ރާއްޖޭގެ އެންމެ ބާރު އަންހެން ދުވުންތެރިޔާ އާއިޝަތު ހިމްނާ ހަސަން ތިން އަހަރުގެ ސްކޮލަރޝިޕެއްގައި މިމަހު ޖެމެއިކާއަށް ފުރާނެއެވެ.

އެތުލެޓިކްސް އެސޯސިއޭޝަނުން ބުނީ މިނިސްޓްރީއާއި, އޮލިމްޕިކް ކޮމިޓީއާއި އެސޯސިއޭޝަން ގުޅިގެން ހިމްނާއަށް ފުރުސަތު ހޯދައިދީފައިވާކަމަށެވެ. އަދި މިހާރު ކުރަމުންދަނީ ވިސާ ހަމަޖެއްސުމުގެ ކަންކަން ކަމަށް އެސޯސިއޭޝަންގެ ޖެނެރަލް ސެކެޓްރީ އަހުމަދު މުންތަގިމް ވިދާޅުވިއެވެ. 20 އަހަރުގެ ހިމްނާއަކީ އެތުލެޓިސްގެ މުސްތަގުބަލެއް އޮތް އެތްލީޓެއްކަން މުންތަގިމް ފާހަގަކުރެއްވިއެވެ. އޭނާ ވިދާޅުވީ ސާއިދު ފަދައިން ހިމްނާވެސް ސްކޮލަރޝިޕްގެ މުއްދަތުގައި ކުރިއެރުންތައް ހޯދައި، ރަނގަޅު ކާމިޔާބީތަކެއް ހޯދާނެކަމަށް އުއްމީދުކުރައްވާކަމަށެވެ. ރާއްޖޭގެ އެންމެ ބާރު ދުވުންތެރިޔާ ސާއިދު އަހުމަދުވެސް ތަމްރީނު ހޯދީ ޖެމެއިކާއިންނެވެ.

ހިމްނާ ބުނީ ސްކޮލަރޝިޕްގެ ފުރުސަތުގެ ބޭނުން އެންމެ ރަނގަޅަށް ހިފާނެކަމަށާއި, މިއީ ކުރިއަށްދާން ލިބުނު ވަރަށް ބޮޑު ފުރުސަތެއްކަމަށް ގަބޫލުކުރާކަމަށެވެ.

ރާއްޖޭގެ 100 މީޓަރު ދުވުމުގެ ރެކޯޑް މިއަހަރު އޮތް ކޮމަންވެލްތު ގޭމްސްގައި ހިމްނާ ވަނީ މުގުރާލާފައެވެ. އެއީ 21 އަހަރުވީ ރެކޯޑެކެވެ. އެންމެ ފަހުން ނިމުނު އެތުލެޓިކްސް އެސޯސިއޭޝަން ޗެމްޕިއަންޝިޕްގެ އެންމެ މޮޅު އަންހެން އެތުލީޓަކީވެސް ހިމްނާއެވެ. ހިމްނާ ވަނީ 100 މީޓަރާއި, 200 މީޓަރާއި, 400 މީޓަރުގެ ރަން މެޑަލްވެސް ހޯދާފައެވެ.

ހިމްނާގެ އިތުރުން ޒުވާން އެތުލީޓް އިބާދުﷲ ވެސް ޖެމެއިކާގައި ތަމްރީން ހޯދާނެއެވެ.