މޫސުމީ ނޭދެވޭ ބަދަލުތަކުގެ ވާހަކައަކީ ހަމައެކަނި ސިޔާސީ ޕޯޑިއަމްތަކުގައި އަނެކާއަށް ވުރެ ބޮޑު މަޤުބޫލުކަމެއް ހޯދަން ދައްކާ ވާހަކައެއް ކަމަށް ދުށް ޒަމާން މާޒީ ވެއްޖެ ކަމުގައި ޤަބޫލު ކުރަން މިއަދު މިވަނީ މަޖުބޫރުވެފައެވެ.
ދުނިޔޭގެ އެކި ހިސާބުތަކަށް، މޫސުމީ ގޮތުން ބޮޑެތި ބަދަލުތަކެއް އައިސް، ދިރިއުޅުމުގެ ހުރިހާ ކަމެއްހެން އެފުށް މިފުށަށް ޖަހާލާފައި ވަނީ ވިސްނާވެސް ނުލާ ތިއްބައެވެ. އެއްބައި ސަރަހައްދުތަކަށް އާދަޔާ ޚިލާފު ގަދަ ހޫނާއެކު ހަނަފަސްކަން ކުރިމަތިވެފައި ވާ އިރު، ގަދަ ވިއްސާރައިގެ ސަބަބުން މުޅި ދިރިއުޅުން ފެނު އަޑީގައި ޣަރަޤުވެފައިވާ މީހުންގެ އަދަދުވެސް މަދެކޭ ނުދެންނެވޭނެއެވެ. އެފަދަ އެއް ބަޔަކީ، ދިވެހި މުޖުތަމައުވެސް އެ ބައެއްގެ އުފެއްދުންތަކަށް ފަރިތަ، އަވަށްޓެރި އިންޑިއާގެ ދަނޑުވެރިންނެވެ.
އަހަރެންގެ އަވަށުގަ، އުސް ހިސާބުތަކުގައި ހުރި ގެތަށް އެކަނި ސަލާމަތުން ހުރީ. ބިންތިރި ސަރަހައްދުތަކުގަ އޮތީ ފެންބޮޑުވެފަ. ދެމަފިރިއަކު އޮޔާވެސް ގެންދިޔަ ކަންނޭނގެ. އަހަރަމެން އެންމެނަކީވެސް ގޮދަން ހައްދާ ދަނޑުވެރިން. ގޮދަންތައް މުޅިން ހަލާކުވެއްޖެ. ބިއްލޯރީ އަވަށުގެ ހުރިހާ އެންމެނަށްވެސް ބޮޑެތި ގެއްލުންތަކެއް ތަހައްމަލު ކުރަން ޖެހިފަ މިއޮތީ.ރަންޖީތު ޓާކޫރު؛ ދަނޑުވެރިއެއް
އިންޑިއާގެ މެދުތެރޭ ހިސާބުތަކަށް، ހުއްޓުމެއް ނެތި ކުރަމުން ދާ ގަދަ ވިއްސާރައިގެ ސަބަބުން ދަނޑުބިންތައް ވަނީ މުޅިންހެން ސުންނާފަތިވެފައެވެ. އިންޑިއާގެ މެދުތެރޭ ހިސާބުތަކުގެ ދަނޑުބިންތަކުގެ އުފެއްދުންތައް ހަލާކުވެފައި ވާ އިރު، އާންމު ދިރިއުޅުމުގެ ކަންކަންވެސް އޮތީ މަޑުޖެހުމެއްގައެވެ.
އާދަޔާ ޚިލާފު ގަދަ ވިއްސާރައިގެ ސަބަބުން ވިދިއްސާ ސިޓީގެ ބިތުވާ ކޯރުގެ ފެންގަނޑު ބޮޑުވެ، ރަށު ތެރެއަށް ބަންޑުންވެފައި ވާ އިރު، ދަނޑުބިންތަކާއި އާންމު ގެދޮރުތައްވެސް މިއަދު އޮތީ ފެނު އަޑީގައެވެ.
