ޔުޓިލިޓީ ޚިދުމަތްތައް ގޭގެ ވެރިފަރާތުގެ ނަމުގައި ރެޖިސްޓްރީކޮށްފައި ހުރުން ކުންފުނިތަކަށް ގޮންޖެހުމަކަށް
ޔުޓިލިޓީ ރެގިއުލޭޓްރީ އޮތޯރިޓީގެ ޤާނޫނަށް ހުށަހަޅާފައިވާ އިސްލާހުތަކަކީ ކަސްޓަމަރުންނާއި ޚިދުމަތް ދޭ ފަރާތަށް މަންފާ ވާނެ އިސްލާހުތަކެއް - ކުންފުނިތައް
އެންވައިރޮމެންޓް އެންޑް ކްލައިމެޓް ޗޭންޖް ކޮމިޓީ
ޔުޓިލިޓީ ޚިދުމަތްތައް ގޭގެ ވެރިފަރާތުގެ ނަމުގައި ރެޖިސްޓްރީކޮށްފައި ހުރުމަކީ ޔުޓިލިޓީ ޚިދުމަތްދޭ ކުންފުނިތަކަށް ދިމާވާ ވަރަށް ބޮޑު ގޮންޖެހުމެއް ކަމަށް ޔުޓިލިޓީ އޮތޯރިޓީ އާއި ޔުޓިލިޓީ ޚިދުމަތްދޭ ކުންފުނިތަކުން ބުނެފިއެވެ.
އެ ފަރާތްތަކުން މިފަދައިން ބުނީ ޔުޓިލިޓީ ރެގިއުލޭޓްރީ އޮތޯރިޓީގެ ޤާނޫނަށް ހުށަހަޅާފައިވާ އިސްލާހަށް މަޝްވަރާކުރުމަށް ބޭއްވި ރައްޔިތުންގެ މަޖިލީހުގެ އެންވައިރަމެންޓް އެންޑް ކްލައިމެޓް ޗޭންޖް ކޮމިޓީގެ ބައްދަލުވުމުގައެވެެ. އެ ބައްދަލުވުމުގައި ޔުޓިލިޓީ އޮތޯރިޓީގެ އިތުރުން، ފެނަކަ، ސްޓެލްކޯ އަދި އެމްޑަބްލިއުއެސްސީ އިން ވަނީ ބައިވެރިވެފައެވެ. ޔުޓިލިޓީ އޮތޯރިޓީ އިން ވަނީ މިހާރު ބިލް ކުރަމުން ދަނީ އިމާރާތުގެ ވެރި ފަރާތަށް ކަމަށާއި އޭގެ ސަބަބުން ޚިދުމަތްދޭ ކުންފުނިތަކަށް ދިމާވާ ދަތިތަކެއް ހުރި ކަމަށް ފާހަގަކުރައްވާފައެވެ. ބިލް ނުދައްކައިފި ނަމަ ވެރި ފަރާތުން ޒިންމާ ވާގޮތަށް އޮތުމުން، ބިލް ނުދައްކާ ފަރާތްތަކާއި މެދު ފިޔަވަޅު އެޅުމަށް ދަތިވާކަން ޔުޓިލިޓީ ޚިދުމަތްދޭ ކުންފުނިތަކުން ވެސް ވަނީ ފާހަގަކޮށްފައެވެ. އަދި ސަބްސިޑީ ދޭން ޖެހޭ ފަރާތްތަކަށް ސަބްސިޑީ ދިނުމުގައި ވެސް އެކަމުގެ ސަބަބުން ދަތިތަކާއި ދިމާވާކަމަށް ކުންފުނިތަކުން ވަނީ ބުނެފައެވެ. ގޭގެ ވެރިފަރާތުގެ ނަމުގައި ޚިދުމަތްތައް ރެޖިސްޓްރީ ކުރުމުގެ ބަދަލުގައި ޚިދުމަތް ހޯދާ ފަރާތުގެ ނަމަށް ޚިދުމަތުގެ ރެޖިސްޓްރީ ބަދަލުކުރުމުން ކަސްޓަމަރުންނަށް ވެސް ފަސޭހަވެގެންދާނެ ކަމަށް ޔުޓިލިޓީ ކުންފުނިތަކުން ބުނެއެވެ.
ޔުޓިލިޓީ ރެގިއުލޭޓްރީ އޮތޯރިޓީގެ ޤާނޫނަށް ހުށަހަޅާފައިވާ އިސްލާހަކީ އާންމު ބޭނުންތަކުގެ އެކި ޚިދުމަތްތަކުން ޚިދުމަތް ހޯދާ ފަރާތްތަކަށް ބިލުކުރާ މުއްދަތު ތަފާތުވުމުގެ ސަބަބުން ހިދުމަތް ހޯދާ ފަރާތްތަކަށް ބިލު ދެއްކުމުގައިގައިދިމާވާ ގޮންޖެހުންތަކަށް ލުއިތައް ހޯދައިދިނުމަށްޓަކައި ހުށަހަޅާފައިވާ ބިލެކެވެ. އަދި ބިލުކުރުމާ ގުޅިގެން ދިމާވާ މައްސަލަތައް ދެ ފަރާތުގެ ޙައްގުތައް ޙިމާޔަތްކުރެވޭނެ ގޮތަށް ޙައްލުކުރުމަށްޓަކައި، ބިލިންގ ސައިކަލް ކަނޑައެޅުމާގުޅޭއުސޫލުތަކާއި، ފައިސާ ދެއްކުމަށް ދޭންޖެހޭނެ މުއްދަތެއް ކަނޑައެޅުމާއި، ބިލު ދެއްކުމުގައި ލުއިތައް ދެވޭނެ ޙާލަތްތަކާއި ގޮތްތަކާބެހޭ އުސޫލުތަކާއި، ބިލު ނުދެއްކުމުގެ ސަބަބުން ހިނގާ ޖޫރިމަނާ ކަނޑައެޅުމުގެ އުސޫލުތަކާއި، ބިލު ނުދެއްކުމުގެ ސަބަބުން ޚިދުމަތް މެދުކަނޑާލަންޖެހޭ ޙާލަތްތަކަކީ ކޮބައިކަމާއިއެފަދަ ޙާލަތެއް މެދުވެރިވެއްޖެ ނަމަ އެ ޙާލަތްތަކުގައި ކޮންމެހެން އަމަލު ކުރަންޖެހޭ އިޖުރާއަތުތައް ކަނޑައެޅުމަކީ ވެސް ބިލުގެ މަގްސަދުތަކުގެ ތެރޭގައި ހިމެނޭ ކަމެކެވެ.
