ފަތުރުވެރިކަމުގެ ހިދުމަތްދޭ ތަންތަން އަލުން ތަރައްގީކުރަން ބަންދުކޮށް ސަރުކާރުން ބުނާ މުއްދަތުގައި ނުހުޅުވޭނަމަ އެއްބަސްވުން އުވާލެވޭނެ

ފަތުރުވެރިކަމުގެ ހިދުމަތްދޭ ތަންތަން އަލުން ތަރައްގީކުރަން ބަންދުކޮށް، އެ ތަންތަން ސަރުކާރުން ބުނާ މުއްދަތުގައި ނުހުޅުވޭނަމަ އެއްބަސްވުން އުވާލާ ބަދަލު ނުދެވޭނެ ގޮތަށް ޓޫރިޒަމާއި ބެހޭ ގާނުނަށް އިސްލާހު ހުށަހަޅައިފިއެވެ. ސަރުކާރުގެ ފަރާތުން، ތިމަރަފުށި ދާއިރާގެ މެންބަރު އަޙްމަދު ރިޔާޒް ހުށަހަޅުއްވާފައިވާ، ޤާނޫނު ނަންބަރު 2/99 (ދިވެހިރާއްޖޭގެ ޓޫރިޒަމާބެހޭ ޤާނޫނު) އަށް އިޞްލާޙު ގެނައުމުގެ ބިލުގެ 45 ވަނަ މާއްދާއަށް ނަންބަރެއް އިތުރުކޮށް 45-1 ވަނަ މާއްދާގައި ބުނެފައިވަނީ އެއީ ޓުއަރިޒަމްގެ ބޭނުމަށް ތަރައްގީކޮށް ހިންގަމުންދާ ތަންތަން ރީ-ޑިވޮލަޕްކުރުމަށް ބަންދުކުރުމާއި ބެހޭ މާއްދާއެވެ.

މި މާއްދާގައި ބުނެފައިވަނީ ޓޫރިޒަމްގެ ބޭނުމަށް ތަރައްގީކޮށް ހިންގަމުންދާ ރަށެއްގެ ނުވަތަ ބިމެއްގެ ފެންވަރ މަތިކުރުމަށްޓަކައި ނުވަތަ އެނޫންވެސް އެފަދަ ބޭނުމަކަށް، އެ ރަށެއް ނުވަތަ ބިމެއް ބަންދުކުރެވޭނީ މިނިސްޓްރީން ހަދާ ގަވާއިދެއްގެ މަތިން މިނިސްޓްރީގެ ހުއްދައާއެކު ވަކި މުއްދަތަކަށެވެ.

އަދި އެފަދައިން ކަނޑައަޅާ ކަނޑައެޅުމަށް އަމަލުކުރެވޭނީ، މި ގާނޫނުގެ ދަށުން ޓުއަރިޒަމާ ބެހޭ މިނިސްޓްރީން ހަދާ ގަވައިދާ އެއްގޮތްވާ ގޮތުގެ މަތިން، ރަށުގެ ނުވަތަ ބިމުގެ ކުލީގެ އެގްރީމެންޓް އިސްލާހުކުރުމަށްފަހުކަމަށް އިސްލާހުގައި ބުނެފައިވެއެވެ.

އަދި ރަށުގެ ނުވަތަ ބިމު ކުލީގެ އެގްރީމަންޓަށް ގެނެވޭ އިސްލާހުގައި ކަނޑައަޅާފައިވާ މުއްދަތުގެ ތެރޭގައި ރީ-ޑިވަލަޕްމަންޓުގެ މަސައްކަތް ނިންމައި ތަން ހުޅުވައި ހިދުމަތް ދޭން ފަށާފައި ނުވާނަމަ ގާނޫނުގެ ދަށުން މިނިސްޓްރީން ހަދާ ގަވާއިދެއްގެ ދަށުން ފިޔަވަޅު އަޅައި ކުލީގެ އެގްރީމެންޓް ބާތިލުކުރުމުގެ އިހްތިޔާރު އެ މިނިސްޓްރީއަށް ލިބިގެންވާ ކަމަށެވެ. އަދި އެފަދަ ހާލަތެއްގައި ރަށް ނުވަތަ ބިން ނުވަތަ ފަޅު ކުއްޔަށް ހިފާފައިވާ ފަރާތަށް ސަރުކާރުން ބަދަލުދޭން ނުޖެހޭނެކަމަށް ބުނެފައިވެއެވެ.

މީގެ އިތުރުން ރީ-ޑިވަލަޕްމަންޓަށް ބަންދުކޮށްފައިވާ އުސޫލާއި ހިލާފަށް ފަތުރުވެރިކަމުގެ ބޭނުމަށް ކުއްޔަށް ދޫކޮށްފައިވާ ތަނެއްގެ ހިދުމަތް ދިނުން ހުއްޓާލައި، ތަން ބަންދުކޮށްފައިވާނަމަ، އެ ތަނެއްގެ ކުލީގެ އެގްރީމަންޓް ބާތިލުކުރުމުގެ އިހްތިޔާރު ޓޫރިޒަމާ ބެހޭ މިނިސްޓްރީއަށް ލިބިގެންވާ ކަމަށްވެސް މި ބިލުގައި ވަނީ ހިމަނާފައެވެ.

މީގެ ކުރިން މި މާއްދާގައި އިސްތިހާރުކުރުމާއި ގުޅޭ ބައެއް ނޯވެއެވެ. އަދި ފަތުރުވެރިކަމުގެ ހިދުމަތްދޭ ތަންތަނުން އެތަނެއް އިސްތިހާރުކުރަމުން އައީ އެ ތަނަކުން ނިންމާ ގޮތަކަށެވެ. ނަމަވެސް ސަރުކާރުން ގެނެސްފައިވާ އިސްލާހުގައި ބުނެފައިވަނީ ޓޫރިސްޓް ހިދުމަތްދޭ ތަންތަން އިސްތިހާރު ކުރުމުގައާއި، އެ ތަންތަނާ ބެހޭ މައުލޫމާތު އަންމުކުރުމުގައި އަމަލުކުރަންވާނީ، މި ގާނޫނުގެ ދަށުން ޓުއަރިޒަމާ ބެހޭ މިނިސްޓްރީން ހަދާ ގަވާއިދާ އެއްގޮތްވާ ގޮތުގެ މަތިން ކަމަށެވެ.