ޖަނަވަރީ މަގާއި މަޖީދީ މަގު ގުޅޭ ހިސާބުގައި މެއި 2 ވަނަ ދުވަހު ހެނދުނު ހިންގި މާރާމާރީއާ ގުޅިގެން ހައްޔަރުކޮށް ދައުވާ އުފުލާފައިވާ މީހުންގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މިއީ މި މައްސަލައިގެ ދެވަނަ އަޑުއެހުމެވެ. އެގޮތުން މި މައްސަލައިގައި 6 މީހެއްގެ މައްޗަށް ދައުވާ އުފުލާފައިވެއެވެ. އެ އެންމެންވެސް މިވަގުތު ތިބީ ޝަރީއަތް ނިމެންދެން ބަންދުގައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ސޮފްވަތު ޙަބީބެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ދައުލަތުން ވަނީ ދައުވާ އިއްވާފައެވެ. އެގޮތުން ލޫތު އަހުމަދު އާސިފް، މައުސޫމު މުޙައްމަދު ދީދީ އަދި އަހުމަދު ސާތިއުގެ މައްޗަށް އުފުލާފައިވާ ދައުވާއަކީ މީހަކަށް ނުރައްކާތެރި ހަނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުުގެ ކުށުގެ ދައުވާއެވެ. އޭގެ އިތުރުން، ޙަސަން ޒިޔާން އިބްރާހިމްއާއި، އަހުމަދު ސިމްހާޒްގެ އިތުރުން، އަހުމަދު ނާޒިހުގެ މައްޗަށް އުފުލާފައިވާ ދައުވާއަކީ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މަރާމާރީ ހިންގުމުގައި ބައިވެރިވުމުގެ ކުށުގެ ދައުވާއެވެ.  

މާރާމާރީ ހިންގުމުގެ ދައުވާތައް ސާބިތުވެއްޖެނަމަ 10 އަހަރާއި 15 އަހަރާއި ދެމެދުގެ ޖަލު ޙުކުމެއް އަންނާނެއެވެެ. އަދި މާރާމާރީ ހިންގުމުގައި ބައިވެރިވުމުގެ ކުށް ސާބިތުވެއްޖެނަމަ އަންނާނީ 7 އަހަރާއި 10 އަހަރާ ދެމެދުގެ ޖަލު ޙުކުމެކެވެ.

ބުދަ ދުވަހުގެ އަޑުއެހުމުގައި އޮތީ ދައުލަތުން ހުށައަޅާފައިވާ ދައުވާތަކަށް ދިފާއުން ޖަވާބުދާރީވުމެވެ. އެހެންނަމަވެސް، ދައުލަތުން ލިއެކިއުންތައް ހިއްސާކުރުން ލަސްވުމާއި ގުޅިގެން މި އަޑުއެހުމުގައި ދައުވާތަކަށް ޖަވާބުދާރީވެވިފައެއް ނުވެއެވެ. އެގޮތުން މިއީ ގިނަ ލިއެކިއުންތަކެއް ދިރާސާކުރަން ޖެހޭ މައްސަލައެއްކަން ދިފާއުން ފާހަގަ ކުރެއެވެ.

އޭގެ އިތުރުން، ދައުލަތުން އެދިފައިވާ ގޮތަށް މި އަޑުއެހުމުގައި ވަނީ ހެކި ރައްކާތެރި ކުރުމުގެ އަމުރެއްވެސް ނެރުއްވާފައެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ދިފާއުން ވަނީ ދައުވާލިބޭ ފަރާތްތައް ރިމާންޑް ޖަލަކަށް ބަދަލު ކުރެވިފައި ނުވާތީ އެކަމުގެ ކަންބޮޑުވުން ފާޅުކޮށްފައެވެ. އެ ދުވަހު ދައުލަތުން ވަނީ އެކަމާއި ގުޅިގެން ބަލަންޖެހޭ ކަންކަން ބަލާނެކަމަށް ފާހަގަކޮށްފައެވެ. ބުދަ ދުވަހުގެ އަޑުއެހުމާއި ހަމައަށްވެސް އެ ފަރާތްތައް ރިމާންޑު ޖަލަށް ބަދަލު ކުރެވިފައިނުވާތީ ދިފާއުން ވަނީ އަނެއްކާވެސް އެކަމުގެ ކަންބޮޑުވުން ފާޅުކޮށްފައެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، އެކަމާ ގުޅިގެން ދައުލަތުން މޯލްޑިވްސް ކަރެކްޝަނަލް ސަރވިސަސްއަށް ސިޓީވެސް ފޮނުވާފައިވާނެ ކަމަށެވެ.