އޭޝިއަން ނެޓްބޯޅަ ޗެމްޕިއަންޝިޕްގެ ދެ ވަނަ ބުރުގެ ފުރަތަމަ މެޗުން ދިވެހިރާއްޖެ ބަލިވެއްޖެއެވެ.

މުބާރާތުގެ ދެ ވަނަ ބުރުން ރާއްޖެ ޖާގަ ހޯދާފައިވަނީ ގްރޫޕްގެ ދެ ވަނަ ޓީމުގެ ގޮތުގައެވެ. އެ ގްރޫޕްގައި ސިންގަޕޫރާ ދެކޮޅަށް ކުޅުނު މެޗުން ބަލިވި ނަމަވެސް، ރާއްޖެއިން ވަނީ ފަހު މެޗުގައި ޖަޕާން ބަލިކޮށްފައެވެ.

ދެ ވަނަ ބުރުގައި ރާއްޖެ ހިމެނިފައިވަނީ ބުރުނާއި، ތައިލެންޑް އަދި ފިލިޕީންސްއާ އެއް ގްރޫޕެއްގައެވެ. ގްރޫޕްގެ ފުރަތަމަ މެޗުގައި އަންގާރަ ދުވަހު ރާއްޖެއިން ނިކުތީ ފިލިޕީންސްއާ ދެކޮޅަށެވެ. އެ މެޗުގައި ފިލިޕީންސް އިން ވަނީ 59-41 އިން ރާއްޖޭގެ މައްޗަށް ކުރި ހޯދާފައެވެ. މެޗު ފެށިގެން ލީޑު ކުރަމުން ދިޔައީ ފިލިޕީންސް އިންނެވެ. މެޗުގެ ފުރަތަމަ ކުއާޓާ އާއި ދެ ވަނަ ކުއާޓާ ނިމުނުއިރު ފިލިޕީންސް އިން ލީޑު ކުރަމުން ދިޔައީ 27-15 އިންނެވެ. މި ބުރުގައި ރާއްޖެއަށް ބާކީ އަދި ދެ މެޗު އެބަ އޮތެވެ. އެއީ ބުރުނާއި އާއި ތައިލެންޑާ ދެކޮޅަށް ކުޅޭ މެޗެވެ.

މި ގްރޫޕްގައި ހިމެނޭ ކޮންމެ ޓީމެއް ކޮންމެ ޓީމަކާ ވާދަކުރުމަށްފަހު، ގްރޫޕްގެ އެއް ވަނަ ޓީމާއި ދެ ވަނަ ޓީމު ޖެހޭނީ ފަސް ވަނަ އަދި ހަ ވަނަ ހޮވާ މެޗު ކުޅޭށެވެ. އަނެއް ދެ ޓީމު ޖެހޭނީ ހަތް ވަނަ އަދި އަށް ވަނަ ޓީމު ހޮވާ މެޗު ކުޅޭށެވެ.

ޖުމުލަ 11 ގައުމަކުން ވާދަކުރާ މި މުބާރާތް ކުރިއަށްދާނީ ސެޕްޓެމްބަރު މަހުގެ 11އާ ހަމައަށެވެ. މުބާރާތުގައި ވާދަކުރާ ގައުމުތަކަކީ: ރާއްޖެ، ސްރީލަންކާ، އިންޑިއާ، ސިންގަޕޫރު، މެލޭޝިއާ، ފިލިޕީންސް، ޖަޕާން، ޗައިނީސް ތައިޕޭ، ބުރުނާއި، ހޮންގކޮންގ އަދި ތައިލެންޑެވެ.