މާލެ ސަރަހައްދުން ބޭރުގައި ހިންގާ ގެދޮރުވެރިކަމުގެ އެންމެ ބިޔަ މަޝްރޫޢު ކުޅުދުއްފުށީގައި ފެށުމަށް ތައްޔާރުވެއްޖެ

މާލެ ސަރަހައްދުން ބޭރުގައި މިސަރުކާރުން ހިންގާ އެންމެ ބިޔަ ހައުސިންގ މަޝްރޫޢުކަމުގައިވާ ކުޅުދުއްފުށި ސިޓީގައި އެޅުމަށް ހަމަޖެހިފައިވާ 400 ހައުސިންގ ޔުނިޓް އެޅުމަށް ތައްޔާރުވެއްޖެއެވެ.

ކުޅުދުއްފުށި ސިޓީ ކައުންސިލުން ބުނީ ހައުސިންގ ޔުނިޓް އެޅުމަށް ބޭނުންވާ ބިން ކަނޑައަޅައި، ޕްރޮޖެކްޓްގެ ކޮންޓްރެކްޓަރަށް ޕްރޮޖެކްޓް ސައިޓް ހަވާލުކޮށްފައިވާކަމަށެވެ. މި މަޝްރޫއު ޙަވާލު ކޮށްފައިވަނީ ދޮންބޭޒް ޕްރައިވެޓް ލިމިޓެޑްގެ ޖޮއިންޓް ވެންޗަރ ކުންފުންޏެއް ކަމަށްވާ ޓުވެންޓީ ތާރޑް މެޓާލާޖިކަލް ކޮންސްޓްރަކްޝަން ގްރޫޕް ކޯ ލިމިޓެޑާއެވެ. ކުޅުދުއްފުށީގައި އިމާރަތްކުރާ 400 ހައުސިންގ ޔުނިޓް އެޅުމުގެ މަޝްރޫއުގައި ހައުސިންގ މިނިސްޓްރީ އާއި އެމަސައްކަތްކުރަން ހަމަޖެހިފައިވާ ކުންފުންޏާއެކު ސޮއިކޮށްފައިވަނީ މިއަހަރުގެ ޖުލައި މަހުގެ 7 ވަނަ ދުވަހުއެވެ.

މިއީ ދިވެހި ސަރުކާރުން 2022 ވަނަ އަހަރުގެ ޕީއެސްއައިޕީ ބަޖެޓުގައި ހިމަނައިގެން ކުރިއަށްގެންދާ މަޝްރޫއެކެވެ. މި މަޝްރޫއުގެ ދަށުން 11 ބުރީގެ 5 ޓަވަރު އިމާރާތްކުރާނެއެވެ. އެއީ 1000 އަކަ ފޫޓުގެ ޖާގާގައި 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ލޯންޑްރީ އަދި ސްޓޯރ ހިމެނޭގޮތަށް 400 އެޕާރޓްމަންޓް އަދި ކޮންމެ އެޕާރޓްމަންޓަކަށް ސައިކަލް ޕާރކިންގ ޖާގައެއް ދެވޭނެއެވެ. ގްރައުންޑް ފްލޯރ ބޭނުން ކުރާނީ ކޮމާރޝަލް އަދި މެއިންޓެނެންސް އޮފީސްގެ އިތުރުން ކޮންމެ އެޕާޓްމަންޓަކަށް ސައިކަލު ޕާކު ކުރާނެ ޖާގަ ދޭ ގޮތަށެވެ. މި އިމާރާތުގައި ދެ ލިފްޓް ހުންނާނެއެވެ.

އޭގެ އިތުރުން، އިމާރާތުގެ ވަށާ ފާރާއި، ހައުސިންގ ޔުނިޓުތަކުގައި ދިރިއުޅޭ ފަރާތްތައް ހިތްފަސޭހަ މާހައުލެއް ޤާއިމު ކުރުމަށްޓަކައި ޔުނިޓު ވަށައިގެން އަލި ކުރެވި، ޕާކެއް ޤާއިމު ކުރެވޭނެއެވެ.

މި މަޝްރޫޢު ހަވާލުކޮށްފައިވަނީ ޑިޒައިން އެންޑް ބިލްޑް އުސޫލުން 439،991،160.00 (ހަތަރު ސަތޭކަ ތިރީސް ނުވަ މިލިއަން ނުވަ ސަތޭކަ ނުވަދިހަ އެއް ހާސް ސަތޭކަ ފަސް ދޮޅަސް އެކެއް) ދިވެހި ރުފިޔާއަށެވެ. އެއީ 540 ދުވަސް ތެރޭގައި މަސައްކަތް ނިންމުމަށެވެ.

ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ކުޅުދުއްފުށި ސިޓީގެ މޭޔަރ މުހައްމަދު އާތިފު މީގެކުރިން ވިދާޅުވެފައިވަނީ ކުޅުދުއްފުއްޓަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަން ކަމަށެވެ. އެގޮތުން، މިހާރުން މިހާރަށް ވެސް ބޯހިޔާވަހިކަން ބޭނުންވާ 1200 އާއި 1500 އާ ދެމެދުގެ އާއިލާ އެބަތިބިކަން އޭނާ ފާހަގަ ކުރެއްވިއެވެ. ކުޅުދުއްފުށީގައި އެންމެ ފަހުން ހައުސިންގ މަޝްރޫއެއް ކުރިއަށްދިޔައީ 2011 ވަނަ އަހަރުކަން ފާހަގަ ކުރައްވައި މޭޔަރ ވިދާޅުވީ އެ މަސައްކަތް ވެސް ސަރުކާރު ބަދަލުވުމާއެކު މަޑުޖެހުނު ކަމަށެވެ. އަދި ކުރީ ސަރުކާރުން އެކަމަށް އިސްކަމެއް ނުދޭ ކަމަށާއި ނަމަވެސް މި ސަރުކާރު ވެރިކަމާ ހަވާލުވެ އެތަނުގެ މަސައްކަތް ވެސް އަލުން ފަށާފައިވާ ކަން އޭނާ ފާހަގަ ކުރެއްވިއެވެ.

400 ހައުސިން ޔުނިޓްގެ މަސައްކަތް ކުރިއަށްދާނީ އަލަށް ހިއްކާފައިވާ 28 ހެކްޓަރުގެ ބިމުގައެވެ.