ކުދިންގެ ޅަ އުމުރުގައި އެކުދިންގެ އާއިލާ ރޫޅިގެންދިއުމަކީ ކުދިންނަށް އެތައް ގޮތަކުން އަސަރުކުރާނެ ކަމެކެވެ. މައިންބަފައިންގެ ގާތުގައި އުޅެމުން ހެދި ބޮޑުވެގެން އައިސް ވަކި ހިސާބަކުން އެމީހުންނާ ވަކިން ދިރިއުޅެން ޖެހުމުން ވާނެ ހިތްދަތިކަމަކީ އެކަން ތަހައްމަލްކުރަންޖެހިފައިނުވާ ބަޔަކަށް އެނގޭނެ އިހުސާސެއް ނޫނެވެ. އެހެންނަމަވެސް އެކުދިންގެ އިހުސާސްތައް އަހަރެމެންނަށް ދެނެގަނެވިދާނެއެވެ. މިފަދައިން އާއިލާއާ ވަކިން ދިރިއުޅެންޖެހި، އެތައް ކަމެއް ތަހައްމަލުކުރަންޖެހިފައިވާ ކުއްޖެއްގެ ވާހަކަ ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ވަނީ ހިއްސާކޮށްފައެވެ.
އުމުރުން 15 އަހަރުގެ އައިޝާއަކީ ކިޔަވަން މޮޅު, ތޫނުފިލި، އަދި މުސްތަގުބަލަށް ގިނަ ހުވަފެންތަކެއް ދެކެމުންދާ، ބަސް އަހާ ކުއްޖެކެވެ. އުފާވެރި ދިރިއުޅުމެއް ވޭތު ކުރަމުންދިޔަ އައިޝާގެ ދިރިއުޅުން ބަނަވީ މަންމައާއި ބައްޕަ ވަރިވާން ނިންމައި ދެމީހުން ދެ ހިސާބެއްގައި ދިރިއުޅުމަށް ނިންމި ހިސާބުންނެވެ. މިއަދު އައިޝާ ދިރިއުޅެމުންދަނީ ގިނަ ތަކުލީފުތަކަކާއެކުގައެވެ. އޭނާ ދިރިއުޅޭ މާހައުލު 3 މަހުން ކަހަލަ ގޮތަކަށް ބަދަލުކުރަންޖެހެއެވެ. އެހެންކަމުން ގާތް ރައްޓެހިން ގެއްލި، ކިޔެވުން މަތިން ފޫހިވެ، އަމިއްލަ ނަފްސަށް އިތުބާރު ކުރަން މިއަދު އައިޝާ ޖެހިލުންވެއެވެ. މީހުންނާ ކުރިމަތިލައި ވާހަކަދެއްކުމަށް ފަސްޖެހެއެވެ.
މިފަދަ މައްސަލަތަކާ ގުޅޭގޮތުން ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ ޗައިލްޑް ޕްރޮޓެކްޝަން އޮފިސަރ ފާތިމަތު މިންހާ ވިދާޅުވީ، މިފަދަ މައްސަލަތަކުގެ ސަބަބުން ކުދިންނަށް ވަރަށް ބޮޑަށް ނަފްސާނީގޮތުން އަސަރުކުރާކަމަށެވެ. މިފަދަ ކަންކަން ހައްލުކުރުމުގައި ބެލެނިވެރިންގެ އެއްބާރުލުމާއި އެހީތެރިކަން ވަރަށް ބޮޑަށް ބޭނުންވާ ކަމަށެވެ.
އައިޝާގެ އިތުރުން އޭނާގެ އެއްބަނޑުއެއްބަފާ ކޮއްކޮވެސް ދަނީ ހަމަ މިކަންކަން ތަހައްމަލުކުރަމުންނެވެ. ކޮއްކޮ ބެލުމަކީވެސް އައިޝާގެ ޒިންމާއެއްކަމަށް އޭނަ ގަބޫލުކުރެއެވެ. އައިޝާއާއި އޭނާގެ ކޮއްކޮ އުފުލަމުންދާ މިތަކުލީފުތަކަކީ މަންމައާއި ބައްޕަ ދުރުވުމަށްވުރެ، ދެ މީހުންގެ ފަރާތުން ލިބެންޖެހޭ ލޯތްބާއި އަޅާލުން ނުލިބުމުގެ ސަބަބުން އުފުލަންޖެހިފައިވާ ތަކުލީފުތަކެކެވެ.
މައިންބަފައިން ދުރުވެ، ނިންމާ ނިންމުންތަކުގެ ސަބަބުން އެ ދެމީހުންނަށް ލިބިފައިވާ ކުދިންނަށް ނަފްސާނީގޮތުންނާއި ޖިސްމާނީ ގޮތުން އެތަކެއް ނޭދެވޭ އަސަރެއް ކުރެއެވެ. އުންމީދީ މުސްތަގުބަލަކާއި ފޮނި ހުވަފެންތަކެއް ދެކެމުންއައިސް އެ ހުވަފެންތަކާއި، އުންމީދުތައް ފުސްވާން ފަށައެވެ. ދިރިއުޅުމަކީ އުނދަގޫކަމެއް ކަމަށް ޅައުމުރުގައި ގަބޫލުކުރަންފަށައެވެ. މިފަދަ މައްސަލަތައް މަދުކުރެވޭނީ ބެލެނިވެރިންގެ މެދުގައި ވާހަކަ ދެކެވި ކުދިންގެ މުސްތަގުބަލަށް ހެޔޮ އަސަރު ކުރާނެ ގޮތަށް ނިންމުންތައް ނިންމައިގެންނެވެ. އަދި ކުދިންނާ އޮންނަ ގުޅުން އެގޮތުގައި ދަމަހައްޓައިގެންނެވެ.
