މިޞްރުގެ ފުރަތަމަ އަންހެން މެޓްރޯ ޑްރައިވަރުންގެ ފޮނި އުއްމީދާއި އެއްވަރަށް އަޒުމުވެސް ވަރުގަދަ!

20 މިލިއަނަށް ވުރެ ބޮޑު އާބާދީއަކަށް ޚިދުމަތްތައް ފުޅާ ކުރުމަށް މިޞްރުން ވަމުންދާ ތައްޔާރީތަކުގެ ތެރެއިން، ކައިރޯ މެޓްރޯގެ ރޭލުތައް ދުއްވުމަށް، ފުރަތަމަ ފަހަރަށް އަންހެން ޑްރައިވަރުންނަށް ފުރުޞަތު ދީ، ގިނަ ބަޔަކު އާޝޯޚް ކުރުވައިފިއެވެ. ރަސްމީ ސިފައެއްގައި އަންހެނުން މިފަދަ ވަޒީފާ އަދާ ކުރާތީ މިޞްރުން ފެނުމަކީ އެހާ އާންމު ކަމަކަށް ނުވާތީއެވެ.

މިދިޔަ އޭޕްރިލް މަހުން ފަށައިގެން ޑްރައިވަރު ކެބިންގެ ކޮންޓްރޯލް، އަންހެން ޑްރައިވަރުން ނަގާތީ ކޮންމެވެސް ވަރަކަށް އެކި މީހުންނަށް ވާނީ ފެނިފައެވެ. އެންމެ ފުރަތަމަ އަންހެން ޑްރައިވަރުންގެ ގޮތުގައި ރަސްމީކޮށް ރެކްރޫޓު ކުރި 2 ޑްރައިވަރުން ބުނާ ގޮތުގައި، ޑްރައިވަރުގެ ސީޓުން އެމީހުން ފެނުމުން، ބައެއް މީހުން ނުރުހުންވެ، ބޭ އިޚްތިޔާރުގައި ބުމަ އަރުވާލާކަމަށެވެ. ކަން މިހެން އޮތް ނަމަވެސް، އެ 2 މީހުންގެ މި މަސައްކަތަކީ، އިތުރު އަންހެނުންނަތަކަށް އެފަދަ ވަޒީފާތައް އިތުރަށް ތަނަވަސް ވުމަށް އެހީވެދޭނެ ކަމެއް ކަމަށްވެސް އެމީހުން އުއްމީދު ކުރެއެވެ.

ހިންދު މަޙްމޫދާއި ސޫޒަން އަހުމަދަށް ތަމްރީނު ދިނީ، މިޞްރުގައި 3 ވަނައަށް ގާއިމު ކުރި މެޓްރޯލައިން އޮޕަރޭޓް ކުރާ އާރްއޭޓީޕީ ޑޭވް މޮބޮލިޓީ ކައިރޯ (އާރްޑީއެމްސީ) ކުންފުނިންނެވެ.

ހިންދާއި ސޫޒަން، މެޓްރޯގެ ހުންގާނު ނެގުމަށް ތަމްރީނު ވާތާ އެތައް މަހެއް ފާއިތުވެއްޖެއެވެ.

މިދިޔަ މަސްތަކަށް ބަލާއިރު، މިޞްރުގެ ޓްރާންސްޕޯރޓް އޮތޯރިޓީއިން ވަނީ، ވެރިރަށް ޤާޚިރާގެ އެކި ސަރަހައްދުތަކަށް ގުޅާލުމަށްޓަކާ މެޓްރޯލްގެ އާ ލައިންތަކެއް ހުޅުވާފައެވެ.

1987 ވަނަ އަހަރު ތަޢާރަފު ކުރި ކައިރޯ މެޓްރޯއަކީ އަރަބި ދުނިޔޭގެ ޤައުމުތަކަށް ބަލާއިރު އެންމެ ޒަމާންވީ މެޓްރޯއެވެ. ނަމަވެސް އަންހެން ޑްރައިވަރުންނަށް ފުރުޞަތު ދިނުމުގައި، ޢަރަބި ދުނިޔޭގެ އެހެން ޤައުމުތަކަށް ވުރެ މިޞްރުގެ މެޓްރޯ އޮތީ އިންތިހާ ފަހަތުގައެވެ.

މިޞްރު މެޓްރޯގައި މިވަގުތި 78 ޑްރައިވަރަކު މަސައްކަތް ކުރަމުން ދާ އިރު، ކުންފުނިން އަމާޒު ހިފާފައި ވަނީ ކުރިއަށް އޮތް މަދު މަސްކޮޅެއްގެ ތެރޭގައި އަންހެން ޑްރައިވަރުންގެ އަދަދު އިތުރު ކުރުމަށެވެ.