25 ދާއިރާއަކުން ރައީސުލްޖުމްހޫރިއްޔާގެ "ޓޫރިޒަމް ގޯލްޑް އެވޯޑް" ދެނީ
މިއީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމަށް ދޭ އެވޯޑެއް
ރާއްޖޭގެ ފަތުރުވެރިކަމުގެ ދާއިރާގެ ބާނީންނަށް މަޓީ އިން ދިން އެވޯޑު ރައީސް ހަވާލު ކުރައްވަނީ
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމުގެ ގޮތުން ރައީސުލްޖުމްހޫރިއްޔާ ދެއްވާ ހާއްސަ އެވޯޑަށް ނަން ހުށަހެޅުމުގެ ފުރުސަތު ހުޅުވާލައިފިއެވެ.
"ޕްރެޒިޑެންޓްސް ޓޫރިޒަމް ގޯލްޑް އެވޯޑް" ގެ ނަމުގައި ދޭ މި އެވޯޑުގައި 25 ދާއިރާއަކުން ނަން ހުށަހެޅޭނެއެވެ. މިއީ ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަަފުންނާއި ފަތުރުވެރިންނަށް ޚިދުމަތްދޭ ތަންތަނަށް ވެސް ކުރިމަތިލެވޭ ގޮތަށް ހުޅުވާލާފައިވާ އެވޯޑެކެވެ. އެގޮތުން، ރިސޯޓުތަކާއި ގެސްޓްހައުސްތަކާއި ހޮޓެލްތަކާއި ސަފާރީތަކާއި ޑައިވްސެންޓަރުތަކަށް ވަކި ކެޓަގަރީތައް ވަނީ ކަނޑައަޅައިފައެވެ.
މި އެވޯޑަކީ ރާއްޖޭގެ ފަތުރުވެރިކަމުގެ ދާއިރާގައި ފާއިތުވި 50 އަހަރު ތެރޭގައި ޚިދުމަތްކޮށްފައިވާ ފަރާތްތަކާއި ފެސިލިޓީތަކުގެ ޚިދުމަތް ފާހަގަކުރުމުގެ ގޮތުން ދޭ އެވޯޑެކެވެ. މިއީ ރާއްޖޭގެ ފަތުރުވެރިކަމުގެ ރަން އަހަރު ފާހަގަކުރުމަށް މި އަހަރު ރާވާފައިވާ ހަރާކާތްތަކުގެ ތެރޭގައި ހިމެނޭ އެއް ހަރަކާތެވެ.
އެވޯޑަށް ނަން ހުށަހެޅުމަށް ހުޅުވާލާފައިވާ ދާއިރާތައް
މި އެވޯޑުތަކުގެ ތެރެއިން އެންމެ މޮޅު ޑީޖޭ އާއި އެންމެ މޮޅު އާޓިސްޓް އަދި އެންމެ މޮޅު ބޭންޑާއި ގްރޫޕުގެ ކެޓަގަރީން ކުރިމަތިލެވޭނީ ހަމައެކަނި ރާއްޖޭގައި މަސައްކަތް ކުރާ ދިވެހި ފަންނުވެރިންނަށެވެ.
މި އެވޯޑުތަކަށް ކުރިމަތިލާން ހާއްސަ ޕޯޓަލެއް (https://tinyurl.com/mr27rw74) މިހާރު ހުޅުވާފައިވާއިރު މި ފުރުސަތު 11 ސެޕްޓެމްބަރު 2022 ވަނަ ދުވަހުގެ މެންދުރު 2:00 އާ ހަމައަށް ވަނީ ހުޅުވާލައިފައެވެ.
މިއީ ރާއްޖޭގައި ފަތުރުވެރިކަމަށް ހާއްސަޮށްގެން ރައީސުލްޖުމްހޫރިއްޔާގެ ހާއްސަ އެވޯޑެއްދޭ ފުރަތަމަ ފަހަރެވެ. މިއަހަރު ރާއްޖޭގެ ފަތުރުވެރިކަމުގެ ރަން އަހަރު ފާހަގަ ކުރުމުގެ ގޮތުން ސަރުކާރުންނާއި ފަތުރުވެރިކަމުގެ ދާއިރާގެ ޖމިއްޔާތަކުން ވެސް ވަނީ މުޅި އަހަރަށް ބަހާލައިގެން ތަފާތު ގިނަ ހަރަކާތްތަކެއް ރާވާފައެވެ.
