މިނީ ބަހުގެ ޚިދުމަތް ދިނުމަށް އިތުރު ޕާކިންގ ޒޯންތަކެއް ހަދަނީ
މަސައްކަތްކުރަމުން ދަނީ މާލޭގައި މިނީ ބަހުގެ ޚިދުމަތް މި މަހުގެތެރޭގައި ފެށުމަށް
މިނީ ބަހުގެ ޓެސްޓް ދަތުރުތައް ފެށުން
މިނީ ބަހުގެ ޚިދުމަތް ދިނުމަށް އިތުރު ޕާކިންގ ޒޯންތަކެއް ހަދާ ތަރައްޤީކުރުމުގެ މަސައްކަތް ފަށައިފިއެވެ.
މާލޭގެ މަގުތައް ތޮއްޖެހި ޓްރެފިކް ބާރު ބޮޑުވުން ހައްލުކުރުމަށާއި، އަތްފޯރާ ފަށުގައި ދަތުރުފަތުރުކުރުމުގެ ޚިދުމަތް ފޯރުކޮށްދިނުމަށް ސަރުކާރުން ވަނީ މާލޭގައި މިނީ ބަހުގެ ޚިދުމަތް ދިނުމަށް ނިންމާފައެވެ. މިނީ ބަހުގެ ޚިދުމަތް ދިނުމަށް ބަސް ދަތުރުކުރާނެ ރޫޓުތައް ކަނޑައަޅާ އެމަގުތަކުގައި ހުރި ވެހިކަލްތައް ނަގާ ވެހިކަލް ޕާކުކުރެވޭނެ އިތުރު ސަރަޙައްދުތައް އަންނަނީ ތަރައްޤީކުރަމުންނެވެ. އެގޮތުން ޕާކިން ޒޯންތައް ތަރައްޤީކުރާ ތަންތަނުގެ ތެރޭގައި އަމީނީ މަގުގެ ޓްރެފިކް ޕޮލިސް ކައިރީގައި ޤާއިމްކުރާ ޕާކިންގ ޒޯން ހިމެނެއެވެ. މީގެއިތުރުންވެސް ބަހުގެ ރޫޓުތެރޭގައި ހިމެނޭ މަޖީދީމަގާއި ފަރީދީ މަގުގައި ހުރި އުޅަނދުތައް ނަގާ، އެސަރަޙައްދުތަކުގައި ޤާއިމުކުރުމަށް ހަމަޖެހިފައިވާ ޕާކިންގ ޒޯންތަކުގެ މަސައްކަތްވެސް ކުރަމުންދާ ކަމަށް ސިޓީކައުންސިލުން ވަނީ ބުނެފައެވެ.
ޕާކިންގ އިތުރުކުރުމަށް ބިން ދީފައިވާ ތަންތަނަކީ އަމީނީމަގުން ދަރުބާރުގެ ކައިރީގައި އޮންނަ ރުއްގަނޑު ސަރަޙައްދު، ހ. ސަމޯސާވިލާ، ހައިކޯޓު ކުރިމަތިން އޮންނަ ބިމުގެ އިތުރުން މާފަންނުން ކޮރަލް ބުލެވަރޑް ސަރަޙައްދު އަދި މަޖީދީމަގުން ހީނާމާގެއާއި ބިއްލޫރިޖެހިގެއިންނެވެ. މި ނޫން އިތުރު ބައެއް ބިންތައް ވެސް ޕާކިންގެ ބޭނުމަށް ދޫކުރުމަށްވަނީ ހަމަޖެހިފައެވެ. އެހެންނަމަވެސް އެބިންތަކަކީ ކޮބާކަން އަދި ހާމަކޮށްފައެއް ނުވެއެވެ.
މިދިޔަ ހަފްތާގެ ތެރޭގައި މިނީ ބަހުގެ ޓެސްޓު ދަތުރުތައް ކޮށްފައި ވާއިރު، މާލޭގައި މިނީ ބަހުގެ ޚިދުމަތް މި މަހުގެތެރޭގައި ފެށުމަށް މަސައްކަތް ކުރަމުން އަންނަކަމަށް އެމްޓީސީސީގެ ސީއީއޯ އާދަމް އާޒިމް ވަނީ މީގެ ކުރިން ވިދާޅުވެފައެވެ.
މާލޭގައި މިނީ ބަހުގެ ޚިދުމަތް ފެށުމަށް ކުރަމުން އަންނަ މަސައްކަތްތަކުގެ ދަށުން، މަޖީދީ މަގުގައި ޕާކުކުރުން މިހާރު ވަނީ މަނާކޮށްފައެވެ. އެގޮތުން މާލެ ސިޓީ ކައުންސިލުން ވަނީ މަޖީދީމަގުގައި ޕާކު ކުރުން މަނާކަން އެންގުމަށް، މަގުގެ ދެ ފަރާތުގައި ރޮނގު ދަމާފައެވެ. މީގެ އިތުރުން ބައެއް ސަރަހައްދުތަކުގައި ޕާކު ނުކުރެވޭކަން އެންގުމަށް ކޯނުވެސް ވަނީ ބަހައްޓާފައެވެ.
