ފުރަތަމަ މެޗުގައި ބަންގްލަދޭޝް އަތުން ރާއްޖެ ބަލިވެއްޖެ
7 ސެޕްޓެމްބަރު 2022 | ބުދަ 12:28ސެމީގެ ޖާގަ ހޯދުމުގެ ފުރުސަތު ރާއްޖެއަށް އެބައޮތް
ރާއްޖެއާއި ބަންގްލަދޭޝް ބައްދަލުކުރި މެޗުގެ ތެރެއިން
17 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ކުޅުނު ފުރަތަމަ މެޗުގައި ބަންގްލަދޭޝް އަތުން ބަލިވެއްޖެއެވެ.
މުޅި މެޗު ކޮންޓްރޯލް ކޮށްގެން ކުޅުނު ބަންގްލަދޭޝް މި މެޗުގައި ރާއްޖެ ކޮޅަށް ފަސް ލަނޑު ޖެހިއެވެ. ބަންްލަދޭޝްގެ މިރަޖުލް އިސްލާމް ވަނީ މި މެޗުގައި ރާއްޖެ ކޮޅަށް ތިން ލަނޑުޖަހާ ހެޓްރިކް ހަދާފައެވެ. އެޓީމުގެ އަނެއް ދެލަނޑު ޖެހީ ނަޒްމުލް ހުދާ ފައިސަލްއާއި އެމްޑީ މުރްޝިދް އަލީއެވެ.
މި މެޗުގައި ބަންގްލަދޭޝްގެ ގޯލް އަށް އަމާޒުކޮށް ރާއްޖެ ޓީމުން ފޮނުވާލެވިފައިވަނީ އެންމެ ހަމަލާއެކެވެ. ބަންގްލަދޭޝްއިން ރާއްޖެކޮޅަށް ނުރައްކާތެރި 13 ހަމަލާ ފޮނުވާލިއެވެ. މެޗުގައި ގިނަ ފުރުސަތުތަކެއް ތަނަވަސްކޮށް މޮޅަށް ކުޅުނީ ބަންގްލަދޭޝް ޓީމުންނެވެ.
މިއީ ބަންގްލަދޭޝް މުބާރާތުގައި ކުޅުނު ދެވަނަ މެޗެވެ. މުބާރާތުގެ ފުރަތަމަ މެޗުގައި ބަންގްލަދޭޝް ވާދަކުރީ މުބާރާތް ބާއްވާ ސްރީލަންކާއާއެވެ. މި މެޗުން ބަންގްލަދޭޝް މޮޅުވީ 4-1ންނެވެ.
މި ނަތީޖާއާއެކު ބަންގްލަދޭޝްއަށް ވަނީ މުބާރާތުގެ ސެމީ ފައިނަލުގެ ޖާގައެއް ޔަގީންވެފައެވެ. ހަ ގައުމުން ވާދަކުރާ މި މުބާރާތުގައި ރާއްޖެއާއި އެއް ގްރޫޕެއްގައި ހިމެނެނީ ބަންގްލަދޭޝްއާއި ލަންކާއެވެ. ކޮންމެ ގްރޫޕަކުންވެސް ސެމީ ފައިނަލަށް ދަތުރުކުރާނީ ގްރޫޕް ސްޓޭޖު ނިމޭއިރު އެންމެ މަތިން ޕޮއިންޓު ހޯދާ ދެޓީމެކެވެ. އެހެންކަމުން ރާއްޖެއަށްވެސް ސެމީގެ ޖާގައެއް ހޯދުމުގެ ފުރުސަތު އަދި އެބައޮތެވެ.
