އެކި މުއައްސަސާތަކުގެ ނަމުގައި ސްކޭމް މެސެޖުތައް ފޮނުވާތީ ސަމާލުވުމަށް ފުލުހުން އެދިއްޖެއެވެ.
ދިވެހި ފުލުހުންގެ ޚިދުމަތުން އަންގާރަ ދުވަހު ކުރި ޓްވީޓެއްގައި ވަނީ، ސްކޭމް މެސެޖުތަކެއް ކުރަމުންދާކަމުގެ ރިޕޯޓް އެ އިދާރާއަށް ލިބިފައިވާކަމަށެވެ. މީގެތެރޭގައި ފުލުހުން ހިމެނޭހެން، އެކި އިދާރާތަކުގެ ނަމުގައިވެސް މެސެޖުތައް ފޮނުވަމުންދާކަން ވަނީ ފާހަގަކޮށްފައެވެ.
މި މައްސަލަތައް ފުލުހުން ބަލަމުންދާއިރު، މިފަދަ މެސެޖެއް ލިބިއްޖެނަމަ އޭގައިވާ ލިންކަށް ނުފިތުމަށް އެ އިދާރާއިން ވަނީ އިލްތިމާސްކޮށްފައެވެ. އަދި އެފަދަ މެސެޖެއް ލިބިއްޖެނަމަ އޮންލައިން ކްރައިމް ރިޕޯޓިންގ ޕޯޓަލް މެދުވެރިކޮށް ނުވަަތަ ހޮޓްލައިނަށް ގުޅައިގެން އެ މައްސަލަ ރިޕޯޓްކުރުމަށް ވަނީ އެދިފައެވެ.
މިފަދަ މެސެޖުތައް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަމުގައި ފޮނުވާތީ، އެ ކުންފުނިންވެސް ވަނީ ސަމާލުވުމަށް އިލްތިމާސްކޮށްފައެވެ. އެގޮތުން "ހިޔާ ސޭފްޓީ ޕޯޓަލް"އަށް ވަނުމަށްކަމަށް ބުނެ ލިންކުތަކެއް ފޮނުވާކަމަށާއި އެޗްޑީސީން އެފަދަ އެއްވެސް މެސެޖެއް އާއްމުންނަށް ނުފޮނުވާނެކަމަށް އެ ކުންފުނިން ވަނީ ބުނެފައެވެ.
މީގެ އިތުރުން ހިޔާ ސޭފްޓީ ޕޯޓަލެއް އެޗްޑީސީން ހަދާފައި ނުވާނެކަމަށާއި އެ ލިންކަށް ނުފިތުމަށް އެ ކުންފުނިންވެސް ވަނީ އިލްތިމާސްކޮށްފައެވެ.
ފުލުހުން ހިއްސާ ކޮށްފައިވާ ފޮޓޯތަކުގައި މިފަދަ މެސެޖުތަކުގައި ޚިދުމަތެއް ހޯދުމުގެ ނަމުގައި ލިންކުތަކެއް އެޓޭޗްކޮށް ފޮނުވައެވެ. އަދި ފުލުހުންގެ ނަމުގައި ފޮނުވަނީ ފްރޯޑް ކޯލްތަކާއި މެސެޖުތައް ރިޕޯޓްކުރާ ލިންކެއް ކަމަށް ބުނެއެވެ.