މިކަން މި ދިމާވަނީ ކައިރީގައި މިއޮތް ކޯރު ފުރި ބަންޑުންވެގެން. މީ ކޯރު ފުރިގެން، އަހަރަމެންގެ ގެތަކާ ހިސާބަށް ފެންގަނޑު ފޯރި ފުރަތަމަ ފަހަރު. މީގެ ކުރިންވެސް ފެންބޮޑުވޭ. އެކަމަކު ކޯރާ ކައިރި ހިސާބުތަކަށް އަސަރު ފޯރާނީ. އަހަރަމެންގެ ގެތަކަށް މީގެ ކުރިން ފެނެއް ނުވަދޭ. އަހަރަމެންގެ ހާލަތު ވަރަށް ސަކަރާތް. ކައްކާ، ކައިބޮއި ހެދުމާއި ނިދުމުގެ ކަންކަން ވަރަށް ދަތި. ނުވިތާކަށް އަހަރަމެންނަށް އެހީއެއްވެސް ލިބެނީކީ ނޫން.މޯހަން ބާންދީ؛ އާންމު ރައްޔިތެއް
ދަނޑުވެރިން ބުނާ ގޮތުގައި ބޯކޮށް ވާރޭވެހުމުގެ ސަބަބުން، އެމީހުންގެ ދަނޑުބިންތައް ވަނީ އެކީއެކައްޗަކަށްހެން ސުންނާފަތިވެ، ހަލާކުވެފައެވެ. އެތައް ސަތޭކަ ހެކްޓަރެއްގެ ދަނޑުބިން އޮތީ ފެނުއަޑީގައެވެ. އެ ދަނޑުތަކުގައި މައިގަނޑު ގޮތެއްގައި ހުރީ، ގިނަ ބައެއްގެ ކެއިންބުއިމުގެ ތާވަލުގެ ބޮޑު ހިއްސާއެއް އޮންނަ ގޮދަނެވެ.
އިންޑިއާގެ އެކި ހިސާބުތަކަށް ކުރަމުން ދާ ގަދަ ވިއްސާރައިގެ ސަބަބުން ފެންބޮޑުވުމުގެ ހާދިސާތައް ތަޖުރިބާ ކުރަން ޖެހުނު އަވަށްތަކުގެ އަދަދު، ގާތްގަނޑަކަށް 300 އަށް އަރައެވެ. ޒަރޫރީ ސާމާނު ހޯދުމަށްޓަކާ، އެހެން އަވަށްތަކަށް ދަނީވެސް ރަށު ތެރޭގައި ބޮޑުވެފައިވާ ފެންގަނޑު ތެރޭގައި ފަތާފައެވެ.
އިންޑިއާގެ ކަމާ ބެހޭ ފަރާތްތަކުން ބުނާ ގޮތުގައި، އެންމެ ބޮޑަށް ގެއްލުންވި ސަރަހައްދުތަކުން ރައްކާތެރި ހިސާބުތަކަށް ބަދަލު ކުރި މީހުންގެ އަދަދު 7500 އަށް ވުރެ މައްޗަށް އަރައެވެ.
ދެކުނު އޭޝިއާގެ އެންމެ ވަރުގަދަ އިގުތިސޯދުތަކުގެ ތެރޭގައި ގުނާލެވޭ އިންޑިއާގެ 2.7 ޓްރިލިއަން ޑޮލަރުގެ އަގުހުރި އިގުތިސޯދުގެ 15 ޕަސެންޓް ހިއްސާ ކުރަނީ ދަނޑުވެރިކަމެވެ. 1.3 ބިލިއަން މީހުންގެ އާބާދީގެ 2 ބައިކުޅަ 1 ބައި މީހުންނަކީ ދަނޑުވެރިކަމުގެ ސިނާއަތާ ސީދާ ގޮތުންނާއި ނުސީދާ ގޮތުން ގުޅިފައިވާ މީހުންނެވެ.
