ލޯނު އުސޫލުން ވިންކްސް ސެމްޕްޑޯރިއާއަށް ބަދަލުވަނީ
ވިންކްސް ޓޮޓެންހަމްއާ ގުޅުނީ 2014 ވަނަ އަހަރު
ހެރީ ވިންކްސް
ޓޮޓެންހަމްއަށް ކުޅެމުން އަންނަ ހެރީ ވިންކްސް ސެމްޕްޑޯރިއާއަށް ބަދަލުވުމާއި ގާތަށް ޖެހިލައިފިއެވެ.
ވިންކްސް ސެމްޕްޑޮރިއާއަށް ބަދަލުވަނީ ލޯނު އުސޫލުންނެވެ. އަދި ދެޓީމުގެ މެދުގައި ހުރިހާ އެއްބަސްވުންތަކެއް މިހާރު ގާތްގަނޑަކަށް ނިމިފައިވާކަމަށް ރިޕޯޓުތައް ބުނެއެވެ.
ވިންކްސް ޓޮޓެންހަމްއާ ގުޅުނީ 2014 ވަނަ އަހަރުއެވެ. އޭގެ ފަހުން ޓީމުގައި ރަނގަޅު ކުޅުމެއް ދެއްކިއެވެ. ނަމަވެސް މިހާރުގެ ޓީމުން ވިންކްސްއަށް ފުރުސަތު ލިބެނީ މަދު މެޗެއްގައި ކުޅުމަށެވެ. މިދިޔަ ފެބްރުއަރީ މަހުގެ ފަހުން، ޕްރިމިއަރ ލީގުގެ އެއްވެސް މެޗެއްގައި، ޓޮޓެންހަމްގެ ފުރަތަމަ 11ގައި ވިންކްސް ހިމަނާފައެއް ނުވެއެވެ. އަދި މި ސީޒަންގައި ޓޮޓެންހަމް ކުޅުނު ޕްރިމިއަރ ލީގުގެ ހަތަރު މެޗުގެ ތެރެއިން އެއްވެސް މެޗެއްގައި ވިންކްސްއަށް ކުޅުމުގެ ފުރުސަތު، ޓީމުގެ ކޯޗު އެންޓޮނިއޯ ކޮންޓޭ ދީފައެއް ނުވެއެވެ.
މި ފަހަކަށް އައިސް އިނގިރޭސި ކުޅުންތެރިން އަންނަނީ އިޓަލީގެ ކްލަބުތަކަށް ބަދަލުވެ ރަނގަޅު ކާމިޔާބީތަކެއް ހޯދަމުންނެވެ. ރިޕޯޓުތައް ބުނާ ގޮތުން ވިންކްސްވެސް މަސައްކަތް ކުރަނީ އިޓާލިއަން ލީގުގެ ސެމްޕްޑޯރިއާއަށް ބަދަލުވެ، ކެރިއަރުގައި ގިނަ ކާމިޔާބީތަކެއް ހޯދުމަށެވެ.
