިރާއްޖެއަށް ގެނައި އެންމެ ބޮޑު އިންގިލާބަކީ އާސަންދައިގެ ނަމުގައި އެންމެހައި ދިވެހިން ޝާމިލްވާ ވެލްފެއަރ ނިޒާމެއް ގާއިމް ކުރުމެވެ. މި ނިޒާމް ގާއިމް ކުރެވި އޭގެ މަންފާ އެންމެހައި ދިވެހިން ލިބިގަންނަތާ މިދިޔަ އަހަރު ވަނީ ދިހަ އަހަރު ފުރިފައެވެ.
ކުންފުނީގެ ފާއިތުވީ ދިހަ އަހަރުގެ މާޒީގައި އިދާރީގޮތުންނާއި ނިޒާމީގޮތުން އެކި ކަހަލަ ބަދަލުތައް ވަނީ ގެނެވިފައެވެ. 1 މާރޗް 2015ން ފެށިގެން އާސަންދަ ކޮމްޕެނީ ލިމިޓެޑްގެ ހުރިހާ ހިއްސާއެއް ސަރުކާރުން ގަނެ ސައްތައިންސައްތަ ސަރުކާރު ކުންފުންޏެއްގެ ގޮތުގައި ވަނީ ހިންގުން ބަދަލުކުރެވިފައެވެ. ކުންފުނީގެ ޚިދުމަތްތައް ފުޅާކުރުމުގެ ގޮތުން ހުޅުމާލެ ހޮސްޕިޓަލު ހިންގުން އާސަންދަ ކޮމްޕެނީއާ 3 އެޕްރީލް 2016 ގައި ހަވާލުކުރެވުނެވެ.
މި ބަދަލާއެކު ހުޅުމާލެ ހޮސްޕިޓަލަކީ ކުރިއަރާފައިވާ ފެންވަރު ރަގަޅު ސްޕެޝަލިސްޓް ފަރުވާދޭ މަރުކަޒެއްގެ ގޮތުގައި ތަރައްގީކޮށް ހޮސްޕިޓަލަށް ބޮޑެތި ރަނގަޅު ބަދަލުތަކެއް އާސަންދައިން ވަނީ ގެނެސްފައެވެ. އެގޮތުން 2016ން 2019 ޑިސެމްބަރު 31 ގެ ނިޔަލަށް ހުޅުމާލެ ހޮސްޕިޓަލު ހިންގަމުން އައީ އާސަންދަ ކުންފުނީގެ ދަށުންނެވެ.
ސްރީލަންކާ، އިންޑިއާ އަދި މެލޭޝިއާގައި ދިރިއުޅޭ ދިވެހި ރައްޔިތުންނަށް ސިއްހީ ޚިދުމަތް ހޯދުމުގައި މާލީގޮތުން ލުއިފަސޭހަ ގޮތްތަކެއް ހޯދައިދިނުމުގެ މަގުސަދުގައި 'މެރަނާ' ސްކީމް ގެ ނަމުގައި އާސަންދަ ކުންފުނިން 2019 ވަނަ އަހަރުގެ އޭޕްރީލް މަހު ސްކީމެއް ވަނީ ތައާރަފްކޮށްފައެވެ. 27 ސެޕްޓެމްބަރު 2020 ގައި އާސަންދަަ މޮބައިލް އެޕްލިކޭޝަން ވަނީ ލޯންޗްކުރެވިފައެވެ.
އެޕް އަމާޒުކޮށްފައިވަނީ އާސަންދަ ސްކީމްގެ ޚިދުމަތް ހޯދާ ދިވެހި އެންމެހާ ރައްޔިތުންނަށެވެ. އާސަންދަ ސްކީމްގެ ދަށުން ޚިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އައު އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ޚިދުމަތްތަކުގެ ތަފްސީލު މި އެޕުން ފެންނަން ހުންނާނެއެވެ. ޑޮކްޓަރުން ލިޔެދޭ އީ-ޕްރިސްކްރިޕްޝަން ނުވަތަ އިލެކްޓްރޯނިކް ބޭސް ސިޓީތައްވެސް އެޕް މެދުވެރިކޮށް ބަލާލެވޭނެއެވެ.
