ބެނާޑޯ ސިލްވާ ސިޓީގައި މަޑުކުރާނެ ކަމަށް ގާޑިއޯލާ ބުނެފި

މެންޗެސްޓަރ ސިޓީއަށް ކުޅެމުން އަންނަ ޕޯޗުގަލްގެ އެޓޭކިން މިޑްފީލްޑަރު ބެނާޑޯ ސިލްވާ އެ ޓީމު ދޫކޮށްނުލާނެ ކަމަށް ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނެފައިވާއިރު، ސިލްވާ ހޯދުމުގެ މަސައްކަތް ސްޕެއިންގެ ބާސެލޯނާ އިން އައީ ކުރަމުންނެވެ. އޭރު ގާޑިއޯލާ ބުނީ ސިލްވާ ޓީމުގައި މަޑު ކުރާނެ ކަމަށް ބެލެވޭ ކަމަށާއި، އޭނާ އަކީ ގާޑިއޯލާ ބޭނުންވާ ކުޅުންތެރިޔެއް ކަމަށެވެ. ނަމަވެސް ޓީމުގައި ހުންނަން ބޭނުން ނުވާ ކުޅުންތެރިޔަކު ބަހައްޓަން ބޭނުންނުވާ ކަމަށް ވެސް އޭރު ގާޑިއޯލާ ވަނީ ބުނެފައެވެ.

ޕްރިމިއަރ ލީގުގައި ކްރިސްޓަލް ޕެލެސްއާއި ދެކޮޅަށް ކުޅޭ މެޗުގެ ކުރިން އޮތް ޕްރެސް ކޮންފަރެންސްގައި ގާޑިއޯލާ ބުނީ، ސިލްވާ ސިޓީގައި މަޑުކުރާނެ ކަމަށާއި، އޭނާ ދޫކޮށްލުމާ ގުޅޭ ގޮތުން އެއްވެސް މަޝްވަރާތަކެއް ކުރިއަށް ނުދާ ކަމަށެވެ. މީގެ އިތުރުން ގާޑިއޯލާ ބުނީ ސިލްވާ ހޯދުމަށް އެދި އެއްވެސް ކުލަބެއްގެ ފަރާތުން "ފޯނު ކޯލެއް" ނާންނަކަމަށެވެ.

އުމުރުން 28 އަހަރުގެ ސިލްވާ ސިޓީއަށް ބަދަލުވީ 2017 ވަނަ އަހަރު މޮނާކޯ އިންނެވެ. އެއަށްފަހު އޭނާ ވަނީ ސިޓީއަށް ކުޅެދިން 255 މެޗުގައި 49 ލަނޑު ޖަހާފައެވެ. ސިލްވާ އަކީ ސިޓީގައި ގާޑިއޯލާ އަށް މުހިންމު ކުޅުންތެރިޔެކެވެ. އޭނާ ވަނީ ސިޓީއާއެކު ގިނަ ކާމިޔާބީތަކެއް ވެސް ހޯދާފައެވެ. ސިޓީއާއެކު ސިލްވާ ވަނީ 11 ތައްޓެއް ކާމިޔާބުކޮށްފައެވެ.