17 އަހަރުން ދަށުގެ ޤައުމީ ޓީމު ލަންކާއަށް ފުރައިފި

17 އަހަރުން ދަށުގެ ޤައުމީ ފުޓްބޯޅަ ޓީމު ލަންކާއަށް ފުރައިފިއެވެ.

ޓީމު ލަންކާއަށް ފުރީ މި މަހު އޮންނަ 17 އަހަރުން ދަށުގެ ސާފް ޗެމްޕިއަންޝިޕް މުބާރާތުގައި ވާދަކުރުމަށެވެ.

މި މުބާރާތް އޮންނާނީ މި މަހުގެ 5ން 16ގެ ނިޔަލަށް ލަންކާގައެވެ. ރާއްޖެއާއި ލަންކާގެ އިތުރުން މުބާރާތުގައި ވާދަކުރަނީ ބަންގްލަދޭޝް، އިންޑިއާ، ނޭޕާލް އަދި ބޫޓާންއެވެ. ރާއްޖޭގެ ފުރަތަމަ މެޗުގައި މި މަހުގެ 7 ވަނަ ދުވަހު ނުކުންނާނީ ބަންގްލަދޭޝޤއާ ދެކޮޅަށެވެ. މި މަހުގެ 9 ވަނަ ދުވަހު ރާއްޖޭގެ ދެވަނަ މެޗުގައި ވާދަކުރަން ޖެހެނީ މުބާރާތް ބާއްވާ ސްރީ ލަންކާއާއެވެ.

17 އަހަރުން ދަށުގެ ޓީމު މުބާރާތުގައި ބައިވެރިވުމަށް ފުރާފައިވާއިރު، 20 އަހަރުން ދަށުގެ ޤައުމީ ފުޓްބޯޅަ ޓީމުވެސް ވަނީ ސައުދީ އަރަބިއްޔާއަށް ފުރާފައެވެ. މި މަހު އޮންނަ އޭއެފްސީ 20 އަހަރުން ދަށުގެ އޭޝިއަން ކަޕްގެ ކޮލިފިކޭޝަންއަށް ތައްޔާރުވުމަށް ޓީމު ފުރީ މިދިޔަ ބުދަ ދުވަހުގެ ރޭގައެވެ.