ފުލުހުންގެ ޚިދުމަތަށް ރައްޔިތުންގެ އިތުބާރު ހޯދުމަށް ކުރާ މަސައްކަތުގައި މަޑުޖެހުމެއް، ވަރުބަލިވުމެއް ނެތް: ސީޕީ
ފުލުހުންގެ ޚިދުމަތް މިދަނީ ތަރައްޤީގެ އައު ހަރުފަތްތަކެއް ގިރާ ކުރަމުން
ދިވެހި ފުލުހުންގެ ޚިދުމަތުގެ ދުވަހާއި ގުޅިގެން ބޭއްވި ރަސްމީ ޖަލްސާގެ ތެރެއިން
ފުލުހުންގެ ޚިދުމަތަށް ރައްޔިތުންގެ އިތުބާރު ހޯދުމަށް ކުރާ މަސައްކަތުގައި މަޑުޖެހުމެއް، ވަރުބަލިވުމެއް ނެތްކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެއެވެ.
ސީޕީ އެހެން ވިދާޅުވީ ދިވެހި ފުލުހުންގެ ޚިދުމަތުގެ ދުވަހާއި ގުޅިގެން ބޭއްވި ރަސްމީ ޖަލްސާގައި ދެއްކެވި ވާހަކަފުޅުގައެވެ. އެގޮތުން 1 ސެޕްޓެމްބަރު 2004 ގައި ފުލުހުންގެ ޚިދުމަތް އުފެދި، 18 އަހަރު ވެގެން ގޮސްފައިވަނީ ގިނަ ކަންތައްތަކެއް ތަޖުރިބާކުރުމާއެކުކަން ސީޕީ ފާހަގަ ކުރެއްވިއެވެ.
މީގެ 18 އަހަރު ކުރިން ފުލުހުންގެ ޚިދުމަތް ޤާއިމުކުރިއިރު ހުރި ކުށްތަކުގެ ޙާލަތު މިއަދުވެސް ދެމިއޮތްކަން ފާހަގަ ކުރައްވައި ސީޕީ ވިދާޅުވީ، އެއީ ރައްޔިތުންގެ މިއަދުގެވެސް ކަންބޮޑުވުމެއް ކަމަށެވެ.
ސީޕީ ވިދާޅުވީ، ރައްޔިތުންގެ އިތުބާރު މި ޚިދުމަތަށް އިތުރު ކުރުމަށް މިއަދު ގިނަ ބަދަލުތަކެއްވެސް ގެނެވިފައިވާ ކަމަށެވެ. އެގޮތުން ފުލުހުންގެ ޚިދުމަތުގެ ޤާނޫނަށް ސީޕީގެ ވާހަކަފުޅުގައި ވަނީ އަލިއަޅުވާލައްވާފައެވެ.
އޭގެ އިތުރުން، ދިވެހި ފުލުހުންގެ ޚިދުމަތުގެ 7 ވަނަ މާއްދާއަށް ރިއާޔަތްކޮށް އަވައްޓެރި ފުލުހުންގެ ޚިދުމަށް ހުރިހާ ރަށެއްގައި ދިނުމަށް ބޭނުންވާ ތަމްރީނުތައް ދެވިފައިވާކަމަށް ސީޕީ ވިދާޅުވިއެވެ. މި ޚިދުމަތްތައް ފުޅާކޮށް، ރައްޔިތުންނަށް ދޭ ޚިދުމަށް ހަރުދަނާ ކުރުމަށްޓަކައި ކުރެވޭ އެންމެ ބޮޑު އެއް މަސައްކަތަކީ ފުލުހުންނަށް ފޯރުކޮށްދެވޭ ތަމްރީނުކަމަށް ސީޕީ ވިދާޅުވިއެވެ.
ސީޕީ ވަނީ އައްޑޫގައި ޤާއިމުކޮށްފައިވާ ޕޮލިސް އެކެޑަމީ އޭގެ މިސާލެއްގެ ގޮތުގައި ފާހަގަ ކުރައްވާފައެވެ.
ސީޕީ ވިދާޅުވީ، ދިވެހި ފުލުހުންގެ ޚިދުމަތް މިދަނީ ތަރައްޤީގެ އައު ހަރުފަތްތަކެއް ގިރާ ކުރަމުން ކަމަށެވެ. ފުލުހުންގެ ޚިދުމަތަށް ރައްޔިތުންގެ އިތުބާރު ހޯދުމަށް ކުރަމުންދާ މަސައްކަތުގައި މަޑުޖެހުމެއް، އަދި ވަރުބަލިވުމެއް ނެތްކަމަށް ސީޕީ ވިދާޅުވިއެވެ.
މުޖުތަމައުގައި ޙައްލު ހޯދަން ހުރި ކަންކަމަށް ޙައްލު ހޯދުމުގައި މުއައްސަސާތަކާއި ގުޅިގެން ކުރަމުންދާ މަސައްކަތް މިހާރަށްވުރެ ފުޅާ ކުރައްވާނެކަމަށް ސީޕީ ވިދާޅުވިއެވެ.
ސީޕީ ވަނީ އެ މަސައްކަތުގައި ރައްޔިތުންގެ ބައިވެރިވުންވެސް މިހާރަށްވުރެ ފުޅާ ކުރެއްވުމަށް އެދިވަޑައިގަންނަވާފައެވެ.
